Klei Aê Diê Blŭ: II Kôrantô 5:14-15
Êlan kliăng: “Arăng pơ̆ng leh kâo ti kyâo bi kal mbĭt hŏng Krist; snăn amâo djŏ ôh kâo pô dôk hdĭp, ƀiădah Krist dôk hdĭp hlăm kâo. Leh anăn klei kâo dôk hdĭp hlăm kđeh ară anei, jing kâo dôk hdĭp hŏng klei đăo kơ Anak Aê Diê, Pô khăp kơ kâo leh anăn jao leh Ñu pô kyua kâo” (Galati 2:20).
Klei êmuh ksiêm mĭn: Ya klei mđĭ ai Khua ƀĭng kna Y‑Pôl hdĭp jih ai tiê pô kyua Anăn Aê Diê leh anăn phung ka mâo klei bi mtlaih? Si ngă “Hdĭp kơ Pô djiê leh leh anăn kbiă lŏ hdĭp kơ pô”? Si ngă čiăng drei dưi hdĭp snăn?
Leh Aê Diê bi mtlaih, Khua ƀĭng kna Y‑Pôl myơr jih klei hdĭp pô čiăng hiu hưn Klei Mrâo Mrang Jăk, boh nik kơ phung nah êngao. Ñu ngă bruă jih ai tiê msĕ si ñu lač leh, wăt tơdah hdĭp amâodah djiê ăt ngă jih čiăng bi mơak kơ Pô bi mtlaih leh ñu. Hĭn mơh kyua ai tiê huĭ mpŭ kơ Aê Diê anăn ñu amâo pioh hjăn ôh klei bi mtlaih kơ pô ƀiădah gĭr ba Klei Mrâo Mrang Jăk kơ lu mnuih. Hlăm êlan 14, Khua ƀĭng kna Y‑Pôl bi mklă klei mđĭ ai ktang hĭn kơ ñu myơr jih klei hdĭp snăn amâo mâo klei mkăn ôh jing “klei Krist khăp”. Ñu lač Khua Yang Yêsu tŭ leh klei djiê ti kyâo bi kal amâo djŏ knŏng hjăn kơ ñu ôh ƀiădah lŏ djiê kơ jih jang grăp čô mnuih, kyua anăn phung dưi tlaih kyua đăo kơ klei Khua Yang Yêsu djiê snăn ăt brei dlăng mnuih hđăp pô msĕ si pơ̆ng leh ti kyâo bi kal hŏng Krist, čiăng hdĭp hŏng knuih mrâo mâo Aê Diê kiă kriê (êlan 15, Galati 2:20). Anăn jing knuih hdĭp amâo knŏng mĭn kơ hjăn pô, amâo djŏ knŏng kyua pô ôh ƀiădah brei hdĭp jih ai tiê kyua Pô djiê leh leh anăn kbiă lŏ hdĭp leh kơ pô.
Khua ƀĭng kna Y‑Pôl thâo Khua Yang Yêsu jao leh klei hdĭp Ñu čiăng bi mtlaih phung mâo klei soh msĕ si ñu, leh anăn Khua Yang kbiă lŏ hdĭp čiăng brei klei hdĭp kơ ñu, kyua anăn ñu ăt hdĭp kơ Khua Yang. Ñu amâo lač ôh klei blŭ huâng čiăng bi êdah klei hdơr knga kơ klei khăp kơ Aê Diê, ƀiădah myơr jih klei hdĭp ñu kơ bruă hiu hưn Klei Mrâo Mrang Jăk jing klei bi mklă kơ klei blŭ amâo hdĭp kơ pô ƀiădah kyua Pô djiê leh leh anăn kbiă lŏ hdĭp leh kơ pô.
Hlăk čih hră kơ Sang Aê Diê Rôm kơ knuih hdĭp êpul êya, Khua ƀĭng kna Y‑Pôl mtô: “Đăm đuôm nư arăng ôh, knŏng bi đuôm klei khăp hdơ̆ng diih” (Rôm 13:8a). Grăp čô drei hruê anei mâo leh klei Krist bi mtlaih, kơ sa bruă drei adôk đuôm nư klei khăp Khua Yang, kyua anăn knŏng mâo sa hdră sa anăn čiăng tla nư klei khăp anăn jing hdĭp kyua Khua Yang leh anăn kyua mngăt dôk luč čiăng klei bi mtlaih Khua Yang truh kơ digơ̆. Khua Yang yua grăp čô drei čiăng hdĭp kơ Ñu, brei klei khăp Khua Yang jing klei mđĭ ai drei hdĭp myơr jih kơ Ñu.
Drei dôk hdĭp kyua Pô djiê leh leh anăn kbiă lŏ hdĭp kơ pô mơ̆?
Wah lač: Ơ Khua Yang Yêsu khăp hơiêng! Kâo bi mni lač jăk kơ Ih kyua Ih djiê leh leh anăn kbiă lŏ hdĭp čiăng brei kơ kâo leh anăn kơ phung đăo kơ Ih klei hdĭp hlŏng lar jăk mơak. Akâo kơ klei khăp Khua Yang mđĭ ai kâo hdĭp kơ Anăn Ih leh anăn hiu hưn klei khăp Khua Yang djiê leh kyua anak mnuih kơ phung ka mâo klei bi mtlaih.
Dlăng Klei Aê Diê Blŭ hlăm tlâo thŭn: Klei Bi Hriêng 30:1‑33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
