Klei Aê Diê Blŭ: II Klei Yăl Dliê 15:8‑19
Êlan kliăng: “Diñu ngă klei bi mguôp čiăng duah Yêhôwa Aê Diê phung aê diñu hŏng jih ai tiê leh anăn hŏng jih mngăt diñu” (II Klei Yăl Dliê 15:12)
Klei êmuh ksiêm mĭn: Ya ngă phung Yuđa bi kƀĭn ti Yêrusalem? Si knuih diñu hŏng bruă ngă anei? Ya boh tŭ diñu mă? Drei dôk duah Aê Diê amâo jih ai tiê amâodah jih ai tiê, jih klei mĭn?
Leh hmư̆ klei blŭ Khua pô hưn êlâo Y‑Asaria, wăt tơdah amâo mâo sa asăp mtrŭn klă klơ̆ng ôh, Mtao Asa ăt hlue ngă bruă mkra mlih klei đăo kluôm dhuôm, Mtao lui “rup yang Yêhôwa bi êmut” mơ̆ng lăn čar pô; mkra mđĭ knưl Yêhôwa; leh anăn iêô mthưr mnuih ƀuôn sang lŏ mkŏ mjing klei bi mguôp hŏng Aê Diê, dưi mkŏ mjing ti Yêrusalem.
Klei bi mguôp Israel mkŏ mjing leh hŏng Aê Diê ti čư̆ Sinai mâo phung ƀuôn sang Aê Diê lŏ ƀuăn rơ̆ng lu blư̆ sĭt ƀuh mâo klei čiăng lŏ bi mrâo klei bi mguôp hŏng Aê Diê (Klei Mtô Mñă Klei Bhiăn 19:1‑29; Y‑Yôsuê 8:30‑35). Phung ƀuôn sang Yuđa phưi pô hlăm klei kkuh kơ rup yang hlăm sa wưng sui, diñu ngă ngơi mang leh anăn amâo jih ai tiê kkuh mpŭ kơ Aê Diê ôh. Thâo kral klei čiăng kơ mngăt phung ƀuôn sang jing brei tui duah Aê Diê hŏng jih ai tiê, jih klei mĭn anăn leh hmư̆ klei Khua pô hưn êlâo Y‑Asaria, Mtao Asa brei jih jang phung ƀuôn sang lŏ mjing klei bi mguôp hŏng Aê Diê. Hlăm klei bi kƀĭn anei, diñu ƀuăn rơ̆ng srăng jih ai tiê, jih klei mĭn tui duah Aê Diê. Klei tui duah Aê Diê anei jing jih hnơ̆ng kyua hlei pô amâo tui duah Aê Diê snăn srăng tŭ klei arăng mdjiê wăt êkei mniê, mduôn khua hđeh, kyua phung hngah tui duah Aê Diê jing phung čiăng lŏ dơ̆ng kkuh kơ rup yang amâodah bi êdah klei bi kdơ̆ng hŏng Aê Diê.
Phung ƀuôn sang ur ktang klei ƀuăn hŏng Yêhôwa. Hŏng phung Yuđa hlăk đưm, sa klei bi mguôp khăng mâo bruă ngă (Y‑Nêhêmi 10:28‑39; I Klei Yăl Dliê 16:15‑17). “Jih Yuđa” hơ̆k mơak sơăi kyua diñu jih ai tiê ƀuăn rơ̆ng leh anăn jih ai tiê tui duah klei Aê Diê čiăng. Klei anei ăt brei ƀuh jih jang grăp čô mnuih mơak sơăi mŭt hlăm klei bi mguôp mrâo. Klei tŭ jing diñu klă sĭt bi tuôm hŏng Aê Diê leh anăn Ñu brei kơ digơ̆ klei êđăp ênang mơ̆ng pă tĭng (êlan 19).
Drei ăt mâo sa klei hdĭp amâo kluôm dhuôm ôh, sa klei hdĭp ăt adôk mâo rup yang hjăn pô, ăt adôk rông klei pô khăp, klei mơak mơ̆ng lăn ala anei, kyua klei hdĭp drei khăng luč klei êđăp ênang (Rôm 8:6). Hruê anei jing mông hlăk grăp čô drei jih ai tiê ksiêm dlăng mâo mơ̆ ya bruă hlăm klei hdĭp pô ka jih ai tiê, jih ai ktang, jih klei mĭn hŏng Aê Diê, kƀah klei gưt asăp leh anăn ka khăp kơ Aê Diê kluôm ênŭm. Akâo kơ Aê Diê brei drei jih ai tiê lŏ bi mguôp hŏng Aê Diê hŏng klei lăm lui jih jang anôk dlông, rup yang adôk mâo hlăm klei hdĭp pô leh anăn ƀuăn rơ̆ng hŏng Aê Diê srăng jih ai tiê, jih klei mĭn tui duah Aê Diê. Klă sĭt drei srăng dưi bi tuôm hŏng Aê Diê, Ñu srăng hơêč hmưi, brei klei êđăp ênang.
Drei ƀuh ya rup yang dôk mâo hlăm klei hdĭp pô? Diih jih ai tiê, klei mĭn duah Aê Diê leh mơ̆ amâodah ka?
Wah lač: Ơ Aê Diê, akâo kơ Ih brei kâo thâo leh anăn jih ai tiê bi rai ti anôk dlông, rup yang hlăm ai tiê kâo. Akâo kơ Ih brei kâo lŏ ƀuăn rơ̆ng hŏng Aê Diê, mâo klei hdĭp jih ai tiê tui duah, kkuh mpŭ kơ Aê Diê, gưt asăp Ih leh anăn mă bruă kơ Ih, srăng ngă ya mta klei Ih čiăng kâo ngă.
Dlăng klei Aê Diê Blŭ hlăm tlâo thŭn: Y‑Êsai 49:22‑51:3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
