Yaxayas 1:1-19
Nqe cim:
“Nws yuav los txiav txim ib yam li tus neeg nchuav nyiaj, nws muab nyiaj nchuav kom tau cov tseem nyiaj. Tus TSWV tus tubtxib yuav los muab cov povthawj ntxuav kom dawbhuv ib yam li tej nyiaj tej kub uas tus nchuav nyiaj twb muab nchuav tau lawm. Yog li ntawd, lawv thiaj yuav coj tej khoom uas haum tus TSWV siab tuaj fij rau nws.” (Malakis 3:3)
Lus nug xav:
– Vim licas tus Tswv ho txiavtxim rau Nws haivneeg?
– Lub homphiaj ntawm tus Tswv txojkev txiav txim yog dabtsi?
– Peb yuav tsum muaj tus cwjpwm li cas thaum tus Tswv txiav txim rau peb?
Yaxayas sawv los ua tus Cevlus kwvlam xyoo 740-686 UY, nws nyob dhau ntau tiam vajntxwv kav lub tebchaws Yudais (nqe 1), thiab kwvlam li 100 xyoo ua ntej lub tebchaws no raug puastsuaj. Dhau ntawm tus Cevlus Yaxayas, tus Tswv qhia hais tias Nws muaj ib “pab menyuam” uas yuav tsum tau tu thiab qhia, tiamsis lawv tsis totaub thiab pheej ua tej yam phem, tsis ncaj ncees (nqe 2-4). Thaum kawg thiaj raug Leej Txiv txiav txim hnyav txij li txhua leej mus txog rau tagnrho lub tebchaws (nqe 5-7). Vim licas tus Tswv ho txiav txim rau Nws haivneeg? Ntawd yog vim raws li tej lus cogtseg, tus Tswv tau hais kom lawv tsuas pehawm Vajtswv tibleeg xwb thiab ua lubneej ncaj ncees, txhais hais tias mloog raws li Vajtswv txoj kevcai thiab ua raws li qhov tseeb (Teev Npe 10:12-13; Mikhas 6:8). Tus Tswv txojkev txiav txim qhia tshwm Nws tus mojyam ncaj ncees.
Muaj coob leej tsis nkag siab ua cas haivneeg tau Vajtswv xaiv ho ntsib kev txiav txim ntau ua luaj li ntawd! Qhov laj thawj xubthawj tau hais meej hauv nqe 2 yog vim lawv ntxeev siab tawmtsam tus Tswv. Tus Tswv hais tias: “Tej menyuam uas kuv yug thiab tu hlob tau ntxeev siab rau kuv”. Qhov laj thawj thib ob, sawvdaws puavleej paub lawm hais tias lub qe zeb uas muaj nqis yuav tsum tau muab los txhuam sijhawm ntev heev, nyiaj thiab kub yuav tsum tau muab los nchuav kom dawbhuv tsis muaj txuam thiaj li dhau los ua yam tsimtxiaj. Tus Tswv hais tias: “Kuv yuav tawmtsam koj, kuv yuav muab koj tej teev dub ntxuav kom dawb thiab yuav so koj qhov ceb kom huv” (Yaxayas 1:25; Malakis 3:3).
Tiamsis, thaum txiav txim, tus Tswv tsis cia lawv thev dhau lawv lub dag zog. Nws hais tias: “Kuv yuav nplawm koj npaum li uas tsim nyog xwb, thiab kuv yuav tsis tso qhov uas rau txim rau koj tseg” (Yelemis 30:11 HMOWSV). Thaum Vajtswv haivneeg kawm paub txog Vajtswv txojkev ncaj ncees lawm, Nws xav kom lawv yuav tsum lees kev txhaum, txhais hais tias tig rov los thiab hloov siab kom lawv lub txim “dawb paug li daus” thiab lawv yuav “tau noj txhua yam zoo uas cog hauv lub tebchaws” (nqe 18-19)! Zoo ib yam li tus Cevlus Exekees tej lus qhia tom qab ntawd 100 xyoo: “Cia li tso nej tej kev phem kev qias tseg, tsis txhob cia nej tej kev txhaum coj nej mus raug kev puastsuaj” (Exekees 18:30). Vajtswv haivneeg muaj kev cia siab loj heev tom qab uas raug txiav txim. Lawv hais tias: “Peb cia li rov mus cuag tus TSWV! Nws tau ua rau peb raug mob, tiamsis nws yuav kho peb tej mob kom zoo; nws tau ua rau peb tej nqaij to, tiamsis nws yuav qhwv peb tej qhov txhab puas yog?” (Hauxeyas 6:1). Nyob hauv ntu kawg ntawm tshooj 1 (Yaxayas 1:20-31), tus Cevlus Yaxayas kuj ceebtoom lawv hais tias tus Tswv txojkev ncaj ncees yuav txiav txim rau lawv yog tias lawv tseem pheej ua txhaum ntxiv (nqe 20-25, 28-31). Tiamsis yog lawv ua lubneej ncaj ncees, lawv yuav tau cawm dim (nqe 27).
Tus Tswv yeej yuav cob Nws cov menyuam kom dhau los ua neeg zoo, muaj nqis heev ntxiv rau Nws. Peb yuav tsum ceevfaj zeem paub Leej Txiv saum Ntuj Ceebtsheej txojkev hlub dhau ntawm tus Tswv txojkev txiav txim ncaj ncees kom paub lees kev txhaum, tig rov los ua ntej yuav lig dhau.
Thov Vajtswv,
Leej Txiv uas ncaj ncees thiab hlub tshua! Ua Koj tsaug vim Koj niaj hnub nchuav nyuam yaus kom dhau los ua yam tseem kub. Thov Koj nplawm nyuam yaus txhua zaus uas nyuam yaus mus yuamkev, kom nyuam yaus yim hnub yim zoo li Koj, ua lubneej ncaj ncees thiab dawbhuv ntxiv. Nyuam yaus tuav Yexus Khetos lub npe thov, Amees.
Peb puas zeem paub tus Tswv txojkev txiav txim kom ntxov lees kev txhaum thiab tig rov qab los lawm tau?
Nyeem Vajluskub hauv peb lub xyoos: Ntawv Nkauj 85-86
Kênh Youtube BHKTHN:
