Kalatias 3:15-20
Nqe cim:
“Peb tsis mloog Vajtswv lus thiab peb zoo li cov neeg uas tuag lawm los Vajtswv tseem pub peb rov muaj txojsia ib yam li Vajtswv tau tsa Yexus Khetos sawv hauv qhov tuag rov qab los. Vajtswv hlub nej kawg li, Vajtswv thiaj li cawm kom nej dim.” (Efexus 2:5)
Lus nug rau sawvdaws xav:
– Timthawj Paulus siv dabtsi los hais hauv ntu Vajluskub hnub no?
– Txojcai hauv kev coglus ua rau cov ntseeg Kalatias tau qhov tabpov twg?
– Qhov uas tej lus cogtseg xub muaj ua ntej txoj kevcai ua rau peb tau txhawb zog licas?
Tomqab uas siv cov ntseeg hauv Kalatias tej lus thiab yawgkoob Anplahas lubneej los piav qhia (Kalatias 3:1-14), Timthawj Paulus muab txojcai coglus tseg ntawm tibneeg los hais ntxiv. Raws li ib txwm, thaum sib coglus lawm ces txawm yuav txhab ntxiv thiab rho tawm ib yam twg los puavleej txhaum cai (nqe 15). Ib yam nkaus li ntawd, tus Tswv tau coglus tseg rau Anplahas thiab nws tus xeebntxwv, uas yog Tus Cawmseej lawm hais tias txhua haivneeg yuav tau koob hmoov dhau ntawm Nws (Kalatias 3:8), “Vajtswv twb coglus tseg tau plaub puas peb caug xyoo lawm, mam li muaj Vajtswv txoj kevcai. Yog li ntawd, Vajtswv txoj kevcai yeej rhuav tsis tau Vajtswv lo lus cog tseg” (nqe 17).
Nyob hauv rau nqe Vajluskub no, Timthawj Paulus siv tsib zaug lo lus “coglus”. Dua li ntawd, tus uas xub “coglus” ntawm no tsis yog yawgkoob Anplahas tiamsis yog Vajtswv raws li Vajtswv Txojlus hais tias: “Vajtswv coglus rau Anplahas” (nqe 16), “Vajtswv yog tus uas coglus tseg rau Anplahas” (nqe 17),… Yawgkoob Anplahas tsis yog tus coglus rau Vajtswv, tiamsis yog Vajtswv coglus rau nws. Thiab Vajtswv kuj tsis taij kom nws yuav tsum ua ib yam dabtsi hlo li (Chivkeeb tshooj 13 thiab 15). Ntawm no yog tej lus cogtseg ntawm txoj koob hmoov hlub.
Vim tej lus cogtseg uas tus Tswv cog rau Anplahas yog lus cogtseg kev hlub, thiaj tsis muaj chaw rau txoj kevcai. Qhov uas muab txoj kevcai tsav rau tej lus cog tseg kuj yog vim qhov uas tsis mloog lus thaum tos “tus caj ces”, uas yog Tus Cawmseej los txog (nqe 19). Txoj kevcai yog yam muaj tomqab, tsis pab kom tibneeg muaj txaus peevxeem mus rau hauv tej lus cogtseg uas twb cog ua ntej lawm.
Ua tus Tswv tsaug kawg nkaus li thaum paub hais tias tus Tswv tau coglus tseg rau yawgkoob Anplahas tsis taij kom yuav tsum ua dabtsi pauj. Zoo siab kawg li thaum paub hais tias yawgkoob Anplahas thiab nws caj ces tau xaiv thiab tau txais koob hmoov ua ntej muaj txoj kevcai. Nyob hauv tsab ntawv xa rau cov ntseeg hauv nroog Efexus, Timthawj Paulus rov hais txog qhov tseeb no hais tias: “Peb tsis mloog Vajtswv lus thiab peb zoo li cov neeg uas tuag lawm los Vajtswv tseem pub peb rov muaj txojsia ib yam li Vajtswv tau tsa Yexus Khetos sawv hauv qhov tuag rov qab los. Vajtswv hlub nej kawg li, Vajtswv thiaj li cawm kom nej dim” (Efexus 2:5). Ntawd yog ib qhov tseeb ua rau peb xyivfab thiab txhawb peb lub zog kawg nkaus li. Vim paub hais tias peb tau cawmdim ua ntej kev mloog tus Tswv lus lossis ua ntej ua haum tus Tswv siab, yog li ntawd mloog tus Tswv lus yog qhov uas peb ua qhia tshwm kev nco tus Tswv txiajntsig thiab kev zoo siab. Thov tus Tswv pub rau peb ua neej hauv kev zoo siab thiab nco tus Tswv txiaj ntsig txhua hnub vim txojkev cawmdim dawb dawb uas tus Tswv muab pub rau peb.
Thov Vajtswv,
Tus Tswv, nyuam yaus ua Koj tsaug vim Koj cev tes pab cawm nyuam yaus ua ntej nyuam yaus ua raws Koj tej lus qhia. Thov kom kev zoo siab thiab kev nco Koj txiajntsig yuav niaj hnub nyob hauv nyuam yaus lub siab thiab txhawb nyuam yaus ua neej haum Koj siab txhua hnub. Nyuam yaus tuav Yexus Khetos lub npe thov, Amees.
Peb puas tau dim lub nra hnyav ntawm kev ua haujlwm kom tau tus Tswv lees yuav lawm tau?
Nyeem Vajluskub hauv peb lub xyoos: II Vajntxwv 14
Kênh Youtube BHKTHN:
