Klei Aê Diê Blŭ: Klei Mtô Mñă Klei Bhiăn 16:21-22; 17:1-7
Êlan kliăng: “Đăm ih buôn kkuh ti anăp mnơ̆ng anăn ôh, kăn mă bruă kơ diñu rei; kyuadah kâo gơ̆ yơh jing Yêhôwa Aê Diê ih, Aê Diê thâo trih…” (Klei Kbiă 20:5a).
Klei êmuh ksiêm mĭn: Ya klei Aê Diê kăm ghă phung ƀuôn sang Ñu amâo dưi ngă? Ya hdră msir leh anăn klei bi kmhal kơ phung ngă soh kkuh kơ rup yang? Ya ngă Aê Diê bi kmhal snăn? Hruê anei si drei ngă soh kkuh kơ rup yang?
Kkuh kơ rup yang jing klei arưp aram prŏng hŏng klei hdĭp mngăt phung ƀuôn sang Israel sĭt mŭt hdĭp mda ti krĭng Lăn Aê Diê Ƀuăn. Êlâo adih, Aê Diê mtă leh kơ phung ƀuôn sang Ñu brei bi mdjiê jih phung ƀuôn sang Kanaan ƀai leh anăn bi rai jih rup yang: “Ƀiădah snei brei diih ngă kơ diñu: brei diih bi klưh hĕ knưl diñu leh anăn bi mčah đơ điêt kmeh diñu, leh anăn druôm hĕ phung rup yang Asêra diñu, leh anăn čuh hĕ hŏng pui rup yang diñu kač” (Klei Mtô Mñă Klei Bhiăn 7:5). Leh anăn hlăm trăn Klei Aê Diê Blŭ anei, Y-Môis sa blư̆ dơ̆ng mñă kơ phung ƀuôn sang Aê Diê amâo dưi mdơ̆ng ôh gơ̆ng rup yang Asêra ti djiêu knưl kkuh mpŭ kơ Aê Diê, kyua Ñu bi êmut kheh kơ rup yang bi êdah klei knhông snăn. Êngao anăn, lŏ mâo sa hdră mtrŭn yuôm bhăn mkăn, anăn jing kyua srăng mâo phung ƀuôn sang nah êngao hdĭp ti krah phung ƀuôn sang Aê Diê duah hdră dưm rup yang diñu kkuh mpŭ giăm hŏng knưl kkuh mpŭ kơ Aê Diê. Klei kkuh mpŭ mtŭk mtŭl snăn srăng ktŭng phung ƀuôn sang Israel kkuh mpŭ kơ Aê Diê leh anăn wăt yang Asêra. Ƀrư̆ ƀrư̆ diñu ênưih lui Aê Diê leh anăn nao mă bruă kơ yang Asêra leh anăn lu yang mkăn mơh.
Aê Diê ăt mtă tơdah hlăm phung ƀuôn sang Aê Diê mâo mnuih tui hlue mă bruă kơ yang mkăn amâodah bi êdah klei kkuh mpŭ kơ mnơ̆ng hlăm adiê jing mnơ̆ng Aê Diê hrih mjing, snăn phung ƀuôn sang Aê Diê brei thâo răng ksiêm dlăng, mă klei bi mklă bi djŏ leh anăn kơh čhal klei soh pô anăn leh anăn bi kmhal. Klei soh kkuh kơ rup yang jing sa hlăm dŭm klei soh kjham dưi dưm hlăm jar bi mdjiê, kñăm lăm lui jih klei soh, mbĭt anăn ăt čiăng mñă kơ phung dôk hdĭp đăm tui hlue ôh klei ngă soh phung nao êlâo kkuh kơ rup yang, kyua ya klei soh jhat ênưih bi lar hlăm phung ƀuôn sang hĭn kơ klei jăk.
Hruê anei, phung ƀuôn sang Aê Diê ăt tuôm hŏng klei arăng mplư kkuh kơ rup yang hŏng hdră knhâo knhăk mnêč hĭn. Lu mnuih yua leh hdruôm hră Klei Aê Diê Blŭ leh anăn kyâo bi kal msĕ si sa drao mgang amâodah čiăng mdrao klei ruă, suôt yang jhat. Hrô kơ Klei Aê Diê Blŭ jing Klei Blŭ Aê Diê brei čiăng hriăm thâo kơ klei Aê Diê čiăng, amâodah kyâo bi kal jing klei bi hmô kơ klei khăp snăn diñu yua leh msĕ si sa rup yang! Lu mnuih lŏ dlăng ƀĭng khăp, ƀĭng găp yuôm bhăn hĭn kơ Aê Diê. Amâodah êran tiŏ hlue si prăk mah, klei hing ang, kơhưm nah êngao hĭn kơ tui hlue Aê Diê. Knuih hdĭp snăn amâo mdê ôh hŏng klei kkuh kơ rup yang, kyua diñu mdưm lu đei mnơ̆ng hĭn kơ Aê Diê, leh anăn dlăng Aê Diê msĕ si sa kdrêč lŏ thiăm amâodah lui hlăm klei hdĭp pô. Brei brei thâo răng kyua Klei Aê Diê Blŭ hưn brei kriê dlăng kơ kđeh asăr srăng truh kơ klei djiê (Rôm 8: 5‑6).
Drei dôk mdưm ya klei yuôm hĭn kơ Aê Diê hlăm ai tiê pô?
Wah lač: Ơ Khua Yang, akâo kơ Ih răng mgang kâo ti krah êbâo klei rŭng răng mplư hlăm klei hdĭp. Akâo kơ Ih đru kâo mpŭ nanao kơ Aê Diê hĭn kơ jih jang mnơ̆ng hlăm klei hdĭp kâo.
Dlăng Klei Aê Diê Blŭ hlăm tlâo thŭn: Y‑ Êsai 8:11 – 9:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
