Klei Aê Diê Blŭ: II Bruă Mtao 6:15-16
Êlan kliăng: “Ñu lač, “Đăm huĭ ôh, kyuadah phung dôk mbĭt hŏng drei jing lu hĭn kơ phung dôk mbĭt hŏng diñu.” (II Bruă Mtao 6:16)
Klei êmuh ksiêm mĭn: Ya klei dĭng buăl Khua pô hưn êlâo Y-Êlisê ƀuh leh anăn si ñu wĭt ngă? Ya klei Khua pô hưn êlâo Y-Êlisê lač leh kơ ñu? Ya klei hưn êlâo kơ drei brei răng mơ̆ng klei hriăm hruê anei?
Êjai aguah, dĭng buăl Khua pô hưn êlâo Y-Êlisê kgŭ ưm leh anăn huĭ snăk kyuadah “mâo sa phung kahan mbĭt hŏng lu aseh leh anăn êdeh aseh wang ƀuôn”, leh anăn kyua ñu amâo mâo ƀuh ôh klei mkăn êngao kơ klei ñu dôk ƀuh hŏng ală ñu dlăng!
Êjai mtao Siri knang kơ ñu pô dưi mgaih mkra klei dleh truh, bi dĭng buăl Khua pô hưn êlâo Y-Êlisê lĕ huĭ hyưt, ƀiădah phŭn kơ klei jing jih dua čô mnuih anei jing msĕ sơăi: Jih diñu dua knŏng ƀuh klei truh ti anăp ală ƀiădah amâo ƀuh ôh bruă kngan Aê Diê. Tơdah mtao Siri knŏng ƀuh Khua pô hưn êlâo Y-Êlisê yơh jing pô ba hriê klei dleh kơ ñu, snăn bi dĭng buăl Khua pô hưn êlâo Y-Êlisê knŏng ƀuh phung kahan Siri yơh ba klei dleh truh. Thâodah klei knang kơ ñu pô amâodah luč klei čang hmăng ăt msĕ sơăi mơh, knŏng jing dua nah tĭng bi êdah kơ sa mta klei, knŏng ƀuh klei truh ti lăn ala leh anăn mblang tui si pô ƀuh đuč yơh.
Êjai mtao Siri jing phung tue kkuh kơ rup yang, bi dĭng buăl mă bruă kơ Khua pô hưn êlâo Y-Êlisê, dưi lač jing mnuih mă bruă kơ Aê Diê. Wăt tơdah mdê djuê ana leh anăn mdê klei đăo, ƀiădah jih diñu dua knŏng dlăng kơ klei truh ti anăp ală diñu pô, amâo thâo kral ôh Aê Diê yơh jing Pô dôk kiă kriê jih jang klei truh. Klei sĭt anei hưn êlâo brei răng kơ phung đăo ăt mâo klei ƀuh msĕ si phung ka đăo mơh! Phung ka đăo hngah kơ mâo Aê Diê, bi phung đăo amâo hngah ôh ƀiădah lu blư̆ wơr bĭt hĕ Aê Diê yơh jing Pô mâo jih klei myang, Pô thâo jih, Pô khăp, Pô sĭt suôr. Leh anăn sa klei hưn êlâo brei răng yuôm hĭn, jing mnuih mă bruă klei đăo, wăt mnuih mâo anôk bruă hlăm klei đăo, ăt ka sĭt mơh jing mnuih mâo klei đăo kơ Aê Diê. Đăm mâo ôh pô ruăt mĭn drei yơh jing mnuih jăk hĭn kơ dĭng buăl Khua pô hưn êlâo Y-Êlisê, ƀiădah brei răng ksiêm dlăng kơ klei đăo drei pô, sĭt drei đăo kơ Aê Diê leh mơ̆? Si klei bi mguôp kâo hŏng Khua Yang, si knuih kâo hŏng klei Aê Diê čiăng leh anăn hŏng Klei Aê Diê Blŭ?
Jih jang mnuih ăt tuôm bum ală myang sơăi. Wăt mnuih tuôm găn leh klei hdĭp myang jăk mơak hlăm thŭn mlan găn gao, ăt tuôm lĕ hlăm klei ngă soh, klei mgao, brei klei tŭ jing pô bi hgăm hĕ ală thâo kral Aê Diê. Lu klei truh hlăm klei hdĭp kơ hjăn pô, kơ gŏ sang leh anăn kơ Phung Sang Aê Diê ăt kbiă hriê mơ̆ng klei knŏng ƀuh hjăn kơ drei pô leh anăn dlăng hŏng ală ƀuh, kyuanăn atăt truh kơ klei čuăn ngă tui si klei mĭn pô, kơ klei gĭt gai amâodah mă ai tiê mnuih mkăn, tĭng yap ênoh ƀiă lu… Bi mklăk wĭt, mâo đa đa mnuih huĭ hyưt đei nanao, amâo mâo klei hơĭt ênang ôh hlăm anôk jing pô, snăn diñu gĭr duah klei đru mơ̆ng mnuih lĕ. Tơdah klei mgao leh anăn klei knang kơ pô ngă bi rai klei hdĭp lu mnuih klă êdah, snăn bi klei huĭ hyưt, klei rŭng răng, wăt tơdah hgăm dưn ăt atăt truh kơ boh jhat msĕ snăn mơh.
Si ngă drei tuôm akâo mơ̆ kơ Khua Yang bi hlao mngăt ai tiê drei, čiăng dưi mâo klei ƀuh myang, thâo kral mâo Aê Diê leh anăn Aê Diê dôk kiă kriê jih jang klei?
Wah lač: Ơ Khua Yang, pap brei kơ kâo leh anăn đru kâo čiêm rông nanao klei kâo bi mguôp hŏng Khua Yang, brei kâo mâo klei ƀuh myang hlăm jih jang mta klei hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
