Klei Aê Diê Blŭ: II Klei Yăl Dliê 25:25-28
Êlan kliăng: “Kyuadah Khua Yang mkra mjuăt hlei pô Ñu khăp, leh anăn čăm hŏng giê grăp čô anak Ñu jum” (Hêbrơ 12:6).
Klei êmuh ksiêm mĭn: Si Mtao Y-Amasia jing leh mtao Israel mă jing mnă? Klei anei brei ƀuh kơ ya mta klei kơ klei Aê Diê bi kmhal klei soh? Hruê anei si ngă Khua Yang mkra mjuăt drei leh anăn hŏng ya klei kñăm čiăng?
Leh Y-Jôas mtao Israel djiê, Y-Amasia mtao Yuđa dôk hdĭp pluh êma thŭn. Ƀiădah lĕ, ñu dôk hdĭp amâo djŏ čiăng mă tŭ klei jăk jĭn mơ̆ng Aê Diê ôh ƀiădah mă tŭ klei knap mñai. Mơ̆ng hruê Mtao Y-Amasia lui wir Aê Diê čiăng kkuh mpŭ kơ rup yang phung Êđôm, snăn phung mnuih ƀuôn sang ti ƀuôn Yêrusalem bi trông čhai ngă klei lhiăr. Năng ai phung anei ngă klei lhiăr kơ mtao kyua ngêñ kơ klei mtao nao bi blah hŏng mtao Israel leh anăn amâo mâo klei dưi ôh, ƀiădah hdĭp hlăm klei jing mnă bŏ hŏng klei hêñ, ngă kơ phung ƀuôn sang tŭ lu klei knap mñai. Kyuanăn, mơ̆ng ƀuôn Yêrusalem Mtao Y-Amasia đuĕ kơ ƀuôn Lakis, boh kbưi mơ̆ng ƀuôn Yêrusalem hlăm brô 45 kilômet tĭng nah Yŭ – Dhŭng, jing sa boh ƀuôn kjăp, mâo mnư̆ kpal leh anăn mâo kđông kjăp hlăm lam. Ñu čăng hmăng anôk anei srăng dưi đru ñu đuĕ dăp kơ phung roh. Ƀiădah lĕ, “Aê Diê čuăn leh čiăng bi rai” ñu (II Klei Yăl Dliê 25:16) Kyuadah mtao ngă klei mgao hngah amâo čiăng hmư̆ ôh klei khua pô hưn êlâo Aê Diê hưn snăn phung bi kdơ̆ng tiŏ nao kahan tiŏ ñu truh ti ƀuôn Lakis leh anăn bi mdjiê ñu tinăn. Leh anăn arăng mdiăng asei mlei ñu hŏng aseh ba wĭt kơ ƀuôn Yêrusalem leh anăn dơr ñu mbĭt hŏng phung aê ñu hlăm ƀuôn Y-Đawit.
Tơdah Mtao Y-Amasia lui wir Aê Diê leh anăn hngah kơ klei khua pô hưn êlâo Aê Diê kčĕ snăn amâo mdê ôh hŏng klei mtao dôk toh hroh mơ̆ng sa boh kbuôn trŭn nao kơ ƀăng êlam klei rai tuč, amâo lŏ mâo êlan dưi mkơ̆ng ôh. Mơ̆ng klei hngah kơ klei khua pô hưn êlâo Aê Diê hưn leh anăn ăt êbat hlăm klei lui wir Aê Diê atăt leh mtao truh kơ klei čuăn ngă hŏng klei mluk, ba kahan nao bi blah hŏng phung Israel leh anăn amâo mâo klei dưi ôh, tŭ klei mtao Israel mă jing mnă, leh anăn ti knhal tuč tŭ klei phung lhiăr bi mdjiê. Mâo blư̆ Mtao Y-Amasia mĭn kơ ñu tlaih leh mơ̆ng klei Aê Diê bi kmhal kyuadah arăng phưi ñu leh anăn ñu kiă kriê truh kơ pluh êma thŭn tơdah leh pô roh hŏng ñu jing Mtao Y-Jôas djiê leh. Ƀiădah lĕ, klei bi kmhal srăng truh sui snăk tơdah leh arăng ngă sa mta klei soh. Jih klei hƀuê ênuk hlăm hdruôm hră Klei Yăl Dliê brei drei ƀuh amâo mâo ôh sa čô mnuih dưi tlaih mơ̆ng klei bi kmhal kyua klei soh ñu ngă leh.
Aê Diê jing Pô Kpă Ênô kyuanăn hruê anei phung đăo kơ Krist kăn dưi weh đuĕ lei kơ klei Ñu mkra mjuăt tơdah drei hngah amâo ngă tui si Klei Ñu Blŭ. Kyuadah Aê Diê khăp kơ drei leh anăn čiăng drei lui klei soh kyuanăn Ñu srăng mkra mjuăt drei msĕ si ama mkra mjuăt phung anak. Klei Ñu mkra mjuăt drei čiăng bi jăk kơ drei, wăt tơdah tăp năng klei mra mjuăt anăn amâo truh mtam ôh, ƀiădah sĭt nik srăng truh, kyuadah Khua Yang čiăng drei hdĭp leh anăn dưi mâo klei doh jăk Ñu (Hêbrơ 12:7-11).
Tơdah ngă klei amâo djŏ, drei tuôm mĭn mơ̆ Khua Yang srăng lui, amâo mkra mjuăt ôh?
Wah lač: Ơ Khua Yang, đru kâo thâo săng kơ boh yuôm klei hdĭp doh jăk, bi mơak kơ Ih, čiăng kơ kâo amâo bi ênguôt kơ Ih leh anăn amâo srăng tŭ klei Ih mkra mjuăt ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Hêbrơ 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
