Klei Aê Diê Blŭ: Klei Bi Hriêng 22:1
Êlan kliăng: “Klei hing ang jăk jing yuôm hĭn kơ lu ngăn drăp, klei arăng khăp hơiêng jing yuôm hĭn kơ prăk leh anăn mah” (Klei Bi Hriêng 22:1).
Klei êmuh ksiêm mĭn: Ya ngă klei hing ang jăk jing yuôm hĭn kơ ngăn drăp? Ya ngă klei arăng khăp hơiêng jing yuôm hĭn kơ prăk leh anăn mah? Klei kñăm čiăng yuôm hĭn kơ klei hdĭp drei ti lăn ala anei ya jing?
Êlan Klei Bi Hriêng anei ya pruê̆ blŭ “jăk hĭn” čiăng bi msĕ plah wah dua mta klei amâodah dua mta mnơ̆ng. Hlăm boh blŭ phŭn klei Hêbrơ, pruê̆ blŭ “jăk hĭn” lŏ mblang jing “năng čiăng mâo hĭn”. Snăn yơh, klei hing ang jăk jing năng čiăng mâo hĭn kơ ngăn drăp, klei sah mdrŏng. Boh jing kơ klei mdrŏng amâo mâo jhat ôh, Klei Aê Diê Blŭ amâo mâo phat kđi ôh, ƀiădah klei mdrŏng jing klei knŏng yuôm ƀơ ƀiă, dôk ti tluôn knuih kơhưm leh anăn klei hing ang. Tơdah sa čô mnuih dưm klei mdrŏng sah, ngăn drăp ti dlông knuih kơhưm, mnuih anăn srăng bi rai klei bi mguôp mâo klei knang, bi čhŏ klei hing ang jăk ñu pô kyuadah klei hdĭp diñu čiăng mâo klei mdrŏng sah hĭn kơ klei bi mguôp hdơ̆ng găp. “Klei hing ang jăk” čiăng lač knuih jăk srăng mâo lu mnuih thâo. Klei hing ang jăk jing klei bi êdah ti êngao kơ klei thâo mĭn leh anăn klei ênuah ênô hlăm lam anak mnuih. Wăt tơdah kƀah klei ênuah ênô, arăng ăt dưi mâo mơh klei mdrŏng sah, ƀiădah klei mdrŏng mâo hŏng klei wê srăng atăt kơ klei hêñ. Êgao hĭn kơ anăn, ngăn dŏ jing dŏ yua mă êjai, hruê anei dôk mgi luč, ngăn dŏ amâo dưi jing atur kơ klei hdĭp ôh.
Kdrêč ăt dôk hlăm êlan Klei Bi Hriêng, boh blŭ “khăp hơiêng” lŏ mblang jing “klei jăk” ăt “yuôm hĭn kơ prăk leh anăn mah” kyuadah bi êdah klei khăp, klei pap, leh anăn klei kmah kơ mnuih mkăn, boh nik nak kơ mnuih ƀun ƀin. Anăn jing phung thâo mĭn kơ klei pô mkăn čiăng leh anăn thâo đru phung dôk hlăm klei knap mñai. Hŏng digơ̆, klei khăp hơiêng jing prŏng hĭn kơ prăk mah.
Klei yăl dliê kơ sa čô mniê anăn gơ̆ H’Tabitha čih hlăm Bruă Phung Khua Ƀĭng Kna 9:36-39 jing sa klei bi hmô kơ sa čô mnuih mâo klei hing ang jăk kơ ai tiê thâo khăp, klei ñu khăp hơiêng jing yuôm hĭn kơ prăk mah. Gơ̆ ngă lu bruă jăk leh anăn brei lu mnơ̆ng pap. Tơdah gơ̆ djiê, jih jang phung mniê djiê ung čŏk hia kơ gơ̆ leh anăn mdah čhiăm ao gơ̆ ngă leh kơ diñu.
Êlan Klei Bi Hriêng anei brei drei lŏ bi mĭn djŏ kơ klei phung ênuk đưm lač: “Êmông djiê lui klĭt, mnuih djiê lui klei hing ang”. Êmông dŭl leh djiê, wăt tơdah kđeh klang brŭ rai ƀiădah klĭt yuôm bhăn ñu ăt dôk. Anak mnuih wăt tơdah djiê leh dưn, ƀiădah klei hing ang jăk amâodah jhat arăng ăt hdơr nanao. Phung đăo kơ Krist mâo leh klei Khua Yang lŏ bi kkiêng mrâo, drei amâo dôk hdĭp nanao ti lăn ala anôk jưh bhiâo anei ôh, ƀiădah srăng hdĭp hlŏng lar hlăm Ƀuôn Jăk guh kơang. Kyuanăn brei drei thâo mpŭ leh anăn djă pioh klei hing ang jăk drei. Mâo klei hing ang jăk amâo djŏ bi hmăi knŏng kơ gŏ sang, kơ Phung Sang Aê Diê ôh, ƀiădah bi hmăi wăt kơ Anăn Khua Yang mơh. Klei kñăm čiăng yuôm hĭn kơ klei hdĭp drei ti lăn ala anei jing amâo djŏ ngăn drăp ôh, ƀiădah jing klei hdĭp hlŏng lar leh anăn klei dôk dơ̆ng ƀơ̆ng huă bi êdah klei khăp Aê Diê kơ jih jang mnuih.
Si ngă drei dlăng yuôm kơ ngăn drăp, klei hing ang hĕ amâodah dlăng yuôm kơ klei khăp hơiêng?
Wah lač: Ơ Khua Yang, kâo lač jăk kơ Ih kyuadah Klei Ih Blŭ mñă kơ kâo djă pioh klei hing ang jăk. Đru kâo huĭ mpŭ kơ Ih nanao, thâo kơ prăk knŏng jing mnơ̆ng pioh yua, ƀiădah klei hdĭp hlŏng lar yơh jing klei kñăm čiăng kơ klei hdĭp kâo. Brei klei hdĭp kâo bi guh kơang kơ Anăn Ih nanao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
