Klei Aê Diê Blŭ: Galati 3:15-20
Êlan kliăng: “Wăt tơdah drei djiê leh hlăm klei soh drei dưn, Ñu lŏ bi hdĭp drei leh mbĭt hŏng Krist (hŏng klei pap yơh diih tlaih leh). ” (Êphêsô 2:5)
Klei êmuh ksiêm mĭn: Ya klei mblang Khua ƀĭng kna Y-Pôl yua hlăm trăn Klei Aê Diê Blŭ hruê anei? Klei bhiăn čih hră jao ngăn drăp kơ pô mkăn leh pô djiê ba kơ phung đăo si klei rơ̆ng? Bruă klei ƀuăn anăn dưi čih êlâo kơ mâo hdră bhiăn ba kơ drei ya klei mđĭ ai?
Leh yua klei mblang mơ̆ng phung đăo ti Galati, leh anăn mơ̆ng Y-Abraham (Galati 3:1-14), Khua ƀĭng kna Y-Pôl lač kơ klei bhiăn čih hră jao ngăn drăp kơ pô mkăn leh pô djiê mơ̆ng anak mnuih čiăng lŏ dơ̆ng mblang. Hlue si klei bhiăn, tơdah hră jao ngăn drăp kơ pô mkăn leh pô djiê amâodah klei bi mguôp mâo čih mkra snăn thiăm amâodah lui ya klei hlăm anăn jing soh hŏng klei bhiăn (êlan 15). Ăt snăn mơh, Aê Diê mâo leh klei bi mguôp hŏng Y-Abraham leh anăn djuê ana ñu, jing Yang Krist, jing phung ƀuôn sang srăng kyua diñu mâo klei jăk mơak leh (Galati 3:8), “Klei kâo čiăng lač snei: klei bhiăn truh pă êtuh tlâo pluh thŭn êdei amâo dưi lăm ôh klei bi mguôp Aê Diê ngă leh êlâo, kăn dưi kơ̆ng rei klei Aê Diê ƀuăn.” (êlan 17)
Hlăm năm êlan Klei Aê Diê Blŭ anei, Khua ƀĭng kna Y-Pôl êma blư̆ yua boh hră “klei ƀuăn”. Êngao anăn, tĭng čih mkra “klei ƀuăn” amâodah “klei bi mguôp” tinei amâo djŏ jing aê drei Y-Abraham ôh ƀiădah jing Aê Diê: “Aê Diê brei leh klei ƀuăn kơ Y-Abraham” (êlan 16), “klei bi mguôp Aê Diê ngă leh êlâo” (êlan 17),… Y-Abraham amâo ngă ôh klei bi mguôp hŏng Aê Diê, ƀiădah Aê Diê ngă hŏng ñu. Leh anăn Aê Diê ăt kăn kčah ya klei brei ngă amâodah mgô̆ brei ñu ngă ya bruă (Klei Mphŭn Dơ̆ng kdrêč 13 leh anăn 15). Anei jing klei bi mguôp mơ̆ng klei pap.
Kyua klei bi mguôp Aê Diê ngă hŏng Y-Abraham jing klei bi mguôp klei pap, kyuanăn amâo mâo ôh anôk kơ klei bhiăn. Klei bhiăn knŏng mâo thiăm mbŏ kyua klei anak mnuih ngă soh hlăk êjai dôk guôn “hruê čô čĕ truh”, jing Yang Krist hriê (êlan 19). Klei bhiăn jing klei mâo êdei, amâo ngă kơ anak mnuih jing djăp hnơ̆ng čuăn čiăng dưi mŭt hlăm klei bi mguôp klei ƀuăn ngă leh êlâo anăn ôh.
Bi mni lač jăk kơ Aê Diê tơdah thâo Aê Diê ngă leh klei bi mguôp hŏng Y-Abraham amâo kčah ya sa bruă brei gưt ngă ôh. Mơak snăk tơdah thâo aê kơ klei đăo Y-Abraham hŏng djuê ana ñu mâo ruah leh anăn mâo klei jăk mơak mơ̆ng êlâo kơ mâo klei bhiăn. Hlăm hră mơĭt kơ mnuih Êphêsô, Khua ƀĭng kna Y-Pôl lač kơ klei sĭt nik anei snei: “Wăt tơdah drei djiê leh hlăm klei soh drei dưn, Ñu lŏ bi hdĭp drei leh mbĭt hŏng Krist (hŏng klei pap yơh diih tlaih leh)” (Êphêsô 2:5). Sa klei sĭt nik mơak snăk leh anăn mđĭ ai drei. Kyua thâo drei mâo klei bi tui êlâo kơ drei gưt asăp Aê Diê amâodah bi mơak kơ Ñu, kyua anăn gưt asăp Aê Diê jing bruă ngă mơ̆ng ai tiê hdơr knga leh anăn klei mơak. Akâo kơ Aê Diê đru drei hdĭp hlăm klei mơak leh anăn klei hdơr knga kơ Aê Diê grăp hruê kyua mnơ̆ng brei klei bi mtlaih yuôm bhăn Aê Diê pioh kơ grăp čô drei.
Drei mâo leh klei bi mtlaih mơ̆ng klei ktrŏ kơ bruă brei drei ngă čiăng mâo Aê Diê tŭ ư leh mơ̆ amâodah ka?
Wah lač: Ơ Khua Yang, kâo bi mni kơ Ih kyua Ih yơr kngan bi mtlaih kâo mơ̆ng êlâo kơ kâo hlue ngă Klei Ih Blŭ mtô. Akâo kơ klei mơak leh anăn ai tiê hdơr knga kơ Ih kyua mnơ̆ng yuôm bhăn klei bi mtlaih dôk nanao hlăm ai tiê kâo leh anăn mđĭ ai kâo hdĭp bi mơak kơ Ih grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
