Klei Aê Diê Blŭ: II Klei Yăl Dliê 22:8-12
Êlan kliăng: “Brei ih thâo sĭt mnuih soh amâo srăng tlaih kơ klei bi kmhal ôh, ƀiădah phung kpă ênô srăng tlaih.” (Klei Bi Hriêng 11:21)
Klei êmuh ksiêm mĭn: Ya klei truh prŏng kơ găp djuê mtao Y‑Ahasia? Si ngă klei truh anei mâo klei yuôm snăk hlăm hdră klei bi mtlaih mơ̆ng Aê Diê? Ya klei drei thâo săng kơ klei kiă kriê leh anăn klei sĭt suôr Aê Diê? Mơ̆ng klei anăn si drei bi êdah klei thâo hdơr knga kơ Aê Diê?
Klei ênguôt prŏng truh kơ găp djuê mtao Y‑Jôas kčưm dơ̆ng mơ̆ng aê ñu jing mtao Jôram dôk H’Athali, anak mtao Y‑Ahap leh anăn Jêsabel, jing sa čô mtao Israel jhat ƀai snăk sơưn. Năng ai mtao Jôram čiăng bi mguôp hŏng Israel snăn ñu ba H’Athali, msĕ si sa drei “ala kĕ djiê”, mŭt hlăm sang pô, leh anăn “ala kĕ djiê” anei yơh êdei kơnăn lăm păt čiăng jih mliêt găp djuê Y‑Đawit.
Hlăk mtao Jôram djiê, H’Athali gai anak ñu jing mtao Y‑Ahasia tui êlan jhat ƀai mtao Y‑Ahap atăt truh kơ klei djiê mtao Y‑Ahasia (êlan 8-9). “Tơdah H’Athali amĭ Y‑Ahasia, ƀuh kơ anak êkei ñu djiê leh, ñu kgŭ leh anăn bi rai jih jang găp djuê mtao sang Yuđa” (êlan 10). H’Athali jhat ƀai bi mdjiê jih phung čô ñu pô. Leh anăn klei huĭ hyưt hĭn jing klei myang klei mmăt dôk mă bruă hlăm ñu kyuadah Satan čiăng khăt tloh bi tuč djuê ana mtao Y‑Đawit. Klei ngă jhat anei ăt mblang jing klei čiăng bi rai hdră bruă klei bi mtlaih Aê Diê mkra hŏng klei Yang Krist trŭn jing mnuih kbiă hriê mơ̆ng găp djuê Y‑Đawit (II Bruă Mtao 8:19; Klei Mmuñ Hđăp 132:17). Mơ̆ng klei anei, drei ƀuh jih jang klei truh ti lăn ala mâo phŭn knhal myang ti tluôn, leh anăn Satan dôk duah djăp êlan čiăng bi rai hdră bruă klei Aê Diê bi mtlaih wăt čiăng bi rai Phung Sang Aê Diê Ñu.
Ƀiădah Aê Diê ăt dôk kiă kriê ti dlông jih jang klei. Ñu mprăp dua čô huĭ mpŭ kơ Aê Diê leh anăn mâo klei jhŏng, jing H’Jôsabêat, adei mtao Y‑Ahasia, leh anăn ung ñu jing khua ngă yang Y‑Jêhôida, pŭ mđuĕ Y‑Jôas anak êkei mtao mdăp hlăm adŭ pĭt. Êlâo kơnăn drei amâo tuôm hmư̆ bơ̆k bâo kơ dua čô ung mô̆ anei ôh, ƀiădah Aê Diê mprăp leh diñu kơ hdră bruă Ñu. Brei drei thâo mprăp klei hdĭp drei leh anăn mhiêt mkăp mă tŭ bruă klam Khua Yang jao tui si hruê mmông Ñu.
Yuôm bhăn êdi H’Jôsabêat dưi mdăp Y‑Jôas anak êkei mtao tlaih mơ̆ng klei H’Athali tui duah bi mdjiê hlăm brô 6 thŭn (êlan 11-12). Satan yua leh H’Athali čiăng bi tuč djuê ana Y‑Đawit ƀiădah Satan amâo đăo đing ôh klei anei kyuadah Aê Diê amâo brei Satan thâo ôh. Aê Diê guôm leh ală êmông gu čiăng răng mgang Y‑Đaniel, leh anăn Ñu bi guôm ală H’Athali čiăng răng mgang Y‑Jôas anak êkei mtao, jing djuê ana mtao Y‑Đawit. Lu mnuih dưi lač klei anăn jing kyua klei myun mdhut ƀiădah amâo thâo kral ôh klei Aê Diê kiă kriê hŏng klei khăp leh anăn klei pap čiăng hdơr knga bi mni kơ Ñu. Thâo kral klei Aê Diê kiă kriê răng mgang thiăm brei kơ drei klei jhŏng čiăng mă tŭ bruă klam Aê Diê jao leh anăn hdĭp thâo hdơr knga kơ Ñu.
Si ngă drei hdơr knga bi mni kơ Khua Yang kơ klei Ñu kiă kriê răng mgang klei hdĭp drei mơ̆?
Wah lač: Ơ Khua Yang, bi mni kơ Khua Yang kyua klei jăk klei pap Ih brei kơ kâo hŏng klei Ih djă pioh, răng mgang, kiă kriê kâo mbĭt hŏng găp djuê kâo grăp hruê. Brei kâo thâo hdơr knga kơ Khua Yang nanao.
Dlăng Klei Aê Diê Blŭ hlăm tlâo thŭn: Y‑Êsai 64:1–65:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
