Titus 2:6-8
Nqe cim.
“Koj yuav tsum ua txhua yam haujlwm zoo rau lawv xyaum…” (Titus 2:7)
Lus nug rau sawvdaws xav.
– Timthawj Paulus qhia Titus ntuas cov hluas txog yam dabtsi?
– Titus yuav tsum qhia tshwm lubneej ua qauv zoo licas?
– Peb tabtom ua qauv licas rau cov hluas nyob hauv peb tsev neeg thiab Pawg Ntseeg?
Timthawj Paulus qhia kom Titus muaj feemxyuam ntuas cov hluas hauv Pawg Ntseeg kom paub tswj lawv lub siab. Tswj siab yog ib yam nyob hauv Vaj Ntsujplig dej txiv. Lub neej hluas yuav ntsib ntau yam kev sim siab loj los ntawm tej phoojywg, neeg zej zos, vim li ntawd yuav tsum vamkhom Vaj Ntsujplig pab ceev txuag tus kheej, pub muaj tswvyim, muaj kev haujsim hauv txhua yam kom muaj lubneej ua haum tus Tswv siab.
Nyob hauv nqe 7-8, Timthawj Paulus qhia tshwjxeeb rau Titus txog lubneej ua qauv zoo. Yog ib tug thawjcoj sab ntsujplig, Titus yuav tsum ua qauv zoo rau cov ntseeg xyaum. Nws hais tias: “Koj yuav tsum ua txhua yam haujlwm zoo rau lawv xyaum. Thaum koj qhia Vajtswv txojlus koj yuav tsum ua tib zoo qhia tiag tiag” (nqe 7). Tus tub txhais Vajluskub John MacArthur sau tseg hais tias: “Tus thawjcoj sab ntsujplig tsis yog tsuas qhia sab kev ntseeg rau lawv ntawm ncauj xwb tiamsis tseem qhia los ntawm lubneej ua raws li tej uas nws tau hais. Txawm yog tej lus qhia yuav muaj zog thiab muaj kuab heev los tsuas zoo li dej hliv nplooj qos yog hais tias tus neeg hais tej lus ntawd tsis ua neej raws nraim li tej uas nws qhia.” Tswv Yexus cem cov neeg Falixais tsuas hais zoo ntawm ncauj xwb tsis ua raws, lawv yog cov neeg ntsejmuag ncaj siab nkhaus. Thaum Timthawj Paulus qhia Titus txog tej yam no, nws tus kheej kuj muaj lub siab tawv qhawv hais rau cov ntseeg hauv Kauleethaus hais tias: “Nej xyaum ua raws li kuv tus yam ntxwv, ib yam li kuv xyaum ua raws li Yexus Khetos tus yam ntxwv” (I Kauleethaus 11:1).
Nyob hauv kev hais lus, Titus tau qhuab ntuas hais tias: “Koj yuav tsum hais tej lus zoo xwb, lwm tus thiaj yuav tsis muaj lus thuam tau koj. Cov neeg uas ntxub koj lawv yuav txajmuag, rau qhov lawv yuav tsis muaj ib lo lus thuam peb cov ntseeg” (nqe 8). Tsis yog tias Titus tsuas ua qauv zoo los ntawm tej haujlwm zoo xwb, tiamsis yuav tsum ua dhau los ntawm kev hais lus thiab. Tej uas nws hais tawm yuav tsum yog tej lus tseeb, lus zoo, haum kev haum cai, tsis muaj leejtwg thuam tau, kom cov uas nrhiav kev tawmtsam thiaj raug txajmuag, lawv thiaj thuam tsis tau peb cov ntseeg. Lub neej ncaj ncees thiab tej lus zoo tsis yog tsuas ua tau qauv zoo, kaw tau cov neeg tawmtsam lub ncauj, pab qaij tej kev sib cav sib ceg xwb, tiamsis tseem ua rau tus Tswv tau koob meej thiab.
Peb yog cov ua pog ua yawg, ua niam ua txiv, ua txiv hlob txiv ntxawm, ua phauj, ua tais,… peb puavleej muaj feem coj thawj hauv lub cuabyig. Peb yuav tsum ua qauv hauv kev ua zoo, kev cob qhia, kev ua haujlwm, kev hais lus thiab kev ua neej ntseeg rau tej menyuam xyaum. Nyob hauv Pawg Ntseeg, tshwj Xibhwb, tseem muaj cov thawjcoj, cov qhia txhua pab puavleej muaj feem coj tau tus Tswv ib pab yaj twg. Tus Tswv thiab Pawg Ntseeg tabtom tos ntsoov peb ua lubneej ua qauv zoo. Thov tus Tswv pub rau peb xyuamxim hauv lubneej thiaj ua tau qauv zoo rau lub cuabyig thiab rau lwm tus xyaum.
Thov Vajtswv,
Tus Tswv uas hlub tshua, thov ua tsaug vim Koj hlub thiab cawm nyuam yaus tawm hauv kev txhaum los, pub rau nyuam yaus tau ua Koj menyuam. Thov pab nyuam yaus xyaum tau lubneej ua qauv zoo txij li hauv sab kev ntseeg, kev xav, kev hais lus, mus rau tes haujlwm hauv tsevneeg thiab Pawg Ntseeg. Nyuam yaus tuav Yexus Khetos lub npe thov, Amees.
Thaum cov hluas saib rau peb lubneej lawv yuav pom qauv zoo lossis qauv phem ua raws?
Nyeem Vajluskub hauv peb lub xyoos: Lukas 23
Kênh Youtube BHKTHN:
