2 Vajntxwv 6:15-16
Nqe cim:
“Elisas teb hais tias, “Tsis txhob ntshai. Peb tog muaj coob dua lawv tog.”
(2 Vajntxwv 6:16)
Lus nug rau sawvdaws xav:
– Tus cev lus Elisas tus tub txib saib pom dabtsi thiab muaj tus cwjpwm li cas?
– Tus cev lus Elisas hais li cas rau nws?
– Peb tau ceebtoom dabtsi dhau zaj kawm hnub no?
Thaum kaj ntug, Elisas tus tubtxib sawv ntxov tawm mus thiab nws ntxhai kawg li, vim “cov tubrog Xilias, lawv tej nees thiab tsheb nees vij tagnrho lub nroog”. Nws tsis pom lwm yam txawv li tej uas nws tabtom pom!
Thaum cov Xilias tus vajntxwv rov tso siab rau nws tus kheej tias nws yuav daws tau teeb meem, ces Elisas tus tubtxib ho ntshai kawg nkaus li. Txawm li ntawd los ob tug neeg no tus yam ntxwv zoo sib thooj heev; vim tagnrho ob tug neeg no tsuas saib pom lub tsawmthawj tabmeeg ntawm qhovmuag xwb, tsis pom tes haujlwm uas Vajtswv ua. Yog cov Xilias tus vajntxwv tsuas saib pom tus cev lus Elisas yog tus tsim muaj teebmeem ces Elisas tus tubtxib tsuas saib pom cov tub rog Xilias yog teebmeem rau nws. Txawm yog rov tso siab rau tus kheej lossis tas kev cia siab, los ntawd kuj tsuas yog ob seem ntawm kev teebmeem uas tsuas saib pom tej haujlwm ntawm lub ntiajteb no thiab piav qhia tawm xwb.
Thaum lub sijhawm ntawd cov Xilias tus vajntxwv yog lwm haiv neeg uas pe tej dab mlom ces tus tub txib no ua haujlwm pab Elisas, kuj hais tau hais tias yog tus neeg ua Vajtswv haujlwm. Txawm yog sib txawv los ntawm haivneeg thiab kev ntseeg los ob tug puavleej tsuas paub saib ntsoov rau lub tsamthawj tabmeeg ntawm qhovmuag pom xwb, tsis zeem paub Vajtswv tabtom tswj rawv txhua lub sijhawm. qhov tseeb no tabtom ceebtoom rau ntau tus ntseeg uas kuj muaj qhov saib pom tej xwm tshwm ib yam li tus tsis ntseeg. Tus tsis ntseeg tsis lees hais tias muaj Vajtswv, tus ntseeg lees hais tias muaj Vajtswv tiamsis ntau zaug ho hnov qab Vajtswv kev tswj kav, Vajtswv ua tau txhua yam, paub txhua yam, muaj kev hlub, ncaj ncees. Thiab muaj ib lo lus ceebtoom hnyav dua rau cov ua haujlwm hauv kev ntseeg, xam leej cov xibhwb tsis yog txhua tus puavleej muaj kev ntseeg txaus rau ntawm Tswv Yexus. txhob rawm maj xav tias yus zoo dua Elisas tus tub txib, tiamsis cia li ua tib zoo tshuaj xyuas yus lub neej ntseeg saib, yus puas ntseeg Vajtswv tiag. Txoj kev sib raug zoo ntawm Vajtswv thiab yus zoo li cas lawm? yus tus cwjpwm rau Vajtswv siab nyiam thiab Nws Txojlus zoo li cas?
Leejtwg los yeej txawj dig muag sab ntsujplig. Txawm yog kiag qee leej uas twb tau saj Vajtswv koob hmoov hauv lub neej dhau los kuj muaj peevxwm cia kev txhaum nkag los rau lub neej, khavtheeb, vim tej yam uas tus kheej ua tau dhau los thaiv plooj kev zeem paub Vajtswv. Ntau yam teebmeem ntawm tus kheej, lub cuabyig thiab pawg ntseeg puavleej yog los ntawm kev tsuas saib pom yus tus kheej thiab tej uas qhovmuag pom xwb, thiaj txiav txim siab ua raws li yus txoj kev txawj ntse, xav tswj kav lwm tus, quab yuam lwm tus txoj kev xav thiab ua kom muaj yeej swb…Txawv li ntawd, muaj ib txhia ces thaum twg los twb txhawj ntshai, poob siab rau qhov chaw uas yus sawv thiaj siv zog nriav kev pab ntawm tibneeg. Yog kev khavtheeb thiab tso siab rau yus tus kheej tau rhuav ntau leej lub neej, ces kev txhawj ntshai, poob siab txawm yog tshwm ntsiag to los tomqab ntawd kuj yuav rhuav lub neej ib yam nkaus thiab.
Thov Vajtswv
Vajtswv, thov hlub tshua nyuam yaus thiab pab kom nyuam yaus ceev tau txoj kev sib raug zoo nrog Koj. Thov pab kom nyuam yaus saib pom txhua seem ntawm lub neej sab ntsujplig hauv kev ua neej. Nyuam yaus tuav Tswv Yexus Khetos lub npe thov. Amees.
Peb puas thov Vajtswv pab kom peb lub neej sab ntsujplig saib pom Vajtswv txoj kev tswj?
Nyeem Vajluskub hauv peb lub xyoos: 1 Xwmtxheej Vajntxwv 26
Kênh Youtube BHKTHN:
