Êphêsô 2:8-10
Klei Aê Diê Blŭ: Êphêsô 2:8-10
Êlan kliăng: “Kyuadah drei jing bruă Ñu, Ñu hrih leh hlăm Krist Yêsu pioh kơ bruă jăk Aê Diê mkra leh mơ̆ng êlâo, čiăng brei drei tui ngă” (Êphêsô 2:10).
Klei êmuh ksiêm mĭn: Si klei mdê hră Êphêsô 2:8-9 mtô kơ klei bi mtlaih mơ̆ng Krist, hŏng klei đăo mkăn? Hlăm hră Rôm 4:9-10, khua ƀĭng kna Y-Pôl brei thâo, kyua hŏng mơ̆ng ya klei Y-Abraham dưi mâo klei Aê Diê yap ñu kpă? Ya klei kñăm kơ phung đăo hrih leh hlăm Khua Yang Yêsu? Si bruă jăk Khua Yang Yêsu mtô brei ngă? Si bruă jăk drei ngă, leh mâo klei bi mtlaih?
Păt čiăng jih jang klei đăo mkăn mtô kơ phung ƀĭng kna diñu brei mđăo mjuăt asei pô mkăm pioh bruă jăk, ngă klei jăk weh đuê̆ mơ̆ng klei ƀai, čiăng dưi mâo klei bi mtlaih. Ƀiădah mta čuăn sĭt, anak mnuih amâo dưi jing klă kluôm ôh, si dưi ngă djăp ênŭm bruă jăk čiăng dưi truh tơl hnơ̆ng čuăn mơ̆ng Pô Doh Jăk ti dlông hĭn? Hră Êphêsô 2:8-9 mtô kơ klei bi mtlaih hlăm Krist mdê kluôm dhuôm hŏng klei đăo mkăn, anăn yơh jing “Kyuadah hŏng klei pap, hŏng klei đăo yơh diih tlaih leh”. Klei bi mtlaih jing “klei thiê brei”, jing mnơ̆ng brei mơ̆ng Aê Diê, drei knŏng mă tŭ hŏng klei đăo đuč, kluôm dhuôm amâo mâo kdrêč mơ̆ng bruă jăk mnuih ngă ôh. Hlăm hdruôm hră Rôm 4:9-10, khua ƀĭng kna Y-Pôl brei thâo, Y-Abraham mâo klei yap kpă mơ̆ng Aê Diê brei, êlâo kơ ñu tŭ klei khăt klĭt tui si klei bhiăn. Snăn yơh, ñu mâo klei yap kpă hŏng klei đăo amâo djŏ hŏng bruă ngă ôh.
Ƀiădah, amâo djŏ ôh tơdah mâo leh klei bi mtlaih hŏng klei đăo jing drei dưi mâo yơh “hră mkăp mgang” kơ klei hdĭp ênuk êdei, snăn amâo lŏ mđing uêñ kơ klei dôk hdĭp tui si Klei Aê Diê Blŭ mtô lač ôh. Klei mtô lač hlăm hdruôm hră Êphêsô 2:10 brei thâo, phung đăo jing bruă Aê Diê hrih leh hlăm Khua Yang Yêsu kñăm pioh kơ bruă jăk, mâo klei čiăng đru arăng sĭt, khădah amâo djŏ bruă čuăn kơ pô dưn. Hlăm hră čih phŭn klei Grek, boh blŭ “bruă jăk” hlăm hră Êphêsô 2:10 leh anăn boh blŭ “êmhač” hlăm hră Galati 5:22 jing msĕ sa boh blŭ agathōsunē. Phung đăo mâo klei bi mtlaih kyuadah klei pap Aê Diê brei, pioh kơ bruă jăk, leh anăn kyuadah “bruă jăk” amâodah “êmhač” jing sa hlăm duapăn knuih mơ̆ng Yang Mngăt Jăk snăn klei hdĭp phung đăo kơ Aê Diê brei bŏ hŏng Yang Mngăt Jăk čiăng dưi ngă bruă jăk Aê Diê mprăp mkra leh mơ̆ng êlâo.
Khua Yang ăt mtô lač mơh kơ bruă jăk phung đăo, “Diih jing klei mngač kơ lăn ala… Msĕ mơh brei klei mngač diih mtrang ti anăp mnuih, čiăng kơ diñu dưi ƀuh bruă jăk diih ngă leh anăn diñu mpŭ mni kơ Ama diih hlăm adiê.”” (Y-Mathiơ 5:14-16). Mđrĭng mbĭt, Ñu ăt mtô mtă mơh kơ drei đăm ôh myưng mơang kơ bruă jăk pô ngă pioh bi mđĭ pô dê msĕ si phung Pharisi, ƀiădah čiăng mpŭ mni kơ Anăn Ama, tơdah ngă snăn amâo srăng dưi mă tŭ klei mưn mơ̆ng Ñu ôh (Y-Mathiơ 6:1-4). Drei gĭr ngă bruă jăk amâo djŏ ôh čiăng mâo klei bi mtlaih, ƀiădah kyuadah hŏng klei pap drei mâo leh klei bi mtlaih hŏng klei drei đăo, snăn brei drei ngă bruă jăk čiăng kơ lu mnuih dưi ƀuh leh anăn mpŭ mni kơ Aê Diê.
Si ngă dơ̆ng mơ̆ng hlăk mă tŭ Khua Yang jing Pô Bi Mtlaih, klei blŭ leh anăn klei dôk dơ̆ng ƀơ̆ng huă drei bi êdah mơ̆ mnâo ƀâo mngưi bruă jăk drei kơ arăng ƀuh leh anăn mpŭ mni kơ Aê Diê?
Ơ Khua Yang, bi mni kơ Ih kyuadah klei pap Ih kâo dưi mâo klei bi mtlaih. Akâo kơ Ih đru kâo bi êdah klei hdĭp mrâo hlăm Khua Yang hŏng bruă jăk čiăng kơ Anăn Ih mâo klei mpŭ mni ti krah phung mnuih ka thâo kral Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 16:1-17:7
Kênh Youtube BHKTHN:
