Pajlug 22:1
Nqe cim:
“Yog koj xaiv yuav lub koob meej zoo lossis kev npluanuj, koj cia li xaiv yuav lub koob meej thiaj li zoo” (Pajlug 22:1)
Peb nyeem ntxiv Phau Txhais Tshiab HMOWSV:
“Tsim nyog xaiv yuav lub koob meej zoo heev dua li xaiv nyiaj txiag ntau, thiab xaiv qhov uas luag saib taus yus zoo dua li tau nyiaj thiab kub.”
Lus nug rau sawvdaws xav:
– Vim licas tau koob meej zoo muaj nqis dua kev npluanuj?
– Vim licas qhov uas luag saib taus yus zoo dua li tau nyiaj thiab kub?
– Lub homphiaj kawg ntawm peb lubneej hauv ntiajteb yog dabtsi?
Nqe Pajlug no siv lo lus “zoo heev dua” los hais txog kev sib piv ntawm ob yam lossis ob tug. Nyob hauv lus Henplais, lo lus “zoo heev dua” muaj lub ntsiab hais tias “tsimnyog ntshaw heev dua”. Yog li ntawd lub koob meej zoo tsimnyog ntshaw tau heev dua kev muaj txiag npluanuj. Qhov tseeb npluanuj yeej tsis txhaum, tsis raug Vajluskub txwv, tiamsis kev npluanuj yog yam tseemceeb tsis heev, nyob tomqab lub koob npe lossis lub koob meej. Thaum ib tug neeg twg muab kev npluanuj, nyiaj txiag saib hlob dua lub koob meej, ces tus neeg ntawd rhuav lawv txojkev sib ntseeg siab nrog lwm tus, ua rau lawv lub koob npe raug qias vim lawv ntshaw kev npluanuj heev dua kev sib raug zoo nrog lwm tus. “Lub koob meej zoo” muaj lub ntsiab hais tias muaj tus cwjpwm zoo yuav ua rau lwm tus paub txog yus. Koob meej zoo yog kev qhia tshwm ntawm txojkev xav thiab kev ua zoo sab hauv. Luag muaj peevxwm nrhiav tau kev npluanuj tsis tas ua neej zoo, tiamsis kev npluanuj tsis ncajncees yuav ua rau muaj kev txajmuag. Tshaj ntawd, khoom nyiaj txiag tsuas yog ibvuag, hnub no muaj taigkis pluag; muab los ua lub plag ntaus nqi rau kev ua neej yeej tsis tau hlo li.
Nyob hauv feem kawg ntawm nqe Pajlug no, lo lus “luag saib taus” muaj lub ntsiab hais tias “txiaj ntsig” kuj “zoo dua li tau nyiaj thiab kub” vim qhia tshwm txojkev hlub, kev nkag siab thiab lub siab dav rau lwm tus, tshwjxeeb yog rau cov neeg pluag. Cov neeg ua li ntawd yog cov uas paub xav txog lwm tus txojkev cheemtsum thiab txaus siab hlo pab lwm tus thaum luag txomnyem. Raws li lawv xav, tej txiaj ntsig ntawd tseemceeb dua nyiaj thiab kub.
Daim duab txog tus pog Tanpithas sau nyob hauv Tes Haujlwm 9:36-39 yog ib tug yamntxwv txog tus neeg muaj koob npe zoo los ntawm nplooj siab hlub, nws tej txiag ntsig tseemceeb dua nyiaj thiab kub. Nws tau ua ntau yam haujlwm zoo thiab muab yam nws muaj pub rau lwm tus. Thaum nws tuag, cov pojntsuam tau hlub tshua, quaj nws thiab muab tej tsoos tsho uas nws xaws rau lawv hnav qhia rau lwm tus.
Nqe Pajlug no ua rau peb xav txog txheej laus lo lus hais: “tsov tuag tseg tawv, neeg tuag tseg meej”. Tus tsov thaum tuag, txawm txha plam nqaij lwj, los tseem tseg tau cev plaub uas muaj nqis heev. Tibneeg txawm tuag lawm, los lub meej zoo thiab meej phem yeej tseem nyob, luag yuav tham txog mus rau ntau tiam. Tus ntseeg Yexus tau tus Tswv yug dua tshiab, peb lub neej yuav tsis nyob ntev hauv lub ntiajteb ibvuag no, tiamsis yuav mus nyob saum Ntuj Ceeb Tsheej ci ntsa iab. Vim li ntawd, yuav tsum saib taus thiab txuag kom yus muaj koob meej zoo. Muaj suab npe zoo tsis yog tsuas ua rau yus tsevneeg, Pawg Ntseeg tau luag qhuas xwb, tseem ua rau tus Tswv tau koobmeej thiab. Peb lub homphiaj kawg thaum ua neej nyob hauv ntiajteb no tsis yog tej khoom nyiaj txiag, tiamsis yog txojsia ibtxhis thiab lubneej qhia tshwm tus Tswv txoj koob hmoov pub rau lwm tus.
Thov Vajtswv,
Tus Tswv, nyuam yaus ua Koj tsaug vim Koj Txojlus qhuab ntuas nyuam yaus txog kev txuag lub koob meej zoo. Thov pab nyuam yaus niaj hnub hwm Koj, zeem paub tias nyiaj txiag tsuas yog cuabyeej, tiamsis txojsia ibtxhis thiaj yog nyuam yaus lub homphiaj ua neej. Thov kom nyuam yaus lubneej ua rau Koj tau ntsejmuag. Nyuam yaus tuav Yexus Khetos lub npe thov, Amees.
Peb pheej saib hlob nyiaj txiag, meejmom lossis lub neej muaj koob npe zoo?
Nyeem Vajluskub hauv peb lub xyoos: II Kevcai 22
Kênh Youtube BHKTHN:
