Klei Aê Diê Blŭ: Klei Kbiă 23:24-33.
Êlan kliăng: “Brei diih mă bruă kơ Yêhôwa Aê Diê diih, leh anăn kâo srăng hơêč hmưi kơ mnơ̆ ng ƀơ̆ ng huă leh anăn êa mnăm ih; leh anăn kâo srăng mă hĕ klei ruă duam mơ̆ ng krah ih.” (Klei Kbiă 23:25).
Klei êmuh ksiêm mĭn: Ya klei Aê Diê mtă kơ phung ƀuôn sang Aê Diê ruah êlâo kơ mŭt hlăm Lăn Aê Diê Ƀuăn? Dŭm klei mtă anei djŏ tuôm mbĭt mơ̆ leh anăn hŏng Pluh Mta Klei Bhiăn? Si ngă bruă klam Aê Diê leh anăn phung ƀuôn sang Aê Diê ruah hlăm hdră kčah nao mă Lăn Aê Diê Ƀuăn? Ya klei hriăm drei mâo mơ̆ ng klei hriăm Klei Aê Diê Blŭ hruê anei?
Êlâo kơ mŭt hlăm Lăn Aê Diê Ƀuăn, Aê Diê mtrŭn asăp mtă mtăn kơ phung ƀuôn sang Aê Diê ruah. Êlâo hĭn, Aê Diê brei diñu knŏng kkuh mpŭ leh anăn mă bruă kơ knŏng hjăn Aê Diê (êlan 25a). Anei jing klei bhiăn tal sa: “Đăm ih lŏ mâo yang mkăn ôh ti anăp kâo” (Klei Kbiă 20:3). Hlăk êjai phung ƀuôn sang mkăn kkuh mpŭ leh anăn kwưh kơ lu yang mkăn čiăng mâo djăp mnơ̆ ng ƀơ̆ ng, klei suaih pral leh anăn dưi bi lar găp djuê, Aê Diê bi mklă hŏng phung ƀuôn sang Aê Diê djăp mta mnơ̆ ng diñu čiăng mâo hlăm Aê Diê sơaĭ. Aê Diê ƀuăn brei lu mta mnơ̆ ng ƀơ̆ ng, êa mnăm, bi hlao klei ruă, srăng amâo mâo ôh mniê plao ti krah diñu leh anăn Ñu srăng brei klei hdĭp jŏk tơdah diñu kriăng mă bruă Aê Diê (êlan 26-26).
Leh anăn, kyua jing djuê ana dưi pioh doh jăk, phung ƀuôn sang Israel amâo dưi kkuh mpŭ leh anăn buôn kkuh kơ ya ruh yang mkăn ôh êngao kơ Yêhôwa Aê Diê (êlan 24). Anei jing klei bhiăn tal dua hlăm Pluh Mta Klei Bhiăn. Čiăng đăm lĕ hlăm klei mplư kkuh kơ rup yang, phung ƀuôn sang Israel brei čăm jih ruh yang leh anăn sang yang phung amâo đaŏ kơ Aê Diê, amâo dưi bi mguôp ôh djuê ana anei leh anăn yang digơ̆, amâo dưi brei phung anei dôk hlăm čar diñu ôh (êlan 32-33).
Tơdah phung ƀuôn sang Aê Diê ruah mâo klei mpŭ năng bi mâo kơ Aê Diê, Ñu srăng brei djăp klei tŭ dưn kơ diñu. Aê Diê bi êdah hdră kčah leh anăn Ñu pô ngă bruă hlăm hdră nao mă Lăn Aê Diê Ƀuăn. Ñu srăng tuh klei rŭng răng kơ phung ƀuôn sang ti krĭng Kanaan, ngă kơ diñu êran đuê̆ wơr êlan, Ñu mơĭt hông sai nao êlâo suôt phung Hiwit, phung Kanaan, leh anăn phung Hitit mơ̆ ng anăp phung ƀuôn sang Aê Diê ruah. Aê Diê bi kdriêl knông lăn phung ƀuôn sang Aê Diê ruah mơ̆ ng Êa Ksĭ Hrah truh ti êa ksĭ phung Philistin, leh anăn mơ̆ ng kdrăn tač truh ti Êa Krông Ơprat, Aê Diê jao hlăm kngan diñu phung mnuih dôk hlăm čar anăn, leh anăn diñu srăng suôt phung ƀuôn sang anăn kbiă mơ̆ ng krĭng lăn anei. Aê Diê ăt bi êdah kơ diñu thâo mta phŭn Ñu srăng amâo srăng suôt ôh pral phung ƀuôn sang anăn ƀiădah srăng đru diñu suôt ƀrư̆ ƀrư̆ phung ƀuôn sang anăn, hdră kñăm jing guôn ênoh phung ƀuôn sang đĭ lu, djăp ai ktang kriê dlăng dŭm krĭng lăn anăn (êlan 29-30).
Hruê anei, Aê Diê jao kơ phung đaŏ kơ Krist jing hra leh anăn klei mngač ti krah phung ka mă tŭ Aê Diê. Brei drei thâo răng ti anăp dŭm klei kkuh kơ rup yang mơ̆ng lu mnuih riêng gah, leh anăn brei drei hdĭp tui si hnơ̆ ng Aê Diê čuăn, ngă klei jăk čiăng hmaĭ truh kơ klei đaŏ digơ̆ čiăng mâo lu mnuih mâo klei bi mtlaih.
Drei jhŏng hdĭp hluê si hnơ̆ ng Aê Diê čuăn ti krah klei hdĭp anei mơ̆?
Ơ Khua Yang, jing pô bŏ hŏng klei myang hĭn! Dưi jing anak Ih jing klei jăk mơak prŏng prĭn kơ kâo. Mni lač jăk kơ klei khăp, klei atăt gai leh anăn klei Ih mkăp djăp kơ kâo leh anăn kơ phung Sang Aê Diê. Kâo ƀuăn srăng jih klei hdĭp sĭt suôr, khăp leh anăn mă bruă knŏng hjăn kơ Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 11:8-32
Kênh Youtube BHKTHN:
https://www.youtube.com/channel/UCaSY8ebjVfMKhPups5jZ9yw
