II Kauleethaus 12:11-18
Nqe cim:
“Zaum no yog zaum peb uas kuv twb yuav tuaj xyuas nej. Kuv yuav tsis thov nej ib yam dabtsi li. Kuv xav tuaj xyuas nej xwb tsis yog kuv yuav tuaj thov nej nyiaj” (II Kauleethaus 12:14a).
Lus nug rau sawvdaws xav:
– Timthawj Paulus hais tawm tej timkhawv twg txog nws lub meejmom Timthawj?
– Nws nrhiav yam dabtsi ntawm cov ntseeg hauv Kauleethaus?
– Koj ntshaw nrhiav yam dabtsi hauv pab yaj tus Tswv muab cob rau koj?
Timthawj Paulus qhia meej rau cov ntseeg hauv Kauleethaus txog tej povthawj rau nws lub meejmom Timthawj, ntawd yog yam uas lawv twb pom lawm. Nws hais tias: “…kuv ua siab ntev ua haujlwm, ua tej txujci loj thiab tseemceeb” (nqe 12). Pawg Ntseeg Kauleethaus yog Timthawj Paulus ua tus txhim tsa thiab muaj ntau zaj txujci tshwmsim nyob hauv, vim li ntawd Timthawj Paulus thiaj hais tias, “…kuv yeej tsimtxiaj ib yam li cov neeg uas nej hu hais tias nej cov ‘timthawj’” (nqe 11). Tiamsis, nws muaj yam txawv cov “timthawj loj” ntawd, lawv yog cov xibhwb cuav uas niaj hnub dag ntxias cov ntseeg hauv Kauleethaus, tiamsis nws “…tsis ua lub nra hnyav” rau lawv (nqe 13 – PTT).
Txawm yog zaum no twb yog zaum tib peb uas Timthawj Paulus ua siab ntev tuaj cuag cov ntseeg hauv Kauleethaus qhuab ntuas, txhim kho sab ntsujplig rau lawv, los nws yeej hais meej ib zaug ntxiv hais tias, nws “…yuav tsis ua lub nra hnyav” rau lawv (nqe 14 – PTT). Thiab ntawm no kuj yog yam “tsis ncajncees” uas Timthawj Paulus hais hauv nqe 13. Vim hais tias, raws li txojcai ncaj ncees uas Tus Tswv Yexus qhia ces tus ua haujlwm tsimnyog tau nqi zog (Lukas 10:7), thiab “…tsimnyog cov neeg uas ntseeg txojmoo zoo yuav tsum yug cov uas tuaj qhia txojmoo zoo” (I Kauleethaus 9:14), yog li ntawd qhov uas Timthawj Paulus txais tau kev pab nyiaj txiag ntawm Pawg Ntseeg Kauleethaus kuj yog yam uas tsimnyog xwb. Tiamsis Timthawj Paulus tsis xav txais yuav qhov pab ntawd, vim nws tsis xav ua lub nra hnyav rau lawv, thiab qhov tseemceeb yog nws tsis xav tuaj nrhiav lawv tej nyiaj txiag tiamsis nws xav tuaj saib lawv, kom pom txog lawv lub neej loj hlob sab ntsujplig. Timthawj Paulus ua haujlwm rau tus Tswv cov menyuam hauv Kauleethaus zoo ib yam li leej txiv sab ntsujplig yeem poob txhua yam kom tseg tau tej khoom sab ntsujplig rau tej menyuam. Qhov tshwjxeeb, tej no tsis yog tsuas muaj nyob hauv Timthawj Paulus xwb, tseem muaj nyob hauv Titus thiab (nqe 18).
Peb txhua tus puavleej yog cov tub txib saib pab yaj uas Vajtswv muab rau peb. Txawm yog pab yaj loj li Pawg Ntseeg lossis pab yaj me zoo li ib pab neeg tsawg ntawm kawm hnub kaj thiab hauv peb lub cuabyig,… los yam uas peb nrhiav tsis yog nrhiav kom tus kheej tau meejmom, tau yam zoo, tiamsis qhov tseemceeb tshajplaws ntawm ib tug tub txib yog xav kom sawvdaws ntseeg tseeb, txaus siab hlo poob txhua yam vim hlub cov ntseeg. Thaum peb ua tau ib tug tub txib uas zoo thiab ncaj ncees ces tus Tswv yuav muab nqi zog loj kawg li rau peb (Mathais 25:21).
Thov Vajtswv
Vajtswv! Thov pab kom nyuam yaus ua tau ib tug tubtxib zoo, ncaj ncees hauv kev ua Koj tes haujlwm, los ntawm nplooj siab tsis ntshaw nrhiav yam zoo rau tus kheej tiamsis xub nrhiav ua txhua yam zoo rau pab yaj uas Koj muab cob. Amees.
Peb puas tau txiav txim siab yuav ua tus tub txib zoo thiab ncaj ncees rau tus Tswv lawm tau?
Nyeem Vajluskub hauv peb lub xyoos: Yauhas 8:30-59
Kênh Youtube BHKTHN:
https://www.youtube.com/c/bhkthn
Nyeem Vajluskub hauv peb lub xyoos: Yauhas 7:1-44
