Klei Aê Diê Blŭ: II Klei Yăl Dliê 20:22-37
Êlan kliăng: “Klei huĭ kơ Aê Diê truh kơ jih jang ƀuôn ala mtao čar jĕ giăm tơdah diñu hmư̆ kơ Yêhôwa bi blah leh hŏng phung roh phung Israel.” (II Klei Yăl Dliê 20:29)
Klei êmuh ksiêm mĭn: Ya boh tŭ dưn mâo mơ̆ng klei mtao Y‑Jôsaphat wah lač leh anăn đăo? Ya klei mñă kơ ih hlăm klei hdĭp mơ̆ng klei yăl dliê anei?
“Aê Diê amâo jing sa čô mnuih ôh, tơl Ñu luar, amâodah sa čô anak êkei mnuih, tơl Ñu bi mlih klei Ñu mĭn. Ya klei Ñu lač leh, Ñu amâo srăng ngă klei anăn mơ̆? Ya klei Ñu hưn leh, Ñu amâo srăng bi truh klei anăn mơ̆?” (Klei Yap 23:19). Klei yăl dliê hruê anei bi sĭt klei sĭt nik anei, tơdah klei đăo kyua hŏng klei wah lač đru leh mtao Y‑Jôsaphat bi knal klei ktang myang Aê Diê. “Tơdah diñu dơ̆ng mmuñ leh anăn bi mni, Yêhôwa mkra sa phung dôk kăp ngă kơ phung Amôn, phung Môap, leh anăn phung čư̆ Sêir, phung anăn hriê leh čiăng ngă kơ phung Yuđa … leh anăn bi rai digơ̆ jih …. Tơdah phung Yuđa truh kơ sang tum hlăm kdrăn tač, diñu dlăng phă phung lu anăn leh anăn nĕ anei, phung anăn jing asei mlei djiê leh dôk đih ti lăn; amâo mâo sa čô tlaih ôh.” (êlan 22-24). Klei yuôm bhăn mdê êdi, klei ktang myang Aê Diê bi êdah “tơdah diñu dơ̆ng mmuñ leh anăn bi mni!”
Ti djiêô klei dưi hĭn hŏng bruă lĭng kahan, snăn klei bi knal kơ klei Khua Yang bi mtlaih đru kơ klei hdĭp mngăt ai tiê phung ƀuôn sang đĭ kdlưn hĭn, klei hơ̆k mơak êbeh dlai leh anăn klei mpŭ mni truh kơ hnơ̆ng dlông mrâo hĭn. “Ti hruê tal pă diñu bi kƀĭn hlăm tlung Bêraka, kyuadah tinăn diñu mpŭ mni kơ Yêhôwa …” (êlan 26). “Bêraka” mblang jing “Klei jăk jĭn”, leh anăn klei hing mơ̆ng klei bi blah yuôm bhăn mdê lar ktuê hƀuê ênuk phung ƀuôn sang Israel! Kdlưn hĭn mơh, klei dưi hĭn bi blah anei ba klei guh kơang kơ Aê Diê wăt hlăm jih jang ƀuôn ala mtao čar jĕ giăm (êlan 29-30).
Ƀiădah lĕ, klei yăl dliê amâo mjưh ruê̆ hŏng klei jăk siam ôh. Kyua klei hơ̆k kdơ̆k đei leh mâo klei dưi hĭn bi blah, mbĭt hŏng klei amâo lŏ mđing uêñ kơ klei hdĭp mngăt ai tiê leh anăn kyua kƀah ai mĭn wah lač tui duah klei Aê Diê čiăng, atăt mtao Y‑Jôsaphat ngă sa klei soh prŏng ñu tuôm ngă leh êlâo anăn, anăn jing klei “bi mguôp hŏng Y‑Ahasia mtao Israel, pô ngă klei ƀai” (êlan 35), leh anăn mtao tŭ klei Aê Diê bi kmhal khăng ktang snăk (êlan 37, bi msĕ hŏng II Klei Yăl Dliê 19:2). Klei hriăm ruă ênguôt anei mñă kơ drei, čuăn gưt ngă klei Khua Yang čiăng, bi kdơ̆ng hŏng klei kđeh tluh, jing sa klei bi blah sui dlông. Drei amâo knŏng tui duah klei dưi hĭn hlăm hjăn sa klei bi blah ôh, ƀiădah klei bi blah tơl jih klei hdĭp. Khua ƀĭng kna Y‑Pôl mñă phung đăo kơ Krist amâo dưi mơak hrăp nanao hŏng klei drei dôk jing ară anei hĭn ôh, ƀiădah brei “kâo wơr bĭt hĕ klei ti tluôn leh anăn hung kơ klei ti anăp. Kâo hung čiăng truh kơ anôk bi kčah, čiăng mă klei mưn jing klei Aê Diê iêô hlăm Krist Yêsu kơ klei hdĭp ti dlông.” (Philip 3:14). Hĭn mơh, klei soh bi hmăi sui dlông hlăm klei hdĭp sa čô mnuih. Mâo lu klei mưng ngă soh brei phung tui hlue Khua Yang “hŏng Yang Mngăt Jăk diih bi mdjiê bruă soh asei mlei ngă, diih srăng hdĭp.” (Rôm 8:13). Klei dưi hĭn hŏng klei soh sa blư̆, amâo djŏ ôh ăt srăng dưi hĭn nanao hŏng klei soh anăn, kyuanăn brei dôk răng nanao, čiêm rông klei hdĭp nao giăm Khua Yang leh anăn đup gưt klei Ñu Blŭ.
Kơ ya mta kdrêč hlăm klei hdĭp drei dôk răng?
Wah lač: Ơ Khua Yang, bi mni lač jăk kơ Khua Yang kyua brei kâo dưi jing anak Ih, dôk hlăm klei Khua Yang kiă kriê, răng mgang. Brei kâo đăo knang nanao kơ Khua Yang, leh anăn dôk sĭt suôr êbat tui hlue klei Ih atăt gai. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Êphêsô 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
