II-Kauleethaus 7:2-7
Nqe cim:
“Tiamsis Vajtswv tus uas txhawb cov neeg uas poob siab lub zog, nws txhawb peb lub zog, rau qhov nws kom Titus tuaj xyuas kuv. Tsis yog li ntawd xwb, Titus tuaj qhia rau kuv hais tias nej txhawb Titus lub zog…” (II-Kauleethaus 7:6-7a).
Lus nug rau sawvdaws xav:
- Timthawj Paulus thiab nws cov phoojywg ua haujlwm ua ke muaj lub siab li cas rau cov ntseeg hauv lub nroog Kauleethaus?
- Tus uas ua Vajtswv haujlwm yuav ntsib tej yam twg?
- Yam dabtsi ua lub hauvpaus txhawb kom lawv nyiaj taus kev txomnyem, ua tau haujlwm ntxiv?
Ib zaug ntxiv Timthawj Paulus nqua hu cov ntseeg Yexus hauv Pawg Ntseeg Kauleethaus hais tias “nej cia li qhia hlo nej lub siab rau peb...” (II-Kauleethaus 6:13;7:2), rau qhov Paulus thiab cov neeg ua Vajtswv haujlwm twb qhia siab rau lawv “peb yeej tsis tau ua txhaum rau leejtwg lossis xav txo leejtwg lub neej lossis ntxias leejtwg tug yuav.” Timthawj Paulus tsis txajmuag qhia rau cov ntseeg hauv Kauleethaus paub tej kev txomnyem uas nws thiab cov phoojywg ntsib nyob hauv lub xeev Makedaunias, “…peb lub cev tsis tau so kiag li, tiamsis peb raug kev ceeblaj rau txhua fab, sab nraud muaj kev tawm tsam sab hauv muaj kev txhawj ntshai” (nqe 5-HMOWSV). Txawm yog li ntawd los, yam uas txhawb Paulus thiab nws cov phoojywg zog ua tau haujlwm yog xav txog cov kwvtij uas tau Vajtswv siv ua haujlwm, thawj tug yog Titus, thiab txuas ntxiv yog cov ntseeg nyob hauv lub nroog Kauleethaus. Tej kev txhawj nyob hauv cov timthawj lub siab, tau muab tshem tawm. Paulus muaj kev zoo siab dua thaum paub lawv “…xav xav pom, nyuaj siab kawg li, muab siab npuab” nws (nqe 7).
Tus uas ua Vajtswv haujlwm yuav ntsib tej kev txomnyem, nyuaj siab thaum ua haujlwm yog qhov hla tsis dhau. Txawm yog li ntawd los, qhov ntawd tsis yog lub keebtiv ua kom thaub rov qab tsis ua haujlwm. Tus uas ua Vajtswv haujlwm tsis yog txais lub zog ntawm Vajtswv xwb, lawv kuj tau txais txojkev txhawb zog los ntawm tej phoojywg ua haujlwm thiab cov ntseeg. Xav hais tias tej kev nyuaj hauv lub xeev Makedaunias yuav ua rau Timthawj Paulaus qaug zog, tiamsis nws tseem muaj kev zoo siab heev thaum hnov Titus tham txog cov ntseeg hauv lub nroog Kauleethaus. Lawv tabtom qhib siab rau Paulus, paub tias nws tseem hlub lawv thiab kub siab lug xav ntsib nws. Muaj tseeb raws li Timthawj Yauhas hais, “Tsis muaj ib yam dabtsi ua rau kuv zoo siab tshaj qhov uas kuv hnov hais tias kuv cov menyuam ua lawv lub neej raws li qhov tseeb.” (III-Yauhas nqe 4).
Txhawb zog thiab nplig tus uas ua Vajtswv haujlwm siab yog ib yam uas cheemtsum ua, dua li cov kws xibhwb, xibhwb siv sijhawm ua haujlwm, tseem muaj cov pab ua haujlwm, cov uas pab tes taw. Lawv cheemtsum tau peb txojkev hmov tshua los ntawm kev nqis tes, hais tej lus nplig siab kom lawv muaj zog ua haujlwm, vim lawv kuj yog tibneeg txawj qaug zog zoo ib yam li peb thiab.
Thov Vajtswv,
Vajtswv! Nyuam yaus ua Koj tsaug vim Koj yog tus txhawb nyuam yaus lub zog. Thov Koj pab kom nyuam yaus ua tau tus neeg txhawb, nplig ntau leej siab kom lawv ua tau haujlwm hauv Pawg Ntseeg. Amees.
Peb puas muaj kev txhawb zog thiab nplig cov ua Vajtswv haujlwm hauv Pawg Ntseeg lub siab lawm tau?
Nyeem Vajluskub hauv peb lub xyoos: Yelemis 48:1-25
Kênh Youtube BHKTHN:
