Klei Aê Diê Blŭ: II Kôrantô 7:2-7
Êlan kliăng: “Ƀiădah Aê Diê, Pô bi juh phung êdu ai, bi juh leh hmei hŏng klei Y‑Tit truh, leh anăn amâo djŏ knŏng kyua klei ñu truh ôh, ƀiădah msĕ mơh hŏng klei diih bi juh ñu leh” (II Kôrantô 7:6-7a)
Klei êmuh ksiêm mmĭn: Si ai tiê Khua ƀĭng kna Y‑Pôl leh anăn phung mă bruă mbĭt hŏng phung đăo ti Kôrantô? Ya klei phung mă bruă kơ Aê Diê srăng tuôm? Ya klei jing phŭn mđĭ ai kơ digơ̆ čiăng hgao klei dleh dlan, gĭr ktưn hlăm bruă klam?
Sa blư̆ dơ̆ng Khua ƀĭng kna Y‑Pôl iêô mthưr phung đăo ti Sang Aê Diê Kôrantô “Pŏk bĕ sa anôk kơ hmei hlăm ai tiê diih” (II Kôrantô 6:13; 7:2), kyua ai tiê ñu leh anăn phung mă bruă kơ Aê Diê hŏng digơ̆ “amâo tuôm ngă soh hŏng arăng ôh, hmei amâo tuôm bi čhŏ arăng ôh, hmei amâo tuôm ƀơ̆ng ngăn arăng ôh”.
Khua ƀĭng kna Y‑Pôl amâo lŏ yăl dliê ôh kơ phung đăo Kôrantô ya klei dleh dlan ñu leh anăn phung mă bruă mbĭt tuôm ti čar Masêdôn, “…kđeh hmei amâo tuôm mâo klei mdei ôh, ƀiădah hmei mâo klei knap mñai djăp mta — klei bi blah ti êngao leh anăn klei huĭ hlăm lam ai tiê” (êlan 5). Khădah snăn, klei bi juh ñu hŏng phung mă bruă mbĭt dưi thiăm ai ktang čiăng hgao jing sĭt bi mĭn kơ ayŏng adei Aê Diê yua čiăng bi juh digơ̆, êlâo hĭn jing Y‑Tit, leh anăn jing phung đăo ti Kôrantô. Lu klei rŭng răng bŏ hlăm klei mĭn phung khua ƀĭng kna, ară anei dưi lưh jih. Klei hơ̆k mơak hlăm ñu ƀrư̆ prŏng hĭn leh ñu thâo digơ̆ “…hnĭng, hia, hur har…” hŏng ñu pô (êlan 7).
Phung mă bruă kơ Aê Diê srăng tuôm hŏng klei dleh dlan, klei gun kpăk sĭt mă bruă jing klei amâo dưi ñĕ ôh. Khădah snăn, anei amâo djŏ ôh mta phŭn ngă kơ digơ̆ kdŭn tluôn hlăm bruă ngă. Mnuih mă bruă kơ Aê Diê amâo djŏ knŏng mâo ai ktang prŏng prĭn mơ̆ng Aê Diê ôh, diñu ăt mâo klei bi juh lu snăk mơ̆ng phung mă bruă mbĭt leh anăn phung ayŏng amai adei hlăm mngăt diñu dôk atăt gai. Klei dleh dlan ti čar Masêdôn mĭndah msĕ si srăng ngă kơ Khua ƀĭng kna Y‑Pôl êdu ai, ƀiădah ñu ăt ƀuh klei mơak prŏng leh hmư̆ klei Y‑Tit hưn kơ phung đăo ti Kôrantô. Digơ̆ dôk pŏk ai tiê hŏng ñu, thâo ƀuh ai tiê ñu hŏng digơ̆ leh anăn dôk hur har čiăng dưi bi tuôm hŏng ñu. Klă sĭt msĕ si klei Khua ƀĭng kna Y‑Yôhan ăt tuôm thâo leh, “Kâo amâo dưi mâo klei mơak hĭn ôh kơ klei kâo hmư̆ kơ phung anak kâo êbat hlăm klei sĭt nik” (III Y‑Yôhan êlan 4).
Mđĭ ai leh anăn bi juh phung mă bruă kơ Aê Diê jing klei čiăng snăk, êngao kơ phung khua pô mtô, pô mtô mă bruă kơ Aê Diê jih hruê mmông, lŏ mâo phung khua sang yang, phung čŏng mă bruă kơ Aê Diê. Diñu dôk čiăng arăng mđing uêñ hlăm bruă ngă, klei blŭ bi juh mơ̆ng grăp čô drei čiăng đru kơ diñu kjăp ai tiê hlăm klei mă bruă kyua digơ̆ ăt jing phung êdu awăt msĕ si phung drei.
Drei mđing bi juh mđĭ ai phung mă bruă kơ Aê Diê hlăm Sang Aê Diê leh mơ̆ amâodah ka?
Wah lač: Ơ Aê Diê! Kâo bi mni kơ Ih kyua kâo mâo nanao klei Ih juh mơ̆ng phung Ih yua ba hriê giăm kâo. Akâo kơ Ih ăt yua kâo jing klei bi juh leh anăn mđĭ ai lu mnuih dôk jih ai tiê mă bruă kơ Ih hlăm Sang Aê Diê.
Dlăng Klei Aê Diê Blŭ hlăm tlâo thŭn: Y‑Yêrêmi 48:1-25
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
