Klei Aê Diê Blŭ: Y‑Tit 2:6‑8
Êlan kliăng: “Hlăm jih jang klei bi êdah ih pô jing klei bi hmô hlăm bruă jăk, leh anăn hlăm klei ih mtô bi êdah klei doh jăk, klei năng” (Y‑Tit 2:7)
Klei êmuh ksiêm mĭn: Ya klei Khua ƀĭng kna Y‑Pôl lač kơ Y‑Tit mtô kơ phung hlăk ai? Si Y‑Tit brei bi êdah klei hdĭp bi hmô? Si drei dôk bi hmô kơ phung hlăk ai hlăm gŏ sang leh anăn Phung Sang Aê Diê?
Khua ƀĭng kna Y‑Pôl mtô kơ Y‑Tit mâo bruă klam mtô kơ phung hlăk ai hlăm Phung Sang Aê Diê brei hriăm sa klei hdĭp djŏ hnơ̆ng. Anei jing sa hlăm knuih mơ̆ng boh Yang Mngăt Jăk. Phung hlăk ai tuôm nanao hŏng klei mplư prŏng snăk mơ̆ng ƀĭng găp, ala ƀuôn, kyua anăn brei knang kơ Yang Mngăt Jăk đru răng kriê klei hdĭp pô, thâo mbruă, djŏ hnơ̆ng hlăm djăp boh klei čiăng mâo sa klei hdĭp bi mơak kơ Aê Diê.
Hlăm êlan 7‑8, Khua ƀĭng kna Y‑Pôl mtô Y‑Tit kơ klei hdĭp bi hmô. Jing khua gĭt gai hlăm mngăt, Y‑Tit brei bi hmô kơ phung đăo. “Hlăm jih jang klei bi êdah ih pô jing klei bi hmô hlăm bruă jăk, leh anăn hlăm klei ih mtô bi êdah klei doh jăk, klei năng” (êlan 7). Pô mblang Klei Aê Diê Blŭ John MacArthur čih: “Ñu amâo djŏ knŏng mtô klei đăo kơ digơ̆ hŏng klei blŭ ôh ƀiădah wăt hŏng klei hdĭp năng hŏng klei ñu pô blŭ leh. Sa klei mtô mñă ktang snăk leh anăn djŏ ai hĭn ăt knŏng jih hơăi mang tơdah pô mtô mtă anăn amâo hdĭp djŏ tui si klei pô blŭ leh.” Khua Yang Yêsu lač kơ phung Pharisi knŏng lač kơ knuih hdĭp ƀiădah amâo ngă ôh jing phung mgưt. Tơdah Khua ƀĭng kna Y‑Pôl mtô Y‑Tit kơ klei anei, ñu pô ăt jhŏng lač hŏng phung đăo Kôrantô: “Brei diih jing phung tui kâo, msĕ si kâo jing pô tui Krist”(I Kôrantô 11:1).
Kơ klei blŭ, Y‑Tit hmư̆ klei mtô “klei blŭ bi djŏ arăng amâo dưi ƀuah ôh, čiăng kơ pô roh srăng hêñ, amâo mâo sa mta klei dưi blŭ jhat kơ drei ôh” (êlan 8). Amâo djŏ Y‑Tit knŏng bi hmô hlăm bruă ngă jăk ôh ƀiădah lŏ bi hmô hlăm klei blŭ. Ya klei ñu blŭ brei jing klei blŭ djŏ, klei blŭ jăk, arăng amâo dưi ƀuah ôh, čiăng kơ pô roh srăng hêñ, amâo mâo sa mta klei dưi blŭ jhat kơ drei ôh. Knuih hdĭp sĭt suôr leh anăn klei blŭ djŏ hnơ̆ng amâo djŏ knŏng bi hmô jăk, ngă phung roh amâo dưi lŏ bi kdơ̆ng, ñĕ kơ klei bi tăng mgăl ôh, ƀiădah lŏ bi guh kơang Anăn Khua Yang.
Jih jang drei jing aduôn aê, amĭ ama, amiêt awa mâo sơăi bruă klam gĭt gai hlăm gŏ sang. Brei drei bi hmô kơ bruă jăk, hlăm klei mtô, hlăm klei ngă, blŭ hrăm, leh anăn wăt klei hdĭp klei đăo…kơ anak čô tui hlue. Hlăm Phung Sang Aê Diê, êngao kơ pô kiă lŏ mâo phung khua sang yang, phung nai mtô leh anăn phung mă bruă mâo bruă klam kiă sa êpul biăp. Aê Diê leh anăn Phung Sang Aê Diê dôk čang guôn mơ̆ng jih jang phung drei sa klei hdĭp bi hmô. Akâo kơ Khua Yang đru drei thâo răng nanao hlăm klei hdĭp čiăng bi hmô jăk kơ gŏ sang leh anăn Phung Sang Aê Diê.
Phung hlăk ai dlăng hlăm klei hdĭp drei srăng ƀuh klei bi hmô jăk amâodah jhat čiăng tui hlue?
Wah lač: Ơ Khua Yang bŏ hŏng klei khăp, bi mni kơ Ih khăp leh anăn bi mtlaih leh kâo mơ̆ng klei soh, brei kơ kâo dưi jing anak Aê Diê myang hĭn. Akâo kơ Yang Mngăt Jăk đru kâo knang kơ ai ktang Ih čiăng hriăm sa knuih hdĭp bi hmô jăk mơ̆ng klei đăo, klei mĭn, klei blŭ, klei ngă kơ gŏ sang leh anăn Phung Sang Aê Diê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
