Klei Aê Diê Blŭ: Y‑Yêrêmi 50:3-10
Êlan kliăng: “…Kâo srăng dưm klei bhiăn kâo hlăm lam diñu,leh anăn kâo srăng čih klei bhiăn anăn ti ai tiê diñu; leh anăn kâo srăng jing Aê Diê diñu leh anăn diñu srăng jing phung ƀuôn sang kâo” (Y‑Yêrêmi 31:33b)
Klei êmuh ksiêm mĭn: Si Aê Diê srăng ngă tơdah truh mmông Ñu? Ya klei mâo hlăm klei bi mguôp mrâo hlŏng lar? Klei hriăm mđĭ ai drei ya klei brei ngă tơdah ngă soh hŏng Aê Diê?
Klei Aê Diê mtrŭn kơ phung ƀuôn sang Ñu mơ̆ng Khua pô hưn êlâo Y‑Yêrêmi hưn lăn čar diñu srăng mâo mtao, phung khua êgar Dưr bi kmhal. Ƀiădah truh mmông Yêhôwa, ăt jing tơdah mnuih phung ƀuôn sang Ñu hriăm leh djăp klei hriăm čiăng êdi thâo kral pô ngă soh leh hŏng Aê Diê, Aê Diê srăng wĭr čuă diñu, dưi lŏ wĭt “…đuĕ bĕ mơ̆ng ƀuôn Ƀaƀilôn, leh anăn kbiă bĕ mơ̆ng čar Kaldê, leh anăn jing msĕ si bê knô atăt êpul” (êlan 8). Hjăn Ƀaƀilôn, jing phung ƀuôn sang Aê Diê yua msĕ si sa giê hnuăt čiăng ƀuah mkra phung ƀuôn sang Ñu ruah, snăn truh mmông Aê Diê diñu ăt tŭ klei bi kmhal kyua bi kdơ̆ng leh hŏng Aê Diê msĕ si dŭm ala čar mkăn, “sa găp djuê mơ̆ng dưr đĭ hriê ngă kơ ñu, brei čar ñu jing ênguôl, leh anăn amâo srăng mâo mnuih dôk tinăn ôh; wăt mnuih leh anăn hlô mnơ̆ng srăng đuĕ” (êlan 3).
Dua ala mtao nah Dưr leh anăn nah Dhŭng ti Israel, jing Yuđa leh anăn Israel, êlâo dih kyua klei mâo hlăm hƀuê ênuk anăn mbha jing dua, ară anei “Hlăm hruê anăn leh anăn hlăm ênuk anăn” (êlan 4), lač mdê, găn dŭm hruê mlan Aê Diê phưi diñu hdĭp hlue si klei kđeh čiăng, snăn ară anei hĭn kơ jih jang diñu thâo leh klei hêñ, ênguôt hnĭng kơ klei soh bi ênguôt Aê Diê, kyua anăn “…phung anak čô Israel leh anăn phung anak čô Yuđa srăng hriê mđrăm mbĭt, êbat êjai, hia êjai, leh anăn diñu čiăng duah Yêhôwa Aê Diê diñu.” Diñu amâo luč jih jang klei čang hmăng ôh, ƀiădah lŏ dưi hdĭp hlăm klei čang hmăng tơdah mđing kơ Siôn, anôk Aê Diê dôk leh anăn “hriê leh anăn bi kuôl diñu pô hŏng Yêhôwa hŏng sa klei bi mguôp hlŏng lar diñu amâo srăng wơr bĭt ôh” (êlan 5). Anei jing klei bi mguôp hŏng Aê Diê ƀuăn Ñu “…srăng dưm klei bhiăn kâo hlăm lam diñu, leh anăn kâo srăng čih klei bhiăn anăn ti ai tiê diñu” čiăng diñu amâo wơr, amâo lui msĕ si tuôm bi kruh leh klei bi mguôp hđăp dưi ktur hlăm boh tâo (Klei Mtô Mñă Klei Bhiăn 10:4).
Hgao dŭm hruê mlan jing mnă, hĭn kơ jih jang phung ƀuôn sang Aê Diê găn jih klei ênguôt hnĭng čiăng kmhal klei soh, leh anăn diñu lŏ wĭt hŏng Aê Diê hlăm êa ală. Tơdah wĭt kơ Aê Diê, diñu mâo klei čang hmăng khăp hlăm klei bi mguôp hlŏng lar Aê Diê mkŏ mjing leh hŏng diñu.
Hruê anei drei ăt mâo klei soh hŏng Aê Diê, ƀiădah tơdah drei thâo kmhal wĭt kơ Ñu, Ñu srăng amâo lui drei ôh. Klei sĭt suôr Aê Diê prŏng snăk, klei khăp Ñu êbeh dlai, klei yuôm bhăn hĭn jing drei amâo khăng ai tiê čiăng lĕ êlam hlăm klei soh ôh, ƀiădah thâo kmhal nanao lŏ wĭt păn kjăp klei bi mguôp lă lar Aê Diê hŏng drei.
Drei mâo mơ̆ klei čang hmăng tơdah dlăng kơ Aê Diê?
Wah lač: Ơ Aê Diê bŏ hŏng klei pap! Bi mni kơ Ih kyua klei pap Ih hŏng kâo. Akâo kơ Ih đru kâo thâo lŏ wĭt hŏng Ih hŏng ai tiê kmhal klei soh čiăng kâo dưi hdĭp hlăm klei bi mguôp mrâo lă lar mơ̆ng Ih.Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 15:1-16:16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
