Klei Aê Diê Blŭ: Y‑Mathiơ 20:1-7
Êlan kliăng: “Snăn kyuadah diih jing phung Aê Diê ruah leh, jing phung doh jăk leh anăn phung Aê Diê khăp…” (Kôlôs 3:12a)
Klei êmuh ksiêm mĭn: Si Khua Yang Yêsu bi hmô Ƀuôn Ala Mtao? Ya ngă sa čô khua mơ̆ng aguah ưm truh tlam hiu duah nanao mnuih mă bruă hlăm đang boh kriăk ƀâo? Ya klei drei čiăng ƀuăn rơ̆ng tơdah thâo klei pap Aê Diê hŏng pô?
Khua Yang Yêsu bi hmô Ƀuôn Ala Mtao msĕ si sa čô khua nao duah phung mă bruă hlăm đang boh kriăk ƀâo pô. Ti Yuđa mâo sa anôk pia jing sang mnia mnuih mă bruă, lu mnuih nao tinăn dôk guôn phung khua nao mưn pô mă bruă. Digơ̆ khăng jing phung mâo mâo đang lŏ hma ôh, čang hmăng mâo arăng mưn kơh mâo prăk rông pô hŏng gŏ sang. Ênoh mưn digơ̆ hŏng khua srăng bi trông čhai. Hlăm êlan 2, bruă bi tŭ ư ênoh tla sa đơniê kơ sa hruê mă bruă jing klei bi tŭ ư mtăp mđơr mơ̆ng pô khua hŏng phung mă bruă mưn, kyua hŏng sa đơniê dưi rông pô leh anăn gŏ sang hlăm sa hruê.
Bruă khua nao duah nanao lu blư̆ mơ̆ng aguah truh tlam čiăng mâo thiăm mnuih mă bruă brei ƀuh đang boh kriăk ƀâo adôk lu bruă brei ngă. Truh mmông tal pluh sa, jing 5 mmông tlam, ñu ăt ƀuh adôk lu mnuih dôk guôn ti sang mnia kyua amâo mâo ôh pô mưn digơ̆. Hŏng klei pap, pô khua mưn jih phung anei nao mă bruă hlăm đang boh kriăk ƀâo pô. Yan boh kriăk ƀâo ti Yuđa yap mơ̆ng hlăk ana boh kriăk ƀâo mrâo bi mnga truh kơ hrui pĕ jing hlăm brô dua mlan, pô khua čiăng mưn phung mă bruă kriê dlăng ana boh kriăk ƀâo, tơdah yan hrui pĕ truh bruă mjêč hĭn čiăng ƀhu krô leh anăn mă êa êlâo kơ yan hjan truh. Kyua anăn, knư̆ truh knhal jih yan khua knư̆ čiăng lu mnuih mă bruă hĭn čiăng hmao hrui pĕ boh kriăk ƀâo.
Mơ̆ng klei yăl dliê anei, drei ƀuh rup pô. Aê Diê pap leh, ruah leh drei leh anăn brei drei dưi mŭt hlăm klei bi mguôp hŏng Ñu. Hlăm Sang Aê Diê mâo phung đăo kơ Khua Yang mơ̆ng sui leh ƀiădah ăt mâo mơh phung mrâo đăo, jih jang mâo Aê Diê pap leh anăn ruah sơăi. Klei drei čiăng ƀuăn rơ̆ng jing wăt tơdah đăo kơ Khua Yang sui leh dưn mơh, ăt brei jih ai riê mă bruă kơ Aê Diê hŏng jih ai tiê. Klei mplư hŏng phung dĭng buăl jing alah tơdah bi mĭn pô mă leh bruă lu snăk amâodah amâo ƀuh khua ksiêm dlăng, mđĭ ai. Brei drei mă bruă kơ Khua Yang jih ai tiê kyua hdơr knga kơ Khua Yang iêô leh pô msĕ si ai tiê Khua ƀĭng kna Y‑Pôl hlăm hră I Y‑Timôthê 1:16, “Ƀiădah kâo mă tŭ leh klei pap kyua klei anăn, čiăng kơ Yêsu Krist bi êdah hlăm kâo, pô soh hĭn, jih klei Ñu gĭr klă, čiăng kâo jing klei bi hmô….”
Grăp čô drei brei hdơr Klei Aê Diê Blŭ lač, “Ñu lač kơ digơ̆, “Mâo lu mdiê ksă, ƀiădah mâo ƀiă phung wiă. Snăn akâo bĕ kơ Khua pô hma brei tiŏ nao phung mă bruă srăng nao wiă” (Y‑Luk 10:2) čiăng hrăm mbĭtt đru hiu hưn Klei Mrâo Mrang Jăk hŏng klei čang hmăng mâo lu mnuih thâo Khua Yang leh anăn mâo klei bi mtlaih.
Drei dôk jing phung dĭng buăl mă bruă hŏng jih ai tiê mơ̆ čiăng bi mni kơ Khua Yang brei kơ drei dưi mŭt hlăm Ƀuôn Ala Mtao Ñu?
Wah lač: Ơ Khua Yang, kâo bi mni kơ Ih kyua Aê Diê ruah leh leh anăn brei kâo mŭt hlăm đang boh kriăk ƀâo jing Phung Sang Aê Diê Ih, akâo kơ Ih đru kâo hdơr knga nanao kơ Ih čiăng jih ai tiê mă bruă kơ Ih hŏng klei sĭt suôr. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
