Klei Aê Diê Blŭ: Y-Yêrêmi 36: 27-32.
Êlan kliăng: “Jih jang mnuih jing msĕ si rơ̆k mda, leh anăn jih jang klei siam ñu jing msĕ si mnga hlăm hma…Rơ̆k krô, mnga dliu, ƀiădah klei Aê Diê drei blŭ srăng dôk nanao hlŏng lar” (Y-Êsai 40:6b, 8).
Klei êmuh ksiêm mĭn: Ya ngă mtao Y-Jêhôyakim čuh hĕ hdruôm hră klĭt mơ̆ng Yêhôwa mtă brei čih? Leh čuh hdruôm hră klĭt anăn, ya klei Aê Diê mtă kơ Khua pô hưn êlâo Y-Yêrêmi? Si Klei Aê Diê Blŭ dưi dôk kjăp nanao hlăm hƀuê ênuk Sang Aê Diê?
Mtao Y-Jêhôyakim hngah amâo hmư̆ ya klei Aê Diê lač kơ ñu hŏng bruă ngă “…mtao khăt hĕ kdrêč anăn hŏng dhŏng leh anăn hwiê gơ̆ hlăm kpur pui, tơl pui hlăm kpur ƀơ̆ng jih ênŭm hră klĭt anăn” (êlan 23). Mtao čuh leh hdruôm hră klĭt čih boh sĭt kơ klei soh mtao leh anăn phung ƀuôn sang Aê Diê ngă soh leh hŏng Aê Diê, hŏng klei bi kmhal năng djŏ srăng truh hŏng klei soh anăn. Mĭndah bruă čuh hdruôm hră klĭt srăng lăm jih klei čih ƀuah mkra kơ klei soh pô ăt msĕ mơh dŭm klei hâo hưn kơ ala čar mtao srăng lĕ hlăm kngan phung Ƀaƀilôn. Ƀiădah djăp mta bruă dưi hưn mơ̆ng khua pô hưn êlâo Aê Diê ăt srăng jing sĭt, hĭn mơh, sa klei čih klei soh pioh hjăn kơ mtao dưi mdah: “… Kyuanăn snei Yêhôwa lač djŏ kơ Y-Jêhôyakim mtao Yuđa, Ñu amâo srăng mâo sa čô pô dôk gŭ ti jhưng mtao Y-Đawit, leh anăn atâo ñu arăng srăng dlăm hĕ ti mđiă êjai yang hruê leh anăn kơ klei êăt êjai mlam. Leh anăn kâo srăng bi kmhal ñu leh anăn phung anak čô ñu wăt phung dĭng buăl ñu kyua klei soh jhat diñu; kâo srăng bi truh kơ diñu leh anăn kơ phung dôk hlăm ƀuôn Yêrusalem, leh anăn kơ phung êkei Yuđa jih jang klei jhat kâo hưn leh bi kdơ̆ng hŏng diñu, kyua diñu amâo čiăng dôk hmư̆ ôh” (êlan 30-31).
Leh anăn, sa hdruôm hră klĭt mkăn hlue si klei Aê Diê blŭ lŏ dưi čih, “Ñu čih tinăn tui si Y-Yêrêmi kăp lač brei jih jang klei blŭ hlăm hdruôm hră klĭt Y-Jêhôyakim mtao Yuđa čuh leh hlăm pui, leh anăn lŏ thiăm lu klei blŭ msĕ” (êlan 32b). Năng ai Mtao Y-Jêhôyakim čuh leh hdruôm hră hŏng klĭt ƀiădah Klei Aê Diê Blŭ amâo dưi rai ôh. Mtao duah djăp hdră čiăng lăm jih Klei Aê Diê Blŭ ƀiădah knhal tuč Klei Aê Diê Blŭ lăm jih mtao leh anăn lăn čar mtao.
Hƀuê ênuk Sang Aê Diê ăt brei ƀuh mâo nanao phung čiăng bi luč jih Klei Aê Diê Blŭ hŏng bruă čuh Hdruôm Hră Klei Aê Diê Blŭ msĕ si Mtao Y-Jêhôyakim, amâodah ngă jhat, kăm đăm mkra bi lar Klei Aê Diê Blŭ. Ƀiădah yuôm bhăn snăk, knư̆ arăng ngă jhat snăn Sang Aê Diê knư̆ đĭ kyar hĭn. Knư̆ arăng kăm ghă, čuh jih snăn Hdruôm hră Klei Aê Diê Blŭ knư̆ dưi mblang lu mta klei blŭ hĭn leh anăn dưi kđăm mkra lu hĭn. Arăng dưi bi rai klei blŭ anak mnuih ƀiădah amâo dưi bi luč ôh Klei Aê Diê Blŭ. Djŏ msĕ si klei Khua Pô hưn êlâo Y-Êsai lač leh hlăm Y-Êsai 40:8: “Rơ̆k krô, mnga dliu,ƀiădah klei Aê Diê drei blŭ srăng dôk nanao hlŏng lar!” Bi mni kơ Aê Diê kyua grăp čô drei mâo sơaĭ Hdruôm Hră Klei Aê Diê Blŭ jing Klei Aê Diê Blŭ hlăm kngan, brei drei dlăng, hriăm leh anăn ksiêm hriăm Klei Aê Diê Blŭ čiăng klei hdĭp drei mâo klei jăk mơak.
Dŭm blư̆ drei dlăng leh jih Hdruôm Hră Klei Aê Diê Blŭ?
Wah lač: Ơ Aê Diê! Kâo bi mni lač jăk kơ Ih brei leh kơ kâo Klei Aê Diê Blŭ čiăng ktrâo lač kơ kâo grăp knhuang êbat hlăm lăn ala anei. Akâo kơ Ih đru kâo dlăng, hriăm Klei Aê Diê Blŭ leh anăn thâo răng djăp êlan êbat ti anăp Klei Aê Diê Blŭ, čiăng kâo thâo klei soh leh anăn hmao kmhal klei soh.
Dlăng Klei Aê Diê Blŭ hlăm tlâo thŭn: Klei Mmuñ Hđăp 142:1-7; 143:1-12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
