I Pêtrôs 3:18a
“Yua kơ Yêsu Krist sơ̆ Sư kư̆m lôch pơmat yua kơ tơdrong yoch bơ̆n thoi noh mơ̆n wă kơ bơ̆n klaih đơ̆ng tơdrong yoch gơh oei hăm ‘Bok Kei-Dei.” (I Pêtrôs 3:18a)
Nơ̆r jet tơchĕng pơwao:
- Yua kơ kiơ păng yua kơ bu na Kră Yang Yêsu chu lôch?
- Đơ̆ng tơdrong Kră Yang Yêsu lôch ba ăn tơdrong kiơ?
- Băt đơ̆ng dôm tơdrong âu ba ăn kơ bơ̆n tơdrong kiơ gah bơhngol lăm tơdrong yak kiơ̆ Kră Yang rim năr?
I Pêtrôs 3:8-21 noh jơ̆ minh chăl gĭt kăl dêh gah tơdrong pơtrŭt lu bơngai đei đŏk lăm Khŭl Bơngai Lui blŭng a, lu sư đei tơ’bơ̆p tơdrong gơ̆p pơm kơnê̆ tih krưp dêh đơ̆ng pơtao Nê-rô. Dang ei, lơ lăm lu bơ̆n ưh kơ đei mơn tơdrong lôch arih nhen thoi lu sư, mă lei lăm chăl âu tơgŭm bơ̆n krăng kơchăng wă chu pơmat yua kơ bơ̆n băt Kră Yang Yêsu kŭm đei tơdrong truh păng đei tơdrong kĕ jei ‘lơ̆ng rŏ.
Roi gah tơdrong Kră Yang Yêsu chu pơmat, jơ âu Pêtrôs đei chih kơđeh “chu lôch”, mă lei sư đei chih pran hloh lăm tơdrong âu “chu lôch pơmat tơ’long pơglang tăm” (Philip 2:8), tơdrong lôch mă jĭ pơmat dêh păng mơlâu dêh lăm chăl noh. Lu bơngai mă đei đŏk hơdrol lăm Sơ̆p hla bơar ‘nâu jơ̆ lu bơngai mă chu pơmat yua kơ đei bơngai pơm kơnê̆ kơ tơdrong lui, lu sư gô đei tơdrong pơlung păng dŏng tơgŭm tơpă yua kơ băt kơ Kră Yang Yêsu kư̆m đei hlôi bơih lăm tơdrong jĭ pơmat tih tơpă mă lei Kră Yang đei kĕ jei hăm tơdrong ‘lơ̆ng rŏ. Lu bơ̆n dang ei hăm wă chu pơmat truh kơ tơdrong lôch (Hêbrơ 12:4), thoi noh, lu bơ̆n kăl kơ dơ̆ng kơjăp hloh păng lui gơnang kơ Kră Yang Yêsu kơplah đei tơdrong pơmat đe pơm kơnê̆.
Tơdrong Kră Yang Yêsu ‘mêm păng tơdrong chu lôch Pôl đei pơma nhen dan kơpal kĭ mă lei ưh kơ hơnơ̆ng băl, noh jơ̆ “’Bok ‘Lơ̆ng Tơpăt lôch tang kơ lu bơngai mă ưh kơ tơpăt”. Kră Yang Yêsu lôch yua kơ tơdrong yoch “lu bơngai mă ưh kơ tơpăt”, ưh kơ yua kơ tơdrong yoch Sư kơdih ôh, yua kơ Sư jơ̆ “’Bok Mă ‘Lơ̆ng Tơpăt” păng “Sư ưh kơ lah pơm yoch, lăm ‘bơ̆r Sư ưh kơ đei la yơ pơma hơlĕnh” (I Pêtrôs 2:22). Hloh kơ ‘noh dơ̆ng. Kră Yang Yêsu lôch tang kon bơngai kơplah lu sư oei jrok lăm tơdrong yoch, ưh kơ băt kơ Sư, hloh kơ ‘noh dơ̆ng kon bơngai mă ayăt kơ Kră Yang păng pơlôch Sư (Rôm 5:6-10)
Kră Yang Yêsu đei chu lôch yua kơ lu bơngai yoch wă kơ lu sư lăp đon lăm jơ-hngơ̆m na lui sơng iŏk Sư wă kơ klaih đơ̆ng tơdrong yoch (Hêbrơ 9:28). Ưh pă lôch gah bơhngol bơih mă lei jô̆ jing ‘lơ̆ng tơpăt (Rôm 8:1-2), gơh jing kon ‘Bok Kei-Dei (Yôhan 1:12), đei Kră Yang “dui ba lu bơ̆n năm jê̆ ‘Bok Kei-Dei” “dui ba” noh jơ̆ nhen thoi năm ba păng roi pơdah ăn wă kơ năm jê̆ bơngai ayơ noh. ‘Bok Krist “dui ba bơ̆n” noh jơ̆ ba lu bơngai mă lui kơ Sư tơ’bơ̆p Kră Yang ‘Bok Kei-Dei. Nâu jơ̆ đei plei yua kơ đơ̆ng Kră Yang chu pơmat, păng lôch tang tơdrong Sư lôch ‘noh pơm ăn kơ che tơhek lê̆ chươ̆ng đơ̆ng kơpal truh tơ ala lăm hnam akŭm (Mathiơ 27:51; Hêbrơ 10:19-22).
Tơdrong kĕ jei ‘lơ̆ng rŏ đơ̆ng Kră Yang Yêsu yua kơ đơ̆ng tơdrong chu pơmat ưh kơ trŏ hơdrô̆ huai iŏk tơdrong yoch wă dŏng pơklaih bơ̆n đĕch ôh mă lei kư̆m năm ba bơ̆n gơh jê̆ ‘Bok Kei-Dei, pơm ming lăi dơ̆ng bơ̆n jing kon ‘Bok Kei-Dei, păng đei tơdrong pŭn hiôk gah bơhngol lăm hnam dơnŏ Kră Yang (Rôm 5:1-5).
Ơ Kră Yang, inh bơnê kơ Ih yua kơ Ih đei tơ’bôh tơdrong ‘mêm Ih lăm tơdrong đei lôch tang tơplih inh, đơ̆ng noh ba ăn kơ inh jing ‘lơ̆ng tơpăt ‘bơ̆t anăp ‘Bok Kei-Dei păng gơh jing kon Ih.. Yua anăn Kră Yang Yêsu Krist. Amen
Pơm thoi yơ wă kơ lu bơ̆n ling lang dơ̆ng kơjăp lăm tơdrong lui kơ plah đei tơdrong pơmat tat, păng tơdrong pơlong lăng?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Đaniel 6
Kênh Youtube BHKTHN:
