Mathais 16:24
Nqe cim:
“Yexus hais rau cov thwjtim hais tias, “Yog leejtwg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaublig nrog kuv mus” (Mathais 16:24).
Lus nug rau sawvdaws xav:
– Tswv Yexus hais lo lus no rau leejtwg?
– Nws xav kom lawv yuav tsum ua dabtsi kom tau raws Nws qab?
– Peb tabtom raws tus Tswv qab zoo licas?
Tomqab uas Tswv Yexus qhia txog Nws kev txomnyem, kev tuag thiab kev sawv rov los rau cov thwjtim, tus Tswv qhia ntxiv rau lawv txog qhov uas ua thiab tus nqi yuav tsum them thaum raws Nws qab. Thib ib, tus uas xav nrog tus Tswv mus “tswj nws lub siab” lossis “tso tus kheej tseg”. Lo lus no muaj lub ntsiab hais tias muab yus cais tawm ntawm leejtwg lossis ib yam dabtsi twg. Tus uas xav nrog tus Tswv mus yuav tsum paub tswj yus tus cwjpwm, hwjchim meej mom, kev tau zoo, tus kheej kev ntshaw thiab txojsia kom tau nrog tus Tswv mus, ntawd yog lub ntsiab loj tshajplaws ntawm kev “tswj lub siab” lossis “tso tus kheej”. Thib ob, tus uas xav nrog tus Tswv mus yuav tsum “kwv nws tus khaublig ntoo”. Ntoo khaublig yog cov neeg Loos yam cuabyeej tua neeg txaus ntshai heev rau cov neeg ua qhev thiab tej haivneeg uas lawv kav. Tsis yog tus raug txim yuav raug tiv kev mob mus txog thaum tuag xwb, nws tseem raug kwv nws tus ntoo khaublig mus rau qhov chaw luag muab nws ntsia thiab. Tswv Yexus qhia hais tias tus uas xav nrog tus Tswv mus yuav tsum tig lub siab mus rau qhov uas yuav tiv kev txomnyem thiab kev tuag. Ntawd yog tuag tus neeg qub kom tau nrog tus Tswv mus hauv tus neeg tshiab zoo li Timthawj Paulus tau hais hauv Kalatias 2:20.
Tswv Yexus xav kom cov thwjtim yuav tsum zeem paub Nws tiag tiag, nqhis nqhawv nrog Nws mus thiab kuj txaus siab them nqi kom raws Nws qab zoo li Timthawj Petus tau hais rau tus Tswv, “Tus tswv, yog peb tso koj tseg, peb yuav mus cuag leejtwg? Tsuas yog koj tib leeg tej lus xwb, thiaj pub tau txojsia ibtxhis rau neeg. Nimno peb ntseeg thiab paub tseeb hais tias koj yog tus dawbhuv uas Vajtswv txib los” (Yauhas 6:68-69).
Niaj hnub nimno, Tswv Yexus kuj nug peb txhua tus puas xav nrog Nws mus tiag tiag? Txhais hais tias peb puas kub siab lug thiab zeem paub qhov tseemceeb ntawm kev nrog tus Tswv mus? Vim muaj coob tug ntseeg nrog tus Tswv mus tiamsis tsis paub tus Tswv, nrog tus Tswv mus raws tsevneeg coj xwb,… Vim li ntawd cov ntseeg zoo li ntawd kuj tsis txaus siab them nqi, tiv txomnyem kom tau nrog tus Tswv mus. Hais txog cov neeg uas nrog tus Tswv mus zoo li ntawd, thaum ntsib kev sim siab lossis raug ris nra hnyav lawv yuav tso tus Tswv tseg, lossis tawmtsam Nws. Tus Tswv tsis xav peb nrog Nws mus zoo li cov neeg ntawd, qhov xubthawj tus Tswv xav kom peb yuav tsum yog “thwjtim”, txhais tau tias ntseeg Nws thiab txaus siab hlo kawm xyaum kom loj hlob hauv tus Tswv txhua hnub. Tomqab ntawd peb yuav tsum txaus siab tswj tus kheej vim paub tias lubneej ibtxhis tom ntej tseemceeb dua thiab muaj nqis dua lubneej pheeb suab ibvuag. Qhov kawg peb yuav tsum txaus siab them nqi, txaus siab tiv kev mob, tuag tus neeg qub kom tau nrog tus Tswv mus txog hnub kawg. Muaj ntau lub vimchiv ua rau peb tswj tsis taus tus kheej thiab tsis txaus siab tiv kev txomnyem kom tau nrog tus Tswv mus vim peb tsis tau muaj qhov pib yog nrog tus Tswv. Cia li txiavtxim siab tswj tus kheej, kwv nyias tus ntoo khaublig nrog tus Tswv mus.
Thov Vajtswv,
Tus Tswv, thov zamtxim rau nyuam yaus vim ntau zaug tsi tau them nqi thaum nrog Koj mus. Thov pab nyuam yaus muaj zog tso tus kheej tseg, txaus siab tiv kev khwv kom tau nrog tus Tswv mus txog hnub kawg. Nyuam yaus tuav Yexus Khetos lub npe thov, Amees.
Peb puas txaus siab tswj siab, tiv kev txomnyem nrog tus Tswv mus lawm tau?
Nyeem Vajluskub hauv peb lub xyoo: Levis Kevcai 18
Kênh Youtube BHKTHN:
