II Xwmtxheej 15:8-19
Nqe cim:
“Lawv coglus hais tias lawv yuav pehawm tus Tswv uas yog lawv cov yawgkoob tus Vajtswv kom kawg siab kawg ntsws” (II Xwmtxheej 15:12).
Lus nug rau sawvdaws xav:
- Cov neeg Yudais sib sau tuaj hauv nroog Yeluxalees ua dabtsi?
- Lawv ua tes haujlwm no los ntawm nplooj siab licas? Lawv txais tau yam dabtsi?
- Peb puas tabtom nrhiav tus Tswv kawg siab kawg ntsws?
Thaum hnov tus cevlus Axaliyas tej lus qhia, txawm tsis muaj ib lo lus twg samhwm kom ua, los vajntxwv Axas yeej ua tes haujlwm txhim kho sab kev ntseeg nyob txhua qhov. Vajntxwv rhuav tshem “tej mlom” qias vuab tsuab tawm hauv nws lub tebchaws mus; nws rov kho tus Tswv lub thaj; thiab nqua hu cov pejxeem tuaj hauv Yeluxalees coglus rau tus Tswv.
Cov Yixalayees tej lus cogtseg nrog Vajtswv saum roob Xinais, tau tus Tswv haivneeg muab los nyeem rau sawvdaws hnov, thaum pom hais tias sawvdaws cheemtsum ua kom tej lus cogtseg ntawd tshiab hauv lubneej (II Kevcai 29:1-29; Yausuas 8:30-35). Cov Yudas tau tig mus pe mlom ib ntus ntev loo, lawv tsis quav ntsej thiab tsis tas siab pehawm tus Tswv. Zeem paub hais tias cov pejxeem kev cheemtsum sab ntsujplig, yog nrhiav tus Tswv tas siab tas ntsws, yog li ntawd thaum hnov tus cevlus Axaliyas tej lus qhia, vajntxwv Axas thiaj nqua hu cov pejxeem rov coglus rau tus Tswv dua. Nyob hauv rooj sib ntsib no, lawv coglus hais tias lawv yuav pehawm tus Tswv uas yog lawv cov yawgkoob tus Vajtswv kom kawg siab kawg ntsws. Kev nrhiav tus Tswv zaum no yog kev nrhiav tseeb rau qhov txhua tus, tsis hais tus laus lossis tus hluas, yog leejtwg tsis pehawm tus Tswv, yuav muab tus ntawd tua povtseg vim tus uas tsis pehawm tus Tswv yog tus tseem xav pe mlom thiab tawm tsam Vajtswv.
Cov pejxeem qw nrov nrov thiab coglus rau tus Tswv. Raws li cov neeg Yudas thaum ub, ib lo lus cogtseg twg yuav tsum muaj lus twv nrog rau (Nehemis 10:28-39; I Xwmtxheej 16:15-17). “Tagnrho cov Yudas zoo siab kawg li” rau qhov lawv tau coglus nrhiav tus Tswv kawg siab kawg ntsws. Qhov no qhia hais tias lawv txhua tus zoo siab rau lo lus cogtseg tshiab. Thaum kawg lawv thiaj tau ntsib tus Tswv thiab tus Tswv pub lawv muaj kev thajyeeb noj qab nyob zoo txhua fab (nqe 19).
Peb lubneej kuj tsis zoo txaus, tseem muaj ntau yam ua mlom hauv lubneej, tseem muaj tej kev ntshaw, kev lom zem raws ntiajteb, vim li ntawd peb lubneej thiaj tsis kaj siab (Loos 8:6). Hnub no yog hnub zoo rau peb tig los xav, saib tseem muaj yam twg hauv lubneej tsis tau kawg siab kawg ntsws rau tus Tswv, tsis mloog lus thiab tsis tau hlub tus Tswv kom tsimnyog. Thov tus Tswv pab peb paub txiav txim siab rov coglus rau tus Tswv los ntawm qhov uas rhuav tej chaw teev dab, tej mlom uas tseem nyob hauv peb lubneej povtseg mus thiab coglus nrhiav tus Tswv kawg siab kawg ntsws. Yog ua li ntawd peb thiaj yuav nrhiav ntsib tus Tswv, tau Nws foom koobhmoov thiab pub muaj kev thajyeeb hauv lubneej.
Thov Vajtswv
Tus Tswv, thov qhia nyuam yaus paub txiav txim siab rhuav tshem tej qhov chaw siab, tej mlom hauv nyuam yaus lub siab povtseg mus. Thov cia nyuam yaus rov coglus nrog Koj, nrhiav Koj, pehawm Koj kawg siab kawg ntsws, ua txhua yam raws li Koj lub siabnyiam. Amees.
Hauv peb lubneej tseem muaj tej mlom twg? Nej puas tau kawg siab kawg ntsws nrhiav tus Tswv lawm tau?
Nyeem Vajluskub hauv peb lub xyoos: Yaxayas 49:22-51:3
Kênh Youtube BHKTHN:
