Klei Aê Diê Blŭ: Y-Luk 6:27-36
Êlan kliăng: “Brei diih thâo pap msĕ si Ama diih thâo pap” (Y-Luk 6:36).
Klei êmuh ksiêm mĭn: Ya klei Khua Yang Yêsu mtô leh? Pô hdĭp bi êdah klei thâo pap srăng hưn bi sĭt kơ ya knuih Aê Diê? Si drei ngă čiăng ngă klei Khua Yang mtă?
Trăn Klei Aê Diê Blŭ anei jing klei Khua Yang Yêsu mtô hlăm Klei Mtô Ti Dlông Čư̆. Khua Yang mtô brei drei hdĭp tui si hnơ̆ng čuăn klei kpă ênô Ñu, jing klei kpă ênô amâo djŏ knŏng bi djŏ hŏng klei ênuah ênô amâodah klei kpă sa čô mnuih ôh ƀiădah êlam hĭn jing kbiă mơ̆ng klei khăp leh anăn klei pap Aê Diê. Tinei, Khua Yang Yêsu brei ƀuh klei kpă ênô sĭt amâo dưi bi ktlah ôh hŏng klei thâo pap, wăt kơ phung bi kdơ̆ng hŏng drei. Amâo djŏ drei khăp knŏng kơ mnuih năng khăp ôh, ƀiădah srăng khăp wăt kơ phung roh leh anăn phung ngă jhat kơ drei msĕ mơh (êlan 27-28).
Dưi lač anei jing klei mtă dleh dưi ngă hĭn hlăm hdruôm hră Klei Aê Diê Blŭ. Klei bhiăn mnuih mtrŭt brei drei lŏ bi kdơ̆ng wĭt, amâodah ƀiă êdi brei drei đuĕ kbưi mơ̆ng pô ngă jhat kơ drei. Ƀiădah lĕ, Khua Yang Yêsu mtă brei hdĭp jăk kdlưn hĭn. Ya ngă? Kyuadah anei jing klei Aê Diê ngă leh kơ mnuih, hlăm anăn mâo wăt drei mơh. Ñu ngă jăk amâo djŏ knŏng hjăn kơ phung knang kơ Ñu ôh, ƀiădah wăt kơ phung amâo thâo hdơr knga leh anăn phung ƀai mơh (êlan 35). Khua Yang pô lač leh snei, “Amâo djŏ Kâo hriê iêô phung kpă ôh, ƀiădah phung soh” (Y-Markôs 2:17). Khăp kơ phung roh jing bi êdah klei khăp Ama drei hlăm adiê. Jing Pô klei kpă ênô Ñu bi êdah klă hŏng klei Ñu khăp brei hơăi mang.
Khua Yang Yêsu lač brei drei ngă jăk, hơêč hmưi klei jăk jĭn, wah lač brei kơ phung ngă jhat kơ drei, amâo djŏ kyua drei awăt ôh, ƀiădah jing klei hưn bi sĭt brei ƀuh klei khăp Aê Diê kiă kriê hlăm ai tiê drei. Thâo pap amâo djŏ ngă ngai kơ klei soh ôh, ƀiădah jing ruah klei lŏ wĭt ngă tui si knuih Aê Diê. Amâo djă pioh klei bi roh leh anăn rŭ ênua ôh, ƀiădah srăng pap brei leh anăn ngă jăk.
Khua Yang Yêsu bi mdjŏ klei khăp prŏng anei hŏng klei drei jing snei: “Snăn klei mưn diih srăng jing prŏng, leh anăn diih srăng jing phung anak Pô Ti Dlông Hĭn” (êlan 35). Anei jing knhuah dôk dơ̆ng ƀơ̆ng huă phung anak Khua Yang, jing phung hơô rup Ñu ti lăn ala anei. Ama drei jing Pô jăk, kyuanăn, brei phung anak Ñu jing jăk mơh. Klei kpă ênô Ñu amâo djŏ klei phat kđi hŏng klei amâo thâo pap ôh, ƀiădah jing klei khăp duah klei lŏ bi kơrŭ. Tơdah bi êdah klei thâo pap leh anăn klei khăp kơ phung roh, klei anăn hưn bi sĭt kơ drei mâo leh klei Khua Yang bi mlih mơ̆ng lam truh ti êngao.
Jih jang klei mtô anei amâo ênưih ngă ôh, brei drei knang kơ Yang Mngăt Jăk grăp hruê, lui hĕ klei bi roh leh anăn đăo kơ Aê Diê Pô kpă ênô. Msĕ si Aê Diê pap brei leh kơ drei snăn mơh brei drei pap brei kơ mnuih mkăn (êlan 36). Klei thâo pap kơ mnuih mkăn srăng bi êdah klă klei khăp leh anăn klei kpă ênô Aê Diê ti krah lăn ala bŏ hŏng klei wê anei.
Drei bi êdah klei khăp kơ mnuih mkăn msĕ si Khua Yang mtă leh mơ̆?
Wah lač: Ơ Khua Yang, lač jăk kơ Ih kyuadah Ih pap mñai leh kơ kâo. Đru kâo thâo khăp kơ pô mkăn msĕ msĕ mơh leh anăn khăp kơ digơ̆ msĕ si Ih khăp leh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 47
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
