Klei Aê Diê Blŭ: Y-Yêrêmi 23: 33-40.
Êlan kliăng: “Snei diih srăng lač grăp čô kơ pô riêng gah ñu leh anăn grăp čô kơ ayŏng adei ñu, Ya klei Yêhôwa lŏ wĭt lač leh? Amâodah Ya klei Yêhôwa blŭ leh?” (Y-Yêrêmi 23:35).
Klei êmuh ksiêm mĭn: Ya klei ktrŏ Yêhôwa čiăng lač? Hbĭl phung hâo hưn Klei Aê Diê Blŭ amâo brei lŏ ngă leh anăn bi kmhal? Klei mnuih ƀuôn sang, phung khua hưn êlâo leh anăn phung khua ngă yang čiăng êmuh ya jing? Si ngă klei brei drei ngă ti anăp klei ƀuah ăl mơ̆ng Khua Yang amâo dah klei blŭ mguôp mơ̆ng phung mkăn?
Boh blŭ “klei ktrŏ” khăng dưi yua lač kơ Klei Aê Diê Blŭ kơ phung khua pô hưn êlâo (Y-Malaki 1:1). Kyua anăn, pruê̆ blŭ “Klei ktrŏ Yêhôwa blŭ” jing dŭm Klei Aê Diê Blŭ brei kơ Khua pô hưn êlâo Y-Yêrêmi čiăng kơ ñu hiu hưn klei Aê Diê bi kmhal kơ mnuih ƀuôn sang Yêrusalem leh anăn Yuđa kyua klei diñu ngă soh. Klei Yêhôwa Blŭ, tơdah hlei jing mnuih ƀuôn sang, khua pô hưn êlâo amâo dah khua ngă yang êmuh “Ya klei ktrŏ Yêhôwa čiăng lač?” (êlan 33), amâo dah tơdah diñu lač “Klei ktrŏ Yêhôwa,” (êlan 34) srăng bi kmhal. Mta phŭn ngă kơ phung lač snăn brei tŭ klei bi kmhal kyua diñu amâo mpŭ kơ klei Aê Diê mtă, diñu hiu hưn Klei Aê Diê Blŭ ƀiădah diñu hiu mčeh, amâo djŏ jing klei ktrŏ mơ̆ng Yêhôwa, snăn diñu dôk hlăp lêñ, bi msoh kơ klei blŭ mơ̆ng Yêhôwa dưi hưn mơ̆ng khua pô hưn êlâo mơ̆ng Ñu. Tơdah diñu klă sĭt čiăng duah klei Khua Yang ciăng tui hluê, snăn diñu brei êmuh khua pô hưn êlâo mơ̆ng Ñu amâo dah phung riêng gah pô snei, “Ya klei Yêhôwa lŏ wĭt lač leh? Ya klei Yêhôwa blŭ leh? (êlan 35, 37)
Mnuih ƀuôn sang, phung khua pô hưn êlâo leh anăn khua ngă yang hlăp lêñ klei hưn êlâo hriê mơ̆ng Yêhôwa kyua phung pô hưn êlâo anăn bi kdơ̆ng hŏng diñu, lač kơ klei diñu ngă soh leh anăn klei bi kmhal diñu srăng tŭ mơ̆ng Yêhôwa. Hrô kơ bruă thâo kơ klei pô soh čiăng kmhal leh anăn akâo klei pap mơ̆ng Aê Diê, diñu lŏ ruah hdră mgao klei guh kơang mơ̆ng Aê Diê. Kyua anăn, Aê Diê kăm diñu hiu hưn “Klei ktrŏ mơ̆ng Yêhôwa” (êlan 36) čiăng amâo dưi mplư mnuih ƀuôn sang.
Klei anei amâo mdê ôh hŏng grăp čô drei, tơdah lu blư̆ drei hmư̆ Khua Yang ƀuah ăl hrô kơ kmhal klei soh, snăn lu mnuih bi kdơ̆ng hŏng klei tlao mưč, kjham hĭn lŏ bi tăng mgăl hŏng klei bi hriăm mơ̆ng phung mă bruă kpă ênuah mơ̆ng Khua Yang kyua digơ̆ jhŏng lač dŭm klei drei ngă soh. Amâo dah sĭt phung ayŏng adei hlăm Krist mâo klei lač kơ bruă ka djŏ hlăm klei drei hdĭp snăn drei lŏ wĭt tlao mưč hŏng dŭm klei blŭ mguôp anăn. Mđing hmư̆ bĕ Klei Aê Diê Blŭ čih leh anăn brei drei êmuh phung riêng gah snei “Ya klei Yêhôwa lŏ wĭt lač leh? Ya klei Yêhôwa blŭ leh? čiăng thâo klei Khua Yang čiăng hlăm klei hdĭp pô.
Drei kpă ênuah mơ̆ sĭt hâo hưn Klei Aê Diê Blŭ leh anăn kpă ênuah mơ̆ sĭt tŭ mă Klei Aê Diê Blŭ?
Ơ Khua Yang Aê Diê! Akâo kơ Ih bi hriăm kâo mơ̆ng Klei Aê Diê Blŭ amâo dah mơ̆ng ya hdră Ih čiăng, akâo kơ Ih đru kâo luă gŭ tŭ mă klei bi hriăm, mñă mơ̆ng Ih čiăng dưi bi mlih leh anăn amâo tŭ mă klei bi kmhal mơ̆ng Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 10
Kênh Youtube BHKTHN:
