Klei Aê Diê Blŭ: II Kôrantô 12:11-18
Êlan kliăng:“Nĕ anei jing tal tlâo kâo mkra nao kơ diih. Leh anăn kâo amâo srăng bi ktrŏ diih ôh, kyuadah kâo amâo duah dŏ dô diih ôh, ƀiădah diih pô” (II Kôrantô 12:14a)
Klei êmuh ksiêm mĭn: Khua ƀĭng kna Y‑Pôl lač kơ ya klei bi knăl kơ ñu jing khua ƀĭng kna? Ya klei ñu duah hlăm phung đăo ti Sang Aê Diê Kôrantô? Ya klei diih čang hmăng tui duah hlăm êpul biăp Aê Diê jao kơ pô?
Khua ƀĭng kna Y‑Pôl jhŏng hưn kơ phung đăo Kôrantô klei bi knăl kơ klei ñu jing khua ƀĭng kna jing klei diñu tuôm ƀuh leh, anăn jing “…klei gĭr, hŏng klei bi knăl, klei yuôm bhăn, leh anăn bruă myang” (êlan 12). Sang Aê Diê Kôrantô ñu mkŏ mjing leh anăn mâo leh lu bruă myang tinei, kyua anăn ñu lač leh ñu “…amâo jing điêt hĭn kơ phung khua ƀĭng kna prŏng hĭn anăn ôh, wăt tơdah kâo jing hơăi mang dưn” (êlan 11). Khădah snăn, klei mdê hŏng “phung khua ƀĭng kna prŏng hĭn” mkăn, anăn jing phung khua ƀĭng kna soh dôk hruê mlam mplư phung đăo ti Kôrantô, bi ñu “…amâo tuôm bi ktrŏ diih ôh” (êlan 13).
Wăt tơdah anei jing gưl tal tlâo ñu gĭr nao mbĭt hŏng phung đăo ti Kôrantô čiăng mtô, mđĭ ai klei đăo diñu, ñu ăt bi mklă sa blư̆ dơ̆ng “… amâo srăng bi ktrŏ diih ôh” (êlan 14). Leh anăn anei ăt jing klei “amâo kpă ênô” Khua ƀĭng kna Y‑Pôl lač leh hlăm êlan 13. Kyuadah, hlue si klei kpă ênô Khua Yang Yêsu mtô snăn phung mă bruă năng kơ klei mưn (Y‑Luk 10:7), leh anăn “…phung hưn klei mrâo mrang jăk srăng hdĭp mơ̆ng klei mrâo mrang jăk”(I Kôrantô 9:14), kyua anăn tơdah Khua ƀĭng kna Y‑Pôl mă klei đru kơ prăk kăk mơ̆ng Sang Aê Diê Kôrantô ăt jing klei năng djŏ mơh. Ƀiădah Khua ƀĭng kna Y‑Pôl hngah kơ klei dưi anei kyua êlâo hĭn ñu amâo čiăng ba klei ktrŏ kơ digơ̆ ôh, leh anăn klei yuôm bhăn hĭn jing ñu amâo čiăng duah prăk kăk ayŏng adei ôh ƀiădah tui duah ayŏng adei, phung đăo Sang Aê Diê Kôrantô, čiăng ƀuh klei hdĭp mngăt diñu hriê kơ prŏng. Ñu mă bruă kơ phung đăo ti Kôrantô hlăm ai tiê sa čô ama hlăm mngăt săn asei čiăng mgơ̆ng pioh ngăn drăp hlăm klei hdĭp mngăt kơ anak pô. Boh nik ai tiê amâo djŏ knŏng mâo hlăm ai tiê Y‑Pôl ôh ƀiădah lŏ mâo hlăm ai tiê Y‑Tit (êlan 18).
Grăp čô drei jing phung dĭng buăl dôk răng biăp Aê Diê jao. Wăt tơdah êpul biăp lu msĕ si Sang Aê Diê amâodah êpul biăp điêt msĕ si dŭm êpul, phung hriăm Klei Aê Diê Blŭ aguah knăm kjuh, amâodah êpul biăp jing gŏ sang pô… snăn klei drei tui duah amâo djŏ ôh jing kơhưm kơ pô, klei dưi, klei tŭ kơ pô ƀiădah klei yuôm bhăn hĭn mơ̆ng sa čô dĭng buăl Aê Diê jing “tui duah ayŏng adei pô”, srăng săn asei “kyua mngăt ayŏng adei”. Tơdah drei jing sa čô dĭng buăl jăk leh anăn sĭt suôr kơ Aê Diê snăn Ñu srăng brei kơ drei klei pah mni prŏng snăk (Y‑Mathiơ 25:21).
Drei jih ai tiê čiăng jing sa čô dĭng buăl jăk sĭt suôr kơ Aê Diê mơ̆?
Wah lač: Ơ Aê Diê! Akâo kơ Ih đru kâo jing nanao sa čô dĭng buăl jăk sĭt suôr mă bruă Aê Diê hŏng ai tiê amâo tui duah klei tŭ dưn kơ pô, klei hing ang kơ pô ôh ƀiădah săn asei tui duah klei tŭ dưn kơ êpul biăp Aê Diê jao.
Dlăng Klei Aê Diê Blŭ hlăm tlâo thŭn: Y‑Yôhan 8:30-59
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
