Klei Aê Diê Blŭ: Klei Bi Hriêng 21:27
Êlan kliăng: “Yêhôwa bi êmut kheh kơ mnơ̆ng phung ƀai ngă yang, ƀai hĭn tơdah diñu myơr hŏng klei mtrŭt ƀai.” (Klei Bi Hriêng 21:27)
Klei êmuh ksiêm mĭn: Ya ngă Aê Diê bi êmut kheh kơ mnơ̆ng phung ƀai ngă yang? Si jing klei kkuh mpŭ sĭt? Si brei drei kkuh mpŭ kơ Aê Diê čiăng kơ Ñu mơak?
Aê Diê čiăng kơ phung ƀuôn sang Aê Diê kkuh mpŭ sĭt, anăn jing klei kkuh mpŭ mơ̆ng ai tiê kpă ênô huĭ mpŭ kơ Aê Diê leh anăn hdơr knga kơ Ñu. Pruê̆ blŭ “ƀai hĭn tơdah diñu myơr hŏng klei mtrŭt ƀai” (êlan 27) lač kơ klei Aê Diê ngêñ hŏng phung nao kkuh mpŭ kơ Ñu hŏng ai tiê bŏ hŏng klei măk ƀai. Klei Aê Diê Blŭ mñă klă: “Yêhôwa bi êmut kheh kơ mnơ̆ng phung ƀai ngă yang, ƀiădah klei phung kpă wah lač bi mơak kơ Ñu” (Klei Bi Hriêng 15:8). Snăn, ai tiê kpă ênô hlăm klei kkuh mpŭ jing klei Aê Diê khăp. Hĭn mơh, Aê Diê ƀrư̆ bi êmut kheh kơ phung hdĭp mgưt, mâo “mtrŭt ƀai” jing mâo “klei mĭn ƀai” tơdah nao kkuh mpŭ kơ Ñu. “Mtrŭt ƀai” lač kơ ai tiê phung kkuh mpŭ mgưt. Hdră kñăm diñu amâo djŏ jing kkuh mpŭ kơ Aê Diê ôh ƀiădah diñu mplư phung ƀuôn sang Aê Diê hŏng klei bi êdah ti êngao, knuih diñu ngă mgưt. Diñu knŏng yua klei kkuh mpŭ msĕ si sa mta mnơ̆ng čiăng dưi ngă klei mĭn ƀai, bi êka kơ êpul êya. Diñu ăt ba mnơ̆ng myơr ƀiădah mjhua mnơ̆ng myơr hŏng hdră kñăm duh kơ klei mĭn măk ƀai diñu.
Khua Yang Yêsu tuôm lač leh kơ phung khua čih hră leh anăn phung Pharisi jing phung ai ngăm: “Knap mñai yơh kơ diih, Ơ phung khua čih hră leh anăn phung Pharisi, phung ai ngăm! Kyuadah diih đuĕ hiu tar ƀar êa ksĭ leh anăn lăn ala čiăng brei sa čô tue mlih klei đăo, leh anăn tơdah gơ̆ mŭt phung diih leh, diih mjing gơ̆ sa čô anak war pui dua bliư̆ jhat hĭn kơ diih pô” (Y-Mathiơ 23:15).
Diñu mtô lač leh phung ƀuôn sang nao kkuh mpŭ soh leh anăn hŏng hdră kñăm soh čhuai. Aê Diê mñă leh phung ƀuôn sang Aê Diê brei kkuh mpŭ kơ Ñu hŏng ai tiê sĭt nik. Khua Yang mtô “Ƀiădah mmông giăm truh, leh anăn truh leh, tơdah phung kkuh mpŭ sĭt nik srăng kkuh mpŭ kơ Ama hŏng mngăt leh anăn hŏng klei sĭt nik, kyuadah phung kkuh mpŭ msĕ snăn yơh Ama čiăng. Aê Diê jing Mngăt Myang, leh anăn hlei pô čiăng kkuh mpŭ kơ Ñu, brei kkuh mpŭ hŏng mngăt leh anăn hŏng klei sĭt nik” (Y-Yôhan 4:23-24).
Aê Diê jing Pô Myang Êdi, Ñu thâo jih klei mĭn, hdră kñăm grăp čô drei tơdah nao kkuh mpŭ kơ Ñu. Brei drei jih ai tiê thâo răng čiăng amâo kkuh mpŭ kơ Aê Diê hŏng klei ngă mgưt ôh, hŏng ai tiê bŏ hŏng klei mĭn ƀai, ƀiădah brei mprăp jăk mơ̆ng klei mĭn truh kơ ai tiê tơdah kkuh mpŭ. Brei drei ăt răng amâo sa ai ôh hŏng phung mgưt hlăm Sang Aê Diê čiăng ñĕ kơ klei soh hlăm klei kkuh mpŭ, hmăi kơ phung ƀuôn sang Aê Diê. Wăt tơdah drei kkuh mpŭ hjăn hŏng Aê Diê amâodah hrăm mbĭt kkuh mpŭ hŏng êpul êya brei mpŭ Aê Diê jing phŭn. Brei hdơr “Ngă klei kpă ênô leh anăn klei djŏ jing klei Yêhôwa mơak lu hĭn kơ mnơ̆ng ngă yang” (Klei Bi Hriêng 21:3).
Drei dôk kkuh mpŭ kơ Aê Diê hŏng ai tiê leh anăn si hdră?
Wah lač: Ơ Aê Diê Pô Myang Hĭn, kâo bi mni kơ Ih kyua Klei Ih Blŭ mñă kơ kâo kơ klei kkuh mpŭ sĭt. Akâo kơ Ih đru kâo hŏng ayŏng amai adei kâo kkuh mpŭ nanao kơ Ih hŏng ai tiê kpă ênô, sĭt nik. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Hêbrơ 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
