Luka 6:27-36
“Iĕm athei ‘mêm mơnat kơ đe kư̆m thoi lĕ ‘Bă bơ̆n ‘Bok Kei-Dei ‘mêm mơnat kơ đe mơ̆n.”
(Luka 6:36)
Nơ̆r jet tơchĕng pơwao:
– Kră Yang Yêsu đei bơtho tơdrong kiơ?
– Bơngai arih tơ’bôh jơhngơ̆m ‘mêm mơnat gô pơsĭt tơ’bôh tơdrong ayơ gah Kră Yang?
– Pơm thoi yơ wă kơ lu bơ̆n pơm kiơ̆ nơ̆r Kră Yang bơtho?
Chăl lăm Sơ̆p hla bơar ‘Bok Kei-Dei ‘nâu tơdrong Kră Yang Yêsu bơtho đe tơ kơpal kông. Kră Yang krao lu bơ̆n arih kiơ̆ tơdrong hơgăt ‘lơ̆ng tơpăt Kră Yang, jơ̆ tơdrong tơpăt ưh kơ sĭ pơma ‘bơm gah tơdrong arih ‘lơ̆ng tơpăt kơdih đĕch ôh dah kiơ̆ tơdrong tơpăt mălei noh lĕch đơ̆ng tơdrong ‘mêm păng mơnat đơ̆ng ‘Bok Kei-Dei. Lăm âu, Kră Yang Yêsu tơbăt tơdrong tơpăt tơpă ưh kơ gơh klah đơ̆ng ‘mêm mơnat, mă lăm lu bơngai ayăt kơ bơ̆n, lu bơ̆n ưh kơ trŏ ‘mêm kơ lu bơngai mă bơ̆n trŏ kơ ‘mêm, mălei ‘mêm kơ lu bơngai pơm kơnê̆ kơ bơ̆n (trong 27-28).
‘Nâu bơih tơdrong bơtho kơ anat kơ wă pơm kiơ̆ lăm nơ̆r Kră Yang. Lăm kon bơngai bơ̆n athei pơm tơwih, dah tŏ sĕt sư athei weh ataih đơ̆ng lu bơngai pơm kơnê̆ kơ bơ̆n, mă khan lei ră, Kră Yang Yêsu krao lu bơ̆n athei arih pơm ‘lơ̆ng ‘biơ̆ yua kơ kiơ? Yua kơ ‘nâu bơih tơdrong ‘Bok Kei-Dei đêl pơm hăm kon bơngai bơ̆n, lăm noh đei lu bơ̆n. Sư ưh kơ sĭ tơ’bôh jơhngơ̆m iơ̆m dim hăm lu bơngai lui gơnang kơ Sư đĕch mălei hăm lu bơngai pơm kơnê̆ păng lu bơngai mă ưh kơ băt bơnê kơ Sư mơ̆ (trong 35).
Tơ’ngla Kră Yang khan: “Yêsu kơtơ̆ng hloi lu sư pơma thoi noh, na Sư khan kơ lu ‘bok thây ei: “Lu bơngai liĕm akâu ưh kơ kăl kơ ‘bok pơgang ôh, pôm lu bơngai jĭ-jăn đĕch kăl kơ ‘bok pơgang. Inh năm tơ âu ưh kơ sĭ chă wơ̆n lu bơngai ‘lơ̆ng ôh. Inh năm tơ âu wă wơ̆n chă lu bơngai yoch wă kơ sư tơbral kơdih tơdrong yoch sư.” (Markôs 2:17). ‘Mêm mơnat kơ lu bơngai ayăt kơ bơ̆n noh tơplơ̆ hăm jơhngơ̆m ‘Bă tơ kơpal plĕnh, ‘Bok mă ‘lơ̆ng tơpăt Sư đei tơ’bôh rơđah hơđăl hloh đơ̆ng tơdrong ‘mêm ăn đĕch kơ bơ̆n.
Kră Yang Yêsu bơtho athei pơm ‘lơ̆ng, hơkat pŭn hiôk, păng krao khan tơgŭm kơ lu bơngai pơm kơnê̆ kơ bơ̆n, ưh kơ sĭ bơ̆n rơdu dêh. Mălei wă pơsĭt tơ’bôh tơdrong ‘mêm ‘Bok Kei-Dei pơgơ̆r lăm jơhngơ̆m lu bơ̆n. Tơdrong ‘mêm mơnat ưh kơ trŏ khan bơ̆n pơmơ̆ng tơdrong kơnê̆ mălei noh lĕch đơ̆ng lăm Kră Yang, ưh kơ bơwei tơdrong blĕk ơh păng pơm plơ̆ mălei athei ‘mêm mơnat dih băl păng pơm ‘lơ̆ng.
Kră Yang Yêsu tơguăt tơdrong ‘mêm tih âu, hăm tơdrong jang lu bơ̆n: “Thoi noh na iĕm athei ‘mêm, pơm ‘lơ̆ng kơ lu bơngai mă pơm kơnê̆ kơ iĕm. Iĕm athei ăn kơ đe mơng jên iĕm păng ‘nĕ pă hơmĕng kơ jên noh. Tơ̆ng iĕm pơm thoi noh, ‘Bok Kei-Dei gô apah iĕm tih tơpă păng iĕm jing kon Kră Yang Tih Hloh, yua kơ Sư kư̆m pơm ‘lơ̆ng kơ lu bơngai kơnê̆ păng lu bơngai mă ưh kơ băt bơnê kơ Sư mơ̆n.” (trong 35). ‘Nâu bơih tơdrong arih lu kon Kră Yang, lu bơngai hrŭk iŏk rup Kră Yang tơ ala teh âu, ‘Bă lu bơ̆n jơ̆ tơ’ngla iơ̆m dim. Đơ̆ng noh, kon pơlei Kră Yang kư̆m athei iơ̆m dim. Tơdrong tơpăt Kră Yang ưh kơ trŏ sek tơlang kư̆ kă mălei tơdrong ‘mêm ‘lơ̆ng rơgoh chơ chă tơdrong hơmet ming. Kơplah tơ’bôh jơhngơ̆m ‘mêm mơnat păng tơdrong ‘mêm hăm lu bơngai ayăt kơ bơ̆n, wă pơsĭt lu bơ̆n đei Kră Yang tơplih đơ̆ng lăm jơhngơ̆m truh gah ‘nguaih.
Lu nơ̆r bơtho âu ưh kơ ‘bônh ôh wă pơm kiơ̆. Lu bơ̆n athei lui gơnang kơ Yang Bơhngol ‘Lơ̆ng rim năr, hŭt lê̆ tơdrong ơh blĕk păng lui gơnang kơ ‘Bok Kei-Dei ‘lơ̆ng tơpăt. Lu bơ̆n âu bơih Kră Yang ‘mêm mơnat thoi yơ na lu bơ̆n kư̆m dai ‘mêm mơnat kơ bơngai nai thoi noh mơ̆n (trong 36). Tơdrong ‘mêm đei pơm tơ’bôh păng tơdrong tơpăt Kră Yang lăm teh đak mă ưh kơ ‘lơ̆ng âu.
Ơ Kră Yang, inh bơnê kơ Ih đei ‘blŏk mơnat kơ inh. Apinh Ih tơgŭm inh kư̆m băt ‘mêm mơnat kơ bơngai nai păng ‘mêm kơ lu sư thoi Ih đei ‘mêm, krao khan yua anăn Kră Yang Yêsu Krist, Amen.
Lu bơ̆n hăm pơm tơ’bôh jơhngơ̆m ‘mêm mơnat hăm bơngai nai thoi nơ̆r Kră Yang bơtho ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 47
Kênh Youtube BHKTHN:
