Klei Aê Diê Blŭ: Klei Mphŭn Dơ̆ng 39:7-12
Êlan kliăng: “Kyuadah snei klei Aê Diê čiăng, klei diih jing doh jăk; đăm brei diih ngă klei knhông ôh; čiăng kơ grăp čô diih thâo kiă kriê asei mlei ñu pô hlăm klei doh jăk leh anăn hlăm klei mpŭ” (I Têsalônik 4:3‑4).
Klei êmuh ksiêm mĭn: Ya klei mplư êkei êdam Y‑Yôsep tlă anăp? Si klei ñu bi kdơ̆ng wĭt? Hŏng ya klei ñu dưi “kiă kriê asei mlei ñu pô doh jăk leh anăn mpŭ”? Hŏng si êlan drei bi kdơ̆ng wĭt hŏng klei mplư?
Leh hlăk arăng čhĭ ñu truh ti čar Êjip leh anăn jing hlŭn kơ Y‑Pôtipar khua kahan, Y‑Yôsep mâo Aê Diê hơêč hmưi hlăm jih jang bruă kngan ñu ngă, snăn khua knang kơ ñu, leh anăn jao jih mnơ̆ng mnuă ngăn drăp brei ñu kiă kriê (39:1‑6a). Klei Aê Diê Blŭ čih hưn Y‑Yôsep jing siam leh anăn kƀăt êkei (39:6b). Kyua klei kƀăt siam ñu yơh, bi tluh mô̆ Y-Pôtipar. Mô̆ khua ñu tluh ƀô kơ Y‑Yôsep leh anăn blŭ mplư Y‑Yôsep brei đih hŏng ñu (êlan 7,10). Y‑Yôsep tlă anăp hŏng klei mplư ktang tĭt, amâo djŏ knŏng sa bliư̆ ôh, ƀiădah hruê anei kơ hruê mkăn tlă anăp nanao. Si ngă ñu dưi kiă kriê leh anăn krơ̆ng mkhư̆ klei bluh ai ñu pô, čiăng dưi hngah nanao kơ mô̆ khua ñu? Mơ̆ng klei ktang ñu mă, čiăng dưi bi kdơ̆ng wĭt hŏng klei mô̆ khua ñu mplư? Knŏng hŏng klei knang hjăn păn kơ Aê Diê yơh, Pô răng mgang ñu leh, leh anăn hơêč hmưi êbeh dlai kơ ñu.
Mơ̆ng mphŭn êlâo, Y‑Yôsep blŭ klă leh hŏng mô̆ khua ñu, brei thâo si klei mĭn ñu: ñu amâo čiăng bi ênguôt khua ñu ôh, leh anăn klei yuôm hĭn jing, si ñu dưi “ngă klei ƀai prŏng anei, leh anăn ngă soh hŏng Aê Diê?” (êlan 8‑9). Sa klei bi kdơ̆ng wĭt khut khat hŏng klei mĭn kjăp phĭt. Khădah mô̆ khua mplư ñu hruê anei kơ hruê adih dưn, Y‑Yôsep ăt hngah nanao (êlan 10). Tơl truh sa hruê mô̆ khua truh ngă, djă păn ti ao leh anăn đoh ktŭng Y‑Yôsep phă ñu. Mmông anei, Y‑Yôsep ktang hĭn êjai khut khat kriê pioh asei mlei ñu doh jăk, gơ̆ lui ao leh anăn êran “đuĕ kơ tač” khă thâo mơh srăng tuôm hŏng klei rŭng dleh kơ êdei (êlan 12).
Lu mnuih êbuh ti anăp klei mplư ngă klei soh knhông, ƀiădah Y‑Yôsep dưi răng pioh leh knuih êngeh, kiă kriê ñu pô, bi mơak kơ Aê Diê hlăk ñu thâo weh đuĕ kơ klei chŏ mrŏ, čiăng kriê pioh asei mlei ñu pô doh jăk leh anăn mpŭ. Mơ̆ng klei ñu huĭ mpŭ kơ Aê Diê leh anăn thâo săng klei Aê Diê čiăng, snăn Y‑Yôsep dưi leh hŏng klei mplư, khut khat amâo ngă klei tluh čiăng tui si kđeh pô ôh, ƀiădah khut khat ngă tui si klei Aê Diê čiăng hĭn kơ klei mnuih čiăng. Khua ƀĭng kna Y‑Pôl brei thâo “snei klei Aê Diê čiăng, klei diih jing doh jăk” mblang jing brei weh đuĕ kơ klei čhŏ mrŏ, amâo ngă klei knhông ôh leh anăn thâo kiă kriê asei mlei pô hlăm klei doh jăk (I Têsalônik 4:3‑5). Phung anak Aê Diê brei hriăm čiăng thâo săng klei Khua Yang čiăng, leh anăn hdĭp bi mơak kơ Ñu. Jing doh jăk, anăn jing sa knhuang mâo klei bi mlih nanao grăp hruê. Hlăm êlan êbat tui hluê Khua Yang, grăp čô anak Aê Diê brei jing doh jăk grăp hruê. Brei knang kơ Yang Mngăt Jăk, dôk hdĭp thâo kiă kriê asei pô, djŏ hnơ̆ng, čiăng răng pioh asei mlei pô jing doh jăk, năng hŏng anăn iêu “phung doh jăk” Aê Diê brei leh mơ̆ng mmông drei đăo kơ Ñu.
Si ngă drei khut khat kriê pioh asei mlei drei pô jing doh jăk ti anăp Khua Yang mơ̆?
Wah lač: Ơ Khua Yang, akâo Ih đru kâo thâo knang nanao kơ klei ktang Ih, čiăng dưi kiă kriê kâo pô, dưi bi kdơ̆ng wĭt hŏng klei mplư leh anăn khut khat kriê pioh asei mlei kâo pô jing doh jăk, dôk hdĭp bi mơak kơ Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 23:7-29
Kênh Youtube BHKTHN:
