Khiavdim 31:1-11
Nqe cim:
“Vim Yexus Khetos txhawb kuv lub zog, kuv thiaj tiv taus txhua tsav yam huv tibsi” (Filipis 4:13).
Lus nug rau sawvdaws xav:
- Tus Tswv xaiv neeg los ua haujlwm hauv lub Tsevntaub licas?
- Lawv tes haujlwm yog dabtsi?
- Lub tswvyim pab kom lawv ua tiav tes haujlwm yog dabtsi?
- Zaj kawm no txhawb peb lub zog licas thaum tau tus Tswv nqua hu?
Qhov xubthawj, tus Tswv xaiv tim npe cov neeg uas yuav los ua tej cuabyeej siv hauv lub Tsevntaub, ntawd yog “Hules tus xeebntxwv uas yog Aulis tus tub Npexalees uas yog xeem Yudas”. Tim ob, Nws pub rau Npexalees puv npo Vajtswv tus ntsujplig, kev totaub, kev txawj paub thiab muaj peevxwm ua tau haujlwm txhua yam. Tim peb, tus Tswv taw meej haujlwm, Npexalees tes haujlwm yog txua qauv thiab nchuav kub, nchuav nyiaj, nchuav tooj, dhos saw, txaug ntoo. Qhov kawg, tus Tswv xaiv ib tug los pab Npexalees ua haujlwm, ntawd yog yog Auhauli-as uas yog xeem Das. Tus Tswv kuj pub rau Auhauli-as thiab lwm tus muaj tswvyim thiab peevxwm ua tau txhua yam uas tus Tswv txib kom lawv ua.
Lawv sawvdaws yuav los koom tes ua lub Tsevntaub, lub Phijxab, lub hau Phijxab, tej cuabyeej siv hauv lub Tsevntaub, cov tsho ntev uas Aloos thiab nws cov tub hnav thaum ua haujlwm, cov roj txhawb meejthawj thiab cov hmoov tshuaj tsw qab hauv Chav Dawbhuv kawg nkaus (nqe 7-11a). Saib tej haujlwm kos tseg saud, peb pom hais tias lawv tej haujlwm muaj ntau thiab ua khwv heev, tiamsis tus Tswv yeej pub tswvyim kom lawv ua tiav tes haujlwm Nws txib kom lawv ua, ntawd yog ua txhua yam raws li Nws qhia (nqe 11b).
Thaum tus Tswv nqua hu peb los ua ib tes haujlwm twg rau tus Tswv, ces Nws nqua hu tim ntsej tim muag, lossis siv yam ub yam no los qhia hais tias Nws nqua hu peb. Tus Tswv yuav pub Vaj Ntsujplig los qhia, pub dag zog, tswvyim, kev totaub, peevxwm thiab xaiv lwm tus los nrog peb ua tiav tes haujlwm uas Nws cob rau peb lawm. Peb kev tshwmsim los ua neej hauv tsevneeg thiab hauv Pawg Ntseeg tsis yog raws txoj hmoo. Ntawd yog Vajtswv cia peb nyias los nyob muaj nyias peevxwm thiab koobhmoov nrog rau lub sijhawm kawm xyaum. Txog sijhawm tus Tswv nqua hu, tej zaum peb yuav tau xaiv los ua tej haujlwm yoojyim lossis tej haujlwm khwv tshwjxeeb, ua haujlwm rau tsevneeg lossis ua hauv tus Tswv lub tsev; peb yuav tsum mloog tus Tswv lus, tsis txhob ua raws peb siabnyiam. Tej zaum tej haujlwm ntawd hnav heev rau peb, tiamsis cia li zoo siab vim Nws yuav pub rau peb muaj txaus peevxwm, tswvyim thiab muaj tus los pab peb ua tiav haujlwm. Yam uas peb yuav tsum ua, yog ncaj ncees ua raws li txhua yam tus Tswv tau qhia, thaum kawg peb yeej yuav ua tiav tes haujlwm tus Tswv muab cob rau peb.
Peb puas zov tos thiab zeem paub tus Tswv kev nqua hu peb los ua Nws haujlwm lawm tau?
Tus Tswv, ua tsaug vim Koj pub rau nyuam yaus paub Koj thiab tau siv ua Koj haujlwm! Ua tsaug uas Koj pub nyuam yaus tau koobhmoov, muaj sijhawm kawm xyaum, muaj tej phoojywg nrog ua Koj tes haujlwm! Thov pab nyuam yaus paub hlub Koj, ncaj ncees, thiab ua tiav tes haujlwm koj muab cob raws nraim li Koj taw qhia. Amees.
Nyeem Vajluskub hauv peb lub xyoos: Pajlug 2
Kênh Youtube BHKTHN:
