II Xwmtxheej Vajntswv 25:25-28
Nqe cim:
“Rau qhov tus Tswv qhuab ntuas txhua tus uas nws hlub, thiab nws nplawm txhua tus uas nws coj los ua nws tub” (Henplais 12:6)
Lus nug rau sawvdaws xav:
– Tom qab raug Vajntxwv Yehau-as ntes, Vajntxwv Amaxiyas ua neej zoo li cas?
– Qhov no qhia peb pom yam dabtsi txog Vajtswv rau txim rau cov ua txhaum?
– Niaj hnub nimno Vajtswv ntuas peb li cas thiab ua cas Nws ntuas peb li ntawd?
Tom qab uas Vajntxwv Yehau-as tuag lawm, cov Yudas tus Vajntxwv Amaxiyas tseem ua neej nyob 15 xyoos ntxiv. Txawm li ntawd los Vajntxwv ua neej tsis tau txais tus Tswv koob hmoov, tiamsis nws ua neej tiv kev txomnyem xwb. Txij thaum Vajntxwv Amaxiyas tso tus Tswv tseg thiab mus pe cov Edoos tej mlom, cov neeg nyob hauv Yeluxalees txawm pib ntxeev siab rau nws. Tej zaum lawv tsis txaus siab qhov uas Vajntxwv mus tua cov Yixalayees tus Vajntxwv raug swb, thiab raug ntes mus kaw txomnyem ntsuav hauv tsev rau txim, ua rau tej pejxeem poob ntsejmuag. Vajntxwv Amaxiyas khiav tawm hauv Yeluxalees mus rau hauv lub nroog Lakhis. Ntawm Yeluxalees mus rau lub nroog Lakhis muaj li 45 km nram sab qab teb, ntawd yog ib lub nroog ruaj khov, muaj ntsa yeej thaiv khov kho, tej tsev nyob hauv los zoo heev. Vajntxwv Amaxiyas tso siab hais tias qhov no yuav pab tau nws dim ntawm nws cov yeebncuab. Tiamsis, “tus Tswv twb txiav txim siab muab Vajntxwv tua pov tseg lawm” (2 Xwmtxheej 25:16). Thaum Vajntxwv Amaxiyas khavtheeb thiab tsis mloog raws li Vajtswv tus cevlus tej lus ntuas, cov neeg uas ntxeev siab thiaj caum tuaj thiab muab Vajntxwv tua tuag rau hauv Lakhis. Lawv muab nees thauj nws lub cev los rau hauv Yeluxalees thiab muab nws log nrog nws cov yawgkoob.
Thaum Vajntxwv Amaxiyas tso tus Tswv tseg thiab tsis mloog Vajtswv tus cevlus tej lus ntuas ces zoo ib yam li vajntxwv tabtom ntog toj ntawm ib thaj toj ntxhab heev mus rau hauv ib lub qhov tob tob ntawm txoj kev tuag, tsis muaj peevxwm yuav nres tau li. Tsis mloog Vajtswv tus cevlus tej lus ntuas thiab rov qab taug txoj kev uas tso tus Tswv tseg, ntawd yog kev txiav txim siab ruam heev. Mus tua cov Yixalayees tus Vajntxwv, raug swb, raug ntes mus kaw, thiab thaum kawg raug cov neeg uas ntxeev siab muab tua pov tseg ntawd yog nuj nqis ntawm tus neeg tsis yuav lus ntuas. Tom qab uas Vajntxwv Yehau-as tuag lawm, Amaxiyas tau tso rov los kav tebchaws kaum tsib xyoos ntxiv, tej zaum Amaxiyas xav hais tias nws twb dim Vajtswv kev rau txim lawm. Txawm hais tias twb ua txhaum ntev ntev lawm los Vajtswv yeej tseem yuav rau txim. Nyob hauv keebkwm Xwmtxheej Vajntxwv qhia pom hais tias, yeej tsis muaj ib tus neeg twg yuav khiav dim Vajtswv kev rau txim rau lawv tej kev txhaum li.
Vajtswv yog tus uas ncaj ncees, vim li ntawd niaj hnub nimno cov tsis ntseeg yeej khiav tsis dim Vajtswv kev rau txim. Peb cov ntseeg yog tsis ua lub neej li Vajtswv Txojlus qhia, txawm caij nyoog ntev npaum li cas los Nws yeej rau txim xwb. Vajtswv hlub peb Nws xav kom peb tso kev txhaum tseg, Nws thiaj ntuas peb li leej txiv ntuas nws tej menyuam . Vajtswv kev ntuas tsuas yog muaj zoo rau peb xwb. Tej zaum kev rau txim yuav tsis tshwm tamsim uas peb ua txhaum, tiamsis yeej yuav muaj los xwb, vim Vajtswv xav kom peb tau txojsia thiab tau koom nrog Nws txoj kev dawbhuv, Nws thiaj ntuas peb cov uas yog Nws tug (Henplais 12:7-11).
Thov Vajtswv:
Vajtswv, thov pab kom nyuam yaus zeem paub txog yam tseemceeb ntawm kev ua neej dawbhuv, nyuam yaus thiaj ua tau lub neej haum Koj siab thiab tsis ua rau Koj tu siab thiaj tsis raug Koj kev rau txim. Nyuam yaus tuav Cawmseej Tswv Yexus lub npe thov, Amees.
Ib tsoom mloog hmov tshua,
Thaum ua txhaum, peb puas xav hais tias Vajtswv yuav cia li tso dhau?
Nyeem Vajluskub huav peb lub xyoos: Henplais 4
Kênh Youtube BHKTHN:
