Luka 10:1-11
Trong tơm: “’Ba lơ ră mă-lei hui bơngai năm kĕch ăn. Thoi noh na bơ̆n athei adrin krao khan apinh tơ’ngla tơm mir wă wơh lơ bơngai năm tơgŭm kĕch.” (Luka 10:2)
Nơ̆r jet tơchĕng pơwao:
- Kră Yang Yêsu wơh lu bơngai pơhrăm păng Sư năm tơyơ?
- Yua kơ liơ Kră Yang pơtih lu sư thoi triu năm tŏk-bŏk khul kŏ so?
- Kră Yang bơtho tơ’bôh ăn kơ lu sư thoi yơ?
- Kră Yang oei krao rim ‘nu bơngai lui bơ̆n dang ei thoi yơ?
‘Nguaih kơ 12 ‘nu jơ̆ng ‘bang mă jê̆ tơ til Kră Yang Yêsu, oei đei 70 ‘nu lu bơngai pơhrăm kiơ̆ Sư, Sư kư̆m wơh năm ‘bar ‘nu, mơ̆t tơ lu pơlei tih, iĕ wă bơtho Tơdrong ‘Nao ‘Lơ̆ng. Kră Yang roi tơbăt kơ lu sư gah mir ‘ba đum noh kăl kơ jah kĕch yuă mă tĕnh mă-lei oei kơ’bah kơ bơngai kĕch yuă. Kră Yang ‘bôh oei lơ dêh bơngai jrok hiong mă-lei ưh kơ đei tôm bơngai wă bơtho gah Dêh Char ‘Bok Kei-Dei pơgơ̆r. Yua kơ tơdrong ‘noh bơih na Kră Yang wơh lu bơngai pơhăm kiơ̆ Sư noh năm tơmir na bơyan ‘ba đum wă kĕch yuă iŏk lơ bơhngol brŏk tơ Kră Yang.
Kră Yang Yêsu pơtih lu bơngai pơhrăm kiơ̆ Sư thoi “Kon triu oei tŏk-bŏk khul kŏ so” (trong 3). Trŏ tơpă thoi noh! Kơplah lu sư năm lăm teh đak âu bơtho gah Dêh Char ‘Bok Kei-Dei pơgơ̆r, sĭt lu sư gô tơ’bơ̆p tơdrong lu ayăt hil areh, pơm kơnê̆. Lu sư kăl kơ ling lang krăng kơchăng păng mă pơ’lơ̆ng, athei “hơgei thoi ‘bih, dim găt thoi sem kơtơp” (Mathiơ 10:16). Dang ei lu bơngai lui athei ‘bôh băt păng mă kơchăng, mă pơ’lơ̆ng kơplah năm ră roi tơdrong Kră Yang. Lu bơ̆n ‘nâu bơngai mă Kră Yang krao wă pơjing ming bơ̆n jing bơngai phara kơ lu bơngai lăm teh đak âu, lu bơ̆n âu kư̆m bơngai mă Kră Yang Yêsu wơh jang kơ Sư, bơtho tơdrong Sư kơ đĭ-đăng adrĕch adrung bơngai jơ̆p kơ teh đak âu.
Kră Yang Yêsu ưh kơ thar wơh lu bơngai pơhrăm kiơ̆ Sư noh năm bơtho ôh, Sư pre hơmet ăn, pơtơ̆p pơjuăt lu sư adrol tôm mah ‘mơ̆i păng tơtă nơ̆r wă kơ kơchăng pơ’lơ̆ng lăm tơdrong lu sư yak năm, Sư bơtho tơ’bôh ăn rim tơdrong rơđah hơđăl thoi âu: Adrol hloh, lu sư ưh kơ kăl chĕp ba tơmam rơkih rơkah, mă-lei wă kơ hmă đĕch. Pơtrơp kơ noh lu sư kăl kơ pơpôi đĭ jơhngơ̆m tơ tơdrong wă bơtho hloh kơ tơchĕng tơtăm kơ trong năm yak (trong 4). Lu sư athei iŏk tơdrong dŏng tơgŭm đơ̆ng bơngai nai dôm lu tơmam kăl yua pơm trong wă pơkeh tơdrong Kră Yang wơh jang, yua kơ “lu bơngai jang trŏ kơ đei apah đêl jang” (trong 5-9). Tuch luch sư, mă khan đe sơngah kuă kơ mơ̆ng nơ̆r lu sư bơtho, jơhngơ̆m lu sư ‘nĕ kơ klai ơh, bơ̆l hăl ‘maih wă kơdŭn tơrŏng. Kră Yang khan tơdah đe kuă kơ sơng iŏk iĕm athei sơpuih ‘bruih đơ̆ng jơ̆ng iĕm na năm tơ anih nai dơ̆ng. Kră Yang băt lê̆ adrol đei lu bơngai kuă kơ mơ̆ng lu sư, păng Kră Yang tŏk-bŏk oei hơmet ăn lu sư adrol wă kơ jơhngơ̆m lu sư kư̆m oei hiôk mơ̆n huay kơ mah sơ’ngon năr lu sư năm bơtho ră roi mă ưh kơ jing noh. ‘Nhŏ kơ Kră Yang Yêsu ră bơih, lăm tơdrong Sư jang, ‘bơ̆t ayơ kơnh đe kư̆m tơwih rŏng kuă kơ kiơ̆ Sư. Đei lu mơ ‘nah sơngah kơ Kră Yang, kuă kơ mơ̆ng Sư, ưh kơ drơ̆ng hăm Sư tơdrong Sư pơma bơtho, lu bơ̆n’nĕ kơ chang wă kơ bơ̆n pha ‘biơ̆ kơ Kră Yang. ‘Bok Pôl bơngai jơ̆ng ‘bang Kră Yang, sư khan thoi âu: “Mă-lei bơ̆n athei chu kơ Sư khŏm khŏm wă kơ bơ̆n gơh pơm đon ‘lơ̆ng. Thoi noh dah bơ̆n huay kơ achăng lê̆ Sư na mưh trŏ kơ năr ‘Bok Kei-Dei pơkă ning-mônh Sư gô ăn kơ bơ̆n tơdrong apah na bơ̆n oei hơdai hăm Sư ling lang. Kư̆m thoi bơ̆n pơtăm găr, dah bơ̆n ưh kơ hŭt lê̆ tơdrong jang bơ̆n, lei trŏ bơyan plei, bơ̆n đei phĕ iŏk tơpă.” (Galati 6:9)
‘Ba đum jơ̆p kơ mir na, mă-lei bơ̆n kĕ yuă ‘nâu lăp tŏ sĕt đĕch. Tơdrong jang Kră Yang pơjao wă kơ bơ̆n pŭ iŏk ‘nâu tơdrong jang anat dêh păng ‘bĕnh kơ tơdrong pơlong pơsuăk pơgăn. Kră Yang oei krao rim ‘nu Bơngai Lui athei pre jơhngơ̆m lăp đon păng pơ̆n nuih yak năm tơ mir na bơyan ‘ba đum. Bơ̆n athei ling-lang băt kơnăl thoi âu: “Dêh Char ‘Bok Kei-Dei wă pơgơ̆r kon bơngai bơih”, bơ̆n băt tơpă thoi noh, wă đei tơdrong pơdrŭt bơ̆n yak năm hlôi đơ̆ng dôm tơdrong pơlong pơsuăk pơgăn adrin năm tơ anăp jao akâu jang kơ mir bơyan kĕch ‘ba.
Bơ̆n mơ̆ng kơtơ̆ng tơdrong bơtho ‘nâu hei, bơ̆n hăm lăp đon jao akâu năm tơ mir Kră Yang ưh?
Kơkuh kơ Ih Ơ Kră Yang, apinh Ih ăn jơhngơ̆m inh nuih lăp đon năm tơ mir ‘ba đum păng jing bơngai kĕch yuă, bơngai jang lăm mir gah bơhngol mă Ih krao inh, jang tơnăp ‘lơ̆ng, Ih huay kơ chrih hil. Krao khan yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: I Samuel 1
Kênh Youtube BHKTHN:
