II Xwmtxheej Vajntxwv 22:8-12
Nqe cim:
“Koj yuav tsum paub hais tias cov neeg ua phem ua qias yuav raug txim, tiamsis cov neeg ncaj ncees yuav khiav dim” (Pajlug 11:21).
Lus nug rau sawvdaws xav:
- Vajntxwv Ahaxiyas tsev neeg ntsib xwm dabtsi?
- Vim li cas tej xwm tshwmsim no muaj nqis rau Vajtswv tes haujlwm cawmdim?
- Peb pom Vajtswv kev ua ncaj thiab Nws tes haujlwm pov puag zoo li cas?
- Dhau zaj kawm no peb yuav ua Vajtswv tsaug li cas?
Tos muaj tej xwm no tshwm los rau haiv neeg Yudais tus vajntxwv tsev neeg twb yog vim tus vajntxwv nram Yudais tebchaws mus yuav cov Yixalayees tus vajntxwv li ntxhais los rau nws tus tub ua pojniam, qhia cov Yudais ua txhaum tawm tsam Vajtswv.
Athaliyas yog cov Yixalayees tus vajntxwv Ahaj tus ntxhais. Athaliyas yog ib tug neeg siab phem li nws niam Yexenpees, nws coj cov Yudais tus vajntxwv tsev neeg mus ua txhaum tawm tsam Vajtswv (nqe 2-3). Thaum hnov hais tias Ahaxiyas uas yog nws tus tub raug tua tuag lawm, “nws samfwm kom luag muab vajntxwv Ahaxiyas cov tub tua tuag tas huv tibsi” (nqe 10). Poj vajntxwv Athaliyas muaj lub siab phem tua nws tej xeebntxwv kom tuag tu noob. Qhov uas poj vajntxwv Athaliyas ua ntawd yog nws siv Ntxwgnyoog lub fwjchim phem los rhuav vajntxwv Daviv cajces kom tu noob. Tej haujlwm uas poj vajntxwv ua muaj lub ntsiab hais tias, nws rhuav Vajtswv tes haujlwm npaj kev cawm dim uas yuav muaj los hauv vajntxwv Daviv cajces (II Vajntxwv 8:19; Ntawv Nkauj 132:17). Los ntawm tej xwm no ua rau peb pom hais tias, txhua yam xwm phem uas tshwm muaj hauv lub ntiajteb yeej muaj yam ntsigtxog sab ntsujplig, thiab Dab Ntxwgnyoog yeej yuav muab txhua yam tuaj tabkaum Vajtswv tes haujlwm pab cawm tibneeg thiab Dab kuj nrhiav kev rhuav Vajtswv lub Pawg Ntseeg nyob txhua tiam los txog nimno.
Txawm li ntawd los, Vajtswv tseem yog tus kav txhua yam uas nyob hauv qab ntuj no huv tibsi. Vajtswv npaj muaj ob tug uas fwm Vajtswv thiab muaj lub siab tawv, nkawd yog Yehausenpas uas yog Ahaxiyas tus muam thiab nws tus txiv uas yog tus povthawj Yehauyadas, nkawd muab Ahaxiyas ib tug tub hu ua Yau-as coj mus zais. Vajtswv npaj ob tug ntawd los ua Vajtswv tes haujlwm thaum txog lub sijhawm uas cheemtsum siv. Peb yuav tsum fwm Vajtswv thiab npaj kom txhij lub neej txhua lub sijhawm rau Vajtswv tau siv, kam ris lub nra thaum tau Vajtswv txib ua ib txoj haujlwm twg.
Tseeb yog ib qho txujci uas txawv heev vim Yehausenpas zais tau Yau-as tsis pub Athaliyas nrhiav pom mus txog rau xyoo (nqe 11-12). Dab Ntxwgnyoog siv Athaliyas los rhuav vajntxwv Daviv cajces kom tu, tiamsis Dab tsis paub Vajtswv kev npaj muaj neeg los tav Dab tes haujlwm ntawd. Vajtswv xauv tej tsov ntxhuav qhov ncauj thiab tiv thaiv Daniyees thiab Vajtswv kuj npog Athaliyas lub qhov muag thiab tiv thaiv Yau-as uas yog Daviv cajces vajntxwv. Muaj ib txhia xav hais tias qhov ntawd yog tim txoj hmoo, lawv xav tsis txog Vajtswv txojkev tswjkav thiab tsis los ua Vajtswv tsaug. Thaum paub txog Vajtswv kev tiv thaiv, saib xyuas thiab tswjkav, peb yuav ruaj siab thaum tau Vajtswv txib ua ib txoj haujlwm twg los ntawm kev ua Vajtswv tsaug.
Thov Vajtswv,
Tus Tswv, ua Koj tsaug rau yam zoo uas Koj tau tiv thaiv saib xyuas nyuam yaus ua ntu zus dhau los lawm. Thov pab kom nyuam yaus paub nco ntsoov ua Koj tsaug tsis tseg. Amees.
Peb puas paub ua Vajtswv tsaug rau qhov uas Nws tiv thaiv, saib xyuas peb lub neej lawm tau?
Nyeem Vajluskub hauv peb lub xyoo: Yaxayas 64:1-65:7
Kênh Youtube BHKTHN:
