Klei Aê Diê Blŭ: Klei Kbiă 31:1-11.
Êlan kliăng: “Kâo dưi ngă jih jang klei hlăm Krist, Pô bi ktang kâo.” (Philip 4:13).
Klei êmuh ksiêm mĭn: Si Aê Diê iêô mnuih đru mkra mjing Sang čhiăm? Si bruă diñu ngă? Ya klei thâo čiăng kơ diñu bi leh bruă Aê Diê jao? Si klei hriăm anei mđĭ ai drei ngă bruă hŏng klei Aê Diê iêô?
Êlâo hĭn, Aê Diê iêô klă anăn phung srăng mkra mnơ̆ng dhơ̆ng yua hlăm Sang čhiăm, anăn jing “Y-Bêsalel anak êkei Y-Uri, čô Y-Hur, mơ̆ng găp djuê Yuđa”. Tal dua, Ñu brei kơ Y-Bêsalel bŏ hŏng Mngăt Myang Aê Diê, hŏng klei knhâo, klei thâo săng, klei thâo mĭn, leh anăn klei mbruă hlăm jih jang bruă ngă. Tal tlâo, Ñu mbha bruă klă mngač, Y-Bêsalel mčeh mnơ̆ng, ngă bruă hŏng mah, prăk, leh anăn kông, ktur kač boh tâo pioh tang, ngă bruă krah kyâo. Knhal tuč, Aê Diê brei kơ Y-Bêsalel sa čô pô đru Y-Ôhôliap anak êkei Y-Ahisamak mơ̆ng găp djuê Dan. Aê Diê ăt brei kơ Y-Ôhôliap leh anăn grăp čô mbruă čiăng bi leh bruă dưi jao.
Phung thâo mbruă anei srăng hrăm mbĭt mkŏ mjing sang čhiăm klei bi kƀĭn, hip klei bi mguôp, kđhăp klei pap brei dôk ti dlông ñu, leh anăn jih jang mnơ̆ng yua kơ sang čhiăm, wăt čhiăm ao doh jăk khua ngă yang Y-Arôn leh anăn čhiăm ao phung anak êkei ñu, êa ƀâo mngưi pioh trôč, leh anăn mnơ̆ng ƀâo mngưi pioh kơ adŭ doh jăk (êlan 7-11a). Mơ̆ng bruă ksiêm yap bruă diñu ngă, drei ƀuh hnơ̆ng bruă diñu mă lu leh anăn dleh snăk, ƀiădah Aê Diê ăt brei klei thâo kơ diñu bi leh bruă klam Aê Diê jao, anăn jing hlue ngă djăp klei Aê Diê mtô (êlan 11b).
Sĭt Aê Diê iêô drei hlăm ya mta bruă kơ Ñu, Ñu srăng iêô klă anăp, hŏng klei anei amâodah klei mkăn Aê Diê srăng bi êdah kơ drei thâo klei Ñu iêô drei. Aê Diê ăt srăng brei Yang Mngăt Jăk mtrang mngač, brei klei thâo, klei thâo mĭn, klei thâo săng, klei thâo mbruă leh anăn wăt phung hrăm mbĭt čiăng kơ drei bi leh dŭm bruă klă klơ̆ng Aê Diê jao. Amâo djŏ hơaĭ mang ôh grăp čô drei mâo hlăm gŏ sang pô leh anăn hlăm Sang Aê Diê, Ñu ăt brei kơ drei klei thâo mdê mdê hŏng dŭm klei găl čiăng hriăm mjuăt. Truh wưng Aê Diê iêô, năng ai drei srăng dưi ruah ngă bruă msĕ arăng amâodah bruă dleh dlan mdê hjăn, hlăm gŏ sang amâodah ngă bruă hlăm Sang Aê Diê, brei drei ăt jih ai tiê gưt asăp, amâo guôn ngă hlue si klei pô čiăng. Bruă mă ktrŏ hdjul hŏng drei ƀiădah brei êđăp ênang ai tiê kyua Aê Diê brei nanao kơ drei klei thâo leh anăn phung kăp đru tŭ dưn. Bruă klam grăp čô drei jing sĭt suôr ngă djŏ djăp klei Aê Diê ktrâo lač, klă sĭt drei srăng bi leh djăp bruă Aê Diê jao.
Drei mdih, thâo mbruă čiăng thâo klei Aê Diê iêô leh mơ̆ amâodah ka?
Wah lač: Ơ Khua Yang, kâo bi mni lač jăk kơ Ih brei kơ kâo klei găl thâo kral Aê Diê leh anăn mâo Ih yua! Bi mni kơ Ih kơ klei pap, klei găl dưi hriăm mjuăt, phung hrăm mbĭt mă bruă leh anăn dŭm mta bruă Aê Diê brei! Akâo kơ Ih đru kâo khăp kơ Aê Diê, sĭt suôr, leh anăn kreh kriăng mă bruă pô hlue si klei Aê Diê ktrâo.
Dlăng Klei Aê Diê Blŭ hlăm tlâo thŭn: Klei Bi Hriêng 2:1-22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
