Klei Aê Diê Blŭ: Y-Mathiơ 16:24
Êlan kliăng: “Leh anăn Yêsu hưn kơ phung ƀĭng kna Ñu, “Tơdah sa čô čiăng tui hlue kâo, brei ñu hngah hĕ klei ñu pô čiăng, klam kyâo bi kal ñu pô, leh anăn tui hlue kâo. ” (Y-Mathiơ 16:24)
Klei êmuh ksiêm mĭn: Hŏng hlei pô Khua Yang Yêsu blŭ klei anei? Ya klei Khua Yang čiăng diñu ngă čiăng tui hlue Khua Yang? Si drei dôk tui hlue Khua Yang?
Leh Khua Yang Yêsu bi êdah kơ klei Knap Mñai, klei djiê leh anăn klei Ñu kbiă lŏ hdĭp kơ phung ƀĭng kna, Khua Yang lač hŏng diñu kơ klei bi tui leh anăn ênoh tla čiăng tui hlue Ñu. Tal sa, hlei pô čiăng tui hlue Khua Yang brei “ñu hngah hĕ klei ñu pô čiăng”. Boh blŭ anei amâo djŏ jing bi ktlah pô mơ̆ng hlei pô amâodah ya klei ôh. Mnuih čiăng tui hlue Khua Yang brei hngah kơ djăp klei pô čiăng, klei dưi, klei găl, wăt klei mĭn hjăn pô leh anăn klei hdĭp pô čiăng tui hlue Khua Yang, anei jing klei yuôm bhăn hĭn mơ̆ng klei “hngah hĕ kơ klei ñu pô čiăng”. Tal dua, mnuih čiăng tui hlue Khua Yang brei “klam kyâo bi kal ñu pô”. Kyâo bi kal jing mnơ̆ng pioh pơ̆ng bi mdjiê kjham snăk mơ̆ng phung Rôm kơ phung hlŭn leh anăn dŭm djuê ana diñu kiă kriê. Êngao kơ bruă tŭ klei djiê ƀrư̆ ƀrư̆ hlăm klei ruă knap jih hnơ̆ng, mnuih soh lŏ brei čŏng klam kyâo bi kal pô nao ti anôk bi mdjiê. Khua Yang Yêsu mtô phung čiăng tui hlue Khua Yang brei mđing ai tiê klei mĭn kơ klei ruă knap leh anăn tŭ klei djiê. Anăn jing djiê mnuih hđăp pô čiăng dưi êbat hŏng Khua Yang hŏng mnuih mrâo msĕ si Khua ƀĭng kna Y-Pôl čih leh hlăm Galati 2:20.
Khua Yang Yêsu čiăng kơ phung ƀĭng kna klă sĭt thâo kral Ñu, čang hmăng dưi tui hlue Khua Yang leh anăn ăt srăng tla ênoh čiăng tui hlue Khua Yang msĕ si Khua ƀĭng kna Y-Pêtrôs lač leh hŏng Khua Yang, “Ơ Khua Yang, kơ hlei pô mkăn hmei dưi nao lĕ? Ih yơh mâo klei blŭ kơ klei hdĭp hlŏng lar; leh anăn hmei đăo leh, leh anăn truh leh kơ klei thâo săng kơ ih jing Pô Doh Jăk mơ̆ng Aê Diê” (Y-Yôhan 6:68-69).
Hruê anei, Khua Yang Yêsu ăt čiăng êmuh grăp čô drei klă sĭt čiăng tui hlue Khua Yang mơ̆? Jing drei dôk êpa mhao leh anăn thâo kral hnơ̆ng yuôm bhăn mơ̆ng bruă tui hlue Khua Yang mơ̆? Kyua mâo lu phung đăo ăt dôk tui hlue Khua Yang ƀiădah kƀah klei thâo săng kơ Khua Yang, tui hlue Khua Yang hŏng klei bhiăn gŏ sang… Kyua anăn phung anăn ăt kăn mprăp tŭ klei dleh dlan tui hlue Khua Yang rei. Hŏng phung tui hlue Khua Yang snăn, ya klei dleh dlan amâodah ya klei ktrŏ ăt jing mta phŭn čiăng lui Khua Yang, ƀuah Khua Yang. Ñu amâo čiăng ôh drei tui hlue Khua Yang hlăm boh klei snăn, Khua Yang čiăng êlâo hĭn brei drei jing “ƀĭng kna”, jing đăo kơ Ñu leh anăn srăng hriăm čiăng hriê kơ prŏng hlăm Khua Yang grăp hruê.
Êdei anăn drei srăng lui pô kyua thâo klei hdĭp hlŏng lar yuôm bhăn hĭn hlăm klei hdĭp êjai ară anei. Knhal tuč drei ăt srăng tla ênoh, tŭ klei ruă knap, tŭ djiê mnuih hđăp čiăng tui hlue Khua Yang truh knhal tuč. Năng ai mta phŭn ngă kơ drei ka dưi lui knuih hđăp pô leh anăn srăng tŭ klei dleh dlan čiăng tui hlue Khua Yang kyua drei ka mâo ôh klei mphŭn ngă djŏ hŏng Khua Yang Yêsu. Brei čuăn lui knuih hđăp pô, klam kyâo bi kal pô tui hlue Khua Yang.
Drei srăng lui pô, tŭ klei dleh dlan čiăng tui hlue Khua Yang mơ̆?
Wah lač: Ơ Khua Yang, akâo kơ Ih pap brei kyua lu blư̆ kâo ka tla ênoh čiăng tui hlue Ih. Akâo kơ Ih đru kâo jhŏng lui pô, tŭ klei dleh dlan čiăng tui hlue Khua Yang truh knhal tuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Lêwi 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
