Yelemis 50:3-10
Nqe cim
“…kuv yuav ua kom lawv nco ntsoov kuv tej kevcai rau nruab siab. Kuv yuav ua lawv tus Vajtswv thiab lawv yuav ua kuv haivneeg.”(Yelemis 31:33b).
Lus nug rau sawvdaws xav:
– Vajtswv yuav ua dabtsi thaum txog Nws lub sijhawm?
– Lus cogtseg tshiab mus ibtxhis muaj yam dabtsi tseemceeb?
– Zaj kawm no txhawb peb lub zog kom yuav tsum ua dabtsi thaum ua txhaum rau tus Tswv?
Vajtswv Txojlus uas Yelemis cev rau tus Tswv haivneeg yog lawv lub tebchaws yuav raug cov vajntxwv, nomtswv nyob sab qaumteb tuaj tua kom puastsuaj. Tiamsis txog tus Tswv lub sijhawm, kuj yog lub sijhawm uas tus Tswv haivneeg kawm paub lawv tau tawmtsam Vajtswv, Nws yuav los saib lawv, thiab tau “khiav tawm hauv lub nroog Npanpiloos mus! Cia tso lub tebchaws no tseg! Nej cia li ua cov uas xub khiav ntag!” (nqe 8). Tebchaws Npanpiloos yog lub tebchaws Vajtswv siv ua rab nplawm los qhuab ntuas Nws haivneeg, nimno txog lub sijhawm uas tus Tswv rau txim rau tej uas lawv tawmtsam Vajtswv thiab cov tebchaws, “haivneeg uas nyob rau sab qaumteb yuav tuaj tua lub nroog Npanpiloos kom ua suabpuam tas. Tej neeg thiab tej tsiaj txhu yuav khiav tas tsis nyob hauv lawm” (nqe 3).
Ob lub tebchaws nyob sab qaumteb thiab sab qabteb ntawm tebchaws Yixalayees, yog Yudas thiab Yixalayees, ua ntej ntawd tebchaws raug faib ua ob lub, nimno “thaum txog lub sijhawm ntawd” (nqe 4), hais ua lwm seem lus, dhau tej hnubnyoog uas Vajtswv muab lawv tso tseg mus ua li lawv siab nyiam ua, ces nimno lawv raug kev txajmuag, nyuaj siab txog vim tej kev txhaum uas ua tsis haum Vajtswv siab, yog li “cov Yixalayees thiab cov Yudas yuav quaj los nrhiav kuv uas yog lawv tus Vajtswv”. Lawv tsis tas kev cia siab mus li, tiamsis lawv rov muaj kev cia siab thaum tig mus hauv lub nroog Xi-oos, qhov chaw uas Vajtswv nyob thiab “lawv yuav nrog kuv coglus ruaj khov mus ibtxhis tsis rhuav li lawm” (nqe 5). Nov yog tej lus cogtseg uas Vajtswv hais tias Nws “yuav ua kom lawv nco ntsoov kuv tej kevcai rau nruab siab” kom lawv tsis hnov qab, tsis tso tseg li uas lawv tau rhuav Nws tej lus cogtseg sau rau ntawm daim txiag zeb (II Kevcai 10:4).
Nyob rau lub sijhawm raug ua cev qhev, tus Tswv haivneeg ntsib txhua yam kev nyuaj siab txaus tsimnyog los lees txim lawm, thiab lawv tig rov los cuag Vajtswv quaj tu siab. Thaum tig rov qab los cuag Nws, lawv nrhiav tau kev cia siab ruaj khov hauv Nws tej lus cogtseg rau lawv mus ibtxhis.
Niaj hnub no peb kuj muaj kev txhaum, tawmtsam tus Tswv, tiamsis thaum peb paub lees txim tig hlo los cuag Nws, tus Tswv yuav tsis tso peb tseg. Tus Tswv txojkev ua zoo loj kawg nkaus, Nws txojkev hlub tsis muaj nrim, qhov tseemceeb yog peb tsis txhob pheej nyob tsau rawv hauv txojkev txhaum, tiamsis lees txim tig los nyob hauv tus Tswv tej lus cogtseg rau peb mus ibtxhis.
Thov Vajtswv,
Vajtswv tus uas zoo kawg nkaus! Koj txojkev ua zoo, kev hlub loj heev pub rau nyuam yaus. Thov Koj qhia kom nyuam yaus paub tig los cuag Koj los ntawm lub siab tso tej kev txhaum tseg, txais yuav txojsia nyob hauv Koj tej lus cogtseg mus ibtxhis. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb puas nrhiav tau txojkev cia siab thaum peb los cuag Vajtswv lawm tau?
Nyeem Vajluskub hauv peb lub xyoo: Tshwmsim 15:1-16:16
Kênh Youtube BHKTHN:
