Rôm 13:11-14
“Dôm tơdrong inh bơtho iĕm âu, bơ̆n athei răk pơm kiơ̆ tơpă, yua kơ Kră Yang Yêsu Krist wă jê̆ jur boih; tơdrong noh iĕm kư̆m băt mơ̆n. Tơm hmơm bơ̆n lui sơ̆, năr Yêsu Krist jur oei đunh ‘biơ̆; mă dang ei ưh pă đunh boih. Na bơ̆n athei adrin kral ling lang ‘nĕ pă nŏng kơ tep.” (Rôm 13:11)
Nơ̆r jet tơchĕng pơwao:
– ‘Bok Pôl pơma kiơ gah jơhnơr dang ei?
– Bơngai lui kăl kơ băt tơdrong kiơ đơ̆ng bơ̆n kơdih păng athei pơm kiơ kơplah năr Kră Yang Yêsu wă jê̆ jur bơih?
– Bơ̆n wă tơplih tơdrong kiơ đang kơ bơ̆n hŏk pơhrăm ‘bai ‘năr ‘nâu?
‘Bok Pôl pơma jơhnơr dang ei đei tơplih, nhen thoi bơ̆n iung đơ̆ng tep, ‘nĕ pă nŏng kơ tep, dang ei oei măng mu ưh pă đunh ‘năr gô lĕch. “Tep” păng “kơmăng” pơma kơ jơhnơr măng mu păng tơdrong yoch dang ei oei lăm yang satan pơgơ̆r wă pơtôch lê̆; tơplơ̆ hăm “kral” păng “kơ’năr” noh bơih tơdrong hơdah kơ minh jơhnơr ‘nao plơ̆ng wă truh, pơtơm kơplah năr Kră Yang Yêsu jur Sư khan: “ (trong 11 BTTHĐ). Đơ̆ng năr bơ̆n tơbral păng lui sơng iŏk Kră Yang Yêsu, bơ̆n gơh klaih đơ̆ng Kră Yang dŏng pơklaih lu bơ̆n, mălei bơ̆n ‘bôh dŏng pơklaih tơpă truh năr Kră Yang Yêsu jur dơ̆ng. Rim năr hlôi hloh, bơ̆n rai năm jê̆ ‘bơ̆t anăp Kră Yang.
‘Bok Pôl pơma hơđăl kơ tơdrong tơpăt sĭt: Bơngai lui arih lăm teh đak thoi ling lang tơblah hăm tơdrong yoch. Yua kơplah lui sơng iŏk Kră Yang Yêsu, akâu mă bơ̆n juăt kơ pơm yoch ưh kơ hiong ôh, lei na bơ̆n athei đĭ jơhngơ̆m gơnang kơ Kră Yang, bơ̆n ‘nĕ kơ pă oei lăm măng mu, bơ̆n athei oei tơ hơdah ling lang wă kơ gơh tơblah păng yang kơnê̆ (trong 12). Mă khan Yang Bơhngol ‘Lơ̆ng pơgơ̆r lăm jơhngơ̆m bơ̆n wă bơtho tơ’bôh păng chông anhăk mălei akâu bơ̆n juăt kơ pơm yoch oei đei, răp gô trŏ kơ jơ na wă pơgơ̆r lăm jơhngơ̆m bơ̆n, bơ̆n arih “‘nĕ pă et sik suai hli kơ pơm kư̆ kă; drŏnglo drŏkăn kư̆m ‘nĕ kơ ngôi kư̆ kă; ‘nĕ pơjah pơjăng păng đe, ‘nĕ kơ ‘nhĕng đe” (trong 13 BTTHĐ). Bơ̆n gơh kĕ jei bơ̆n kơdih kơplah pơm ‘lơ̆ng thoi Kră Yang Yêsu Krist sơ̆, wă khan gơh pôm jơhngơ̆m đon hăm Kră Yang, pơm ‘batem noh pơtih thoi bơ̆n lôch, ‘bŭ pôm bong hăm bơngai so mă pơm yoch, păng arih hăm Kră Yang Yêsu hăm akâu ‘nao. Bơ̆n đei tơdrong ‘lơ̆ng păng tơdrong mơsêh Kră Yang wă yak năm lăm tơdrong hơdah.
Kơplah bơ̆n băt năr Kră Yang Yêsu wă jê̆ jur bơih, bơngai lui athei pơm kiơ̆ tơpă” (trong 11), wă khan arih băt lui yom kơ Kră Yang, ‘mêm kơ bôl buăl thoi bơ̆n ‘mêm kơ akâu bơ̆n kơdih kiơ̆ kơ ‘bok Pôl bơtho lăm Rôm 12-13. Arih lui yom noh wă tơbăt kơ minh ‘nu bơngai đei Yang Bơhngol ‘Lơ̆ng oei hơdai, băt bơnê kơ Kră Yang, păng nơ̆r bơtho pran wă ba lu bơngai jum dăr kơ bơ̆n brŏk tơ Kră Yang. Dang ei jơ năr gĭt găl dêh wă kơ bơ̆n pơm kiơ̆ nơ̆r Kră Yang Yêsu tơtă kơ bơ̆n.
Kơkuh kơ Ih Kră Yang! Apinh Ih tơgŭm inh ling lang krăng kơchăng lăm jơ năr dang ei, pơ̆ng kơđinh tơ akâu inh, păng arih ưh pă kiơ̆ kơdih inh, mălei arih kiơ̆ Kră Yang. Apinh Ih tơgŭm ăn kơ inh gơh tơplih rim năr nhen thoi Kră Yang hloh păng yua iŏk jơ năr wă pơm kơdranh ăn kơ lơ bơngai, krao khan yua anăn Kră Yang Yêsu Krist, Amen!
Bơ̆n arih hăm lui yom kơ Kră Yang ưh, pơm kơmĭl ăn kơ lu bơngai tam mă băt kơ Kră Yang wă kơ lu sư brŏk tơ Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 5
Kênh Youtube BHKTHN:
