Pajlug 21:27
Nqe cim:
“Tus Tswv ntxub tej khoom theej txhoj uas cov neeg siab phem coj tuaj fij rau nws, qhov uas nws ntxub tshaj mas yog lawv tsis ua los ntawm lub siab dawb paug” (Pajlug 21:27)
Lus nug rau sawvdaws xav:
– Vim li cas tus Tswv ntxub cov neeg siab phem tej khoom theej txhoj?
– Kev pehawm tseeb yog li cas?
– Peb yuav tsum pehawm Vajtswv li cas thiaj haum Nws siab?
Vajtswv xav kom Nws cov menyuam muaj kev pehawm tseeb, ntawd yog kev pehawm pib hauv nplooj siab dawb paug tuaj, hwm tus Tswv thiab nco ntsoov Nws txiajntsig. Vajluskub hais tias, “Tus Tswv ntxub tej khoom theej txhoj uas cov neeg siab phem coj tuaj fij rau Nws” (nqe 27), yog hais txog tus Tswv txojkev chim rau cov neeg tuaj pehawm Vajtswv uas lawv tseem muaj nplooj siab phem. Vajtswv Txojlus qhia meej hais tias: “Tus Tswv txaus siab rau cov neeg siab zoo tej lus thov, tiamsis nws ntxub tej khoom fij uas cov neeg siab phem coj tuaj fij” (Pajlug 15:8). Yog li ntawd, nplooj siab ncaj ncees nyob hauv kev pehawm yog yam uas tus Tswv nyiam. Tsis tas li ntawd xwb, tus Tswv ntxub ntxaug cov neeg ntsejmuag ncaj siab nkhaus, cov neeg muaj lub siab phem uas tsis muaj lub siab dawb paug pehawm Vajtswv. “Tsis muaj lub siab dawb paug” yog hais txog kev xav ua phem ntawm tus neeg pehawm tsis tseeb. Lawv lub homphiaj tsis yog pehawm Vajtswv tiamsis lawv ua dag cov ntseeg los ntawm tes haujlwm sab nraud xwb. Lawv siv kev pehawm zoo li ib yam cuabyeej los ua yam phem kom tau yam lawv ntshaw ua rau cov ntseeg muaj kev kub ntxhov. Lawv kuj coj khoom tuaj fij tiamsis lawv tsuas ua kom pab tau raws li lawv lub siab xav phem xwb.
Tswv Yexus cem cov xibhwb qhia Vajtswv tej kevcai thiab cov Falixais hnub thaud hais tias: “Cov xibhwb uas qhia Vajtswv txoj Kevcai thiab cov Falixais uas ntsejmuag ncaj siab nkhaus, nej yuav raug kev puastsuaj! Nej caij nkoj hla dej Hiavtxwv mus thoob tebchaws nrhiav kom tau ib tug los coj nej txoj kevcai; tiamsis thaum nej nrhiav tau lawm, nej ua rau tus ntawd tsimnyog poob rau hauv ntujtawg tshaj nej ob npaug!” (Mathais 23:15). Lawv yog cov uas coj tus Tswv haiv neeg kev pehawm mus yuam kev thiab muaj homphiaj tsis zoo. Tus Tswv qhia hais tias, Vajtswv cov menyuam yuav tsum pehawm Nws los ntawm nplooj siab dawb paug. Tswv Yexus hais tias: “cov neeg uas pehawm Leej Txiv yuav pehawm ntawm sab Ntsujplig thiab qhov tseeb, rau qhov Leej Txiv xav kom sawvdaws muaj nplooj siab dawb paug pehawm nws tiag. Vajtswv yog Ntsujplig, cov uas pehawm Vajtswv yuav tsum pehawm ntawm sab ntsujplig thiab qhov tseeb” (Yauhas 4:23-24).
Vajtswv yog tus paub txhua yam, Nws paub peb kev xav thiab peb tej homphiaj thaum tuaj pehawm Nws. Peb yuav tsum ceevfaj tsis txhob pehawm Vajtswv los ntawm kev tsis tseeb thiab ntawm lub siab phem, tiamsis yuav tsum kho kev pehawm kom zoo txij li kev xav mus rau nplooj siab huv tibsi. Peb kuj yuav tsum ceevfaj txhob koom siab nrog cov neeg ntsejmuag ncaj siab nkhaus hauv Pawg Ntseeg thiaj tsis yuamkev hauv kev pehawm Vajtswv thiab tsis cuam tshuam rau lwm tus ntseeg. Txawm yog peb yuav pehawm Vajtswv tibleeg lossis koom pehawm nrog sawvdaws los xij, peb yuav tsum saib Vajtswv ua tus tseemceeb. Yuav tsum nco ntsoov hais tias: “Ua ncaj ua ncees thiab ua zoo, txaus tus Tswv siab dua coj tej khoom tuaj fij rau nws” (Pajlug 21:3).
Thov Vajtswv:
Tus Tswv uas muaj hwjchim, thov ua Koj tsaug vim Koj qhuab ntuas nyuam yaus txog kev pehawm tseeb. Thov pub rau nyuam yaus thiab lwm tus paub pehawm Koj los ntawm nplooj siab dawb paug thiab qhov tseeb. Nyuam yaus tuav Cawmseej Tswv Yexus lub npe thov, Amees.
Ib tsoom cov mloog uas hmov thiab tshua,
Peb tabtom pehawm Vajtswv los ntawm nplooj siab zoo li cas?
Nyeem Vajluskub hauv peb lub xyoos: Henplais 7
Kênh Youtube BHKTHN:
