II Xwmtxheej Vajntxwv 20:22-37
Nqe cim:
“Txhua haivneeg uas hnov hais tias tus Tswv tau pab cov Yixalayees tua yeej lawv cov yeebncuab, mas ua rau lawv ntshai kawg li.” (II Xwmtxheej Vajntxwv 20:29)
Lus nug rau sawvdaws xav:
– Nqi zog ntawm Vajntxwv Yehausafas kev thov Vajtswv thiab kev ntseeg yog dabtsi?
– Peb kawm tau yam dabtsi hauv zaj lus no rau peb kev ua neej?
“Vajtswv tsis zoo li tej neeg uas pheej hais lus dag; Nws tsis yog tus uas pheej yuav hloov siab. Nws coglus li cas, nws yeej ua li ntawd; nws hais li cas, yeej muaj li nws hais.” (Teev Npe 23:19). Zaj lus hnub no ua timkhawv rau qhov tseeb thaum Vajntxwv Yehausafas thov Vajtswv ntawm txojkev ntseeg ua rau nws tau txais Vajtswv lub hwjchim. “Thaum lawv pib hu nkauj, tus Tswv txawm ua rau yeebncuab cov tubrog yoob tas… thiab…tuag tas huv tibsi… Thaum cov tubrog Yudas mus txog saum lub ncov roob ntawm tiaj suabpuam, lawv tsa qhovmuag ntsia pom cov yeebncuab tuag pawglug rau hauv av tsis seem ib tug li.” (nqe 22-24). Qhov tshwjxeeb, Vajtswv lub hwjchim qhia tshwm “thaum lawv pib hu nkauj”.
Dua li qhov uas kovyeej kev tsovrog ces lawv tau txais Vajtswv txojkev pab cawm ua rau lawv lub neej sab ntsujplig loj hlob, kev zoo siab puv npho thiab kev qhuas mus txog qib siab kawg nkaus. “Hnub plaub lawv thiaj mus sib sau rau hauv lub Hav Npelakas thiab ua tus Tswv tsaug…” (nqe 26). “Npelekas” txhais tau hais tias “koob hmoov”, thiab lub suab npe kob tsovrog no nyob ntev loo hauv cov Yixalayees keebkwm! Dua li ntawd, qhov kev muaj yeej no ua rau Vajtswv tau ntsejmuag nyob hauv lwm haivneeg (nqe 29-30).
Tiamsis zaj xwm no tsis xaus kiag ntawd qhov uas zoo mus li. kev loj hlob tom qab uas muaj yeej thiab nrog rau qhov kev ua xyem xyav sab ntsujplig, tsis muaj kev thov Vajtswv ua rau Vajntxwv Yehausafas ua txhaum loj heev ib yam li uas nws twb ua txhaum dhau los lawm, qhov ntawd yog “Vajntxwv Yehausafas tau koom tes nrog cov Yixalayees tus Vajntxwv Ahaxiyas uas ua ntau yam kev phem kev qias.” (nqe 35), thiab vajntxwv raug Vajtswv rau txim hnyav heev (nqe 37, piv rau II Xwmtxheej Vajntxwv 19:2). Zaj kawm txaus tu siab no qhia rau peb paub txiav txim siab ua raws li tus Tswv, tawmtsam nrog yus tej kev ntshaw yog ib kob tsovrog ntev heev. Peb tsis yog nrhiav txojkev muaj yeej hauv ib kob tsovrog xwb tiamsis yog muaj yeej hauv kev ua neej. Timthawj Paulus ntuas cov ntseeg kom tsis txhob txaus siab rau yam yus muaj tamsim no, tiamsis yuav tsum khiav ncaj nraim mus rau tus ciam tom kawg kom…tau nqi zog. Qhov nqi zog ntawd yog txojsia ntev dhawv mus ibtxhis uas Vajtswv khaws cia rau saum ntuj ceebtsheej tos peb cov uas ntseeg Yexus Khetos. (Filipis 3:14). Dua li ntawd, kev txhaum nws ua hiam ib tug neeg lub neej ntev loo. Muaj tej yam kev nyiam ua txhaum uas tus neeg nrog tus Tswv mus yuav tsum vam khom Vaj Ntsujplig qhia, raws li Vajtswv txoj lus hais tias “…yog nej ua nej lub neej raws li Vaj Ntsujpliag qhia, nej thiaj yuav tso tau nej tej kev txhaum tseg thiab nej yuav tau txojsia” (Loos 8:13). Kovyeej kev txhaum ib zaug tsis txhais tias yeej yuav kovyeej mus li, yog li yuav tau ceevfaj, ua neej nyob ze tus Tswv thiab ua raws li Nws tej lus qhia.
Thov Vajtswv,
Tus Tswv, nyuam yaus ua Koj tsaug vim tau los ua Koj menyuam, tau Koj saib xyuas tiv thaiv. Thov Koj pab kom nyuam yaus niaj hnub vamkhom, cia siab, thiab ncaj ncees thaum nrog Koj mus. Nyuam yaus tuav Tswv Yexus lub npe thov, Amees.
Peb ceevfaj thiab ua tib zoo ua hauv lub neej rau seem twg?
Nyeem Vajluskub hauv peb lub xyoo: Efexus 4
Kênh Youtube BHKTHN:
