Yelemis 3:11-13
Nqe cim:
“Yixalayees uas siab tsis ncaj, koj cia li rov los cuag kuv. Kuv yog tus uas muaj kev hlub thiab yuav tsis chim; kuv yuav tsis chim rau koj mus ibtxhis.” (Yelemis 3:12b)
Lus nug xav:
– Vajtswv qhia rau tus Cevlus Yelemis paub dabtsi txog haivneeg Yixalayees?
– Nws kom tus Cevlus Yelemis tshajtawm dabtsi rau lawv?
– Tus Tswv lo lus nqua hu “rov los” txhawb peb lub zog rhais ruam hauv kev lees txim thiab hloov dua tshiab li cas?
Tus Cevlus Yelemis zaj lus qhuab qhia feem ntau coj peb mus pom qhov tseeb uas ua rau peb tsis tshua qab siab txog tej kev txhaum, kev ntxeev siab, thiab nuj nqis ntawm qhov uas tig nruabqaum rau tus Tswv. Tiamsis nyob hauv tej lus txiav txim uas hnyav hnyav ntawd, peb kuj pom tau tus Tswv lo lus nqua hu hlub tshua rau Nws haivneeg. Ntawm no yog ib ntu uas qhia tshwm Vajtswv txojkev hlub tshua loj kawg nkaus rau Nws haivneeg.
Vajtswv qhia rau tus Cevlus Yelemis paub hais tias, haivneeg Yixalayees txawm ntxeev siab los lawv tseem ncaj ncees dua haivneeg Yudais (Yelemis 3:8, 11). Qhov tseeb tiag, haivneeg Yixalayees tau poob rau hauv kev txhaum pe mlom thiab rhuav tshem tej lus cogtseg nrog Vajtswv. Tiamsis haivneeg Yudais txojkev txhaum tseem hnyav dua, rau qhov lawv khavtheeb thiab ua ntsejmuag ncaj siab nkhaus (Yelemis 3:9-10).
Vim tus Tswv muaj lub siab hlub tshua, Nws thiaj txib tus Cevlus Yelemis mus tshajtawm lo lus nqua hu meej meej rau haivneeg Yixalayees hais tias: “Koj cia li rov los cuag kuv. Kuv yog tus uas muaj kev hlub thiab yuav tsis chim; kuv yuav tsis chim rau koj mus ibtxhis” (nqe 12). Qhov no qhia pom qhov tseemceeb ntawm Vajtswv tus mojyam. Nws txojkev ncaj ncees xav kom tibneeg yuav tsum paub txog kev txhaum. Tus Tswv nqua hu haivneeg Yixalayees hais tias: “Koj cia li lees hais tias koj tau ua txhaum” (nqe 13), ces Nws yuav tig ntsia thiab zam txim. Vajtswv nplooj siab tsis xav rhuav tshem Nws haivneeg ib zaug li, tiamsis Nws xav kom lawv hloov siab lees txim kom tau rov muaj kev sib raug zoo nrog Nws. Qhov uas yuav tau kev zam txim thiab txhim kho tsis yog nyob ntawm tej kev fij khoom raws kevcai, tiamsis yog nyob ntawm kev hloov siab tiag tiag: uas yog lees kev txhaum, tso tej dab tej mlom tseg, thiab tig rov los cuag tus Tswv. Vajntxwv Daviv txawm tias nws tau ua txhaum hnyav heev rau tus Tswv, tiamsis thaum nws hloov siab tiag tiag thiab tig rov los cuag tus Tswv, ces tau tus Tswv zam txim thiab txhim kho nws lubneej dua. Nws tau sau txog qhov no hais tias: “Vajtswv, tej uas kuv coj tuaj fij rau koj ces yog kuv lub siab mos siab muag xwb, koj yuav tsis fee plhu rau tus uas txo hwjchim thiab lees nws tej kev txhaum ib zaug li” (Ntawv Nkauj 51:17). Thiab los ntawm tej uas tau ntsib dhau los, Vajntxwv Daviv zeem paub hais tias: “Tus TSWV yog tus siab dawb siab zoo thiab muaj kev hlub, nws tsis chim sai thiab nws hlub mus ibtxhis” (Ntawv Nkauj 103:8). Lub siab pauv hloov thiab tig “rov los” cuag tus Tswv yeej ib txwm tau Nws txais yuav, thiab ntawd yog zaj lus uas tsis txawj hloov rau tibneeg ntiajteb.
Niaj hnub nimno, tus Tswv lo lus nqua hu: “Cia li rov los cuag kuv!” yeej tsis hloov li. Tus Tswv tsuas xav kom peb ncaj ncees lees peb tej kev txhaum thiab tig rov qab los xwb. Nws yuav txais yuav peb los ntawm txojkev ncaj ncees, hlub tshua thiab hloov peb dua tshiab. Tus Tswv txojkev chim yuav tsis nyob mus ibtxhis; tiamsis Nws txojkev hlub tshua yuav nyob mus ibtxhis tsis kawg.
Thov Vajtswv,
Tus Tswv, txhua zaus uas nyuam yaus mus deb ntawm Koj, thov pub nyuam yaus muaj lub siab ncaj lees kev txhaum, paub hloov siab, thiab tig rov los cuag Koj; kom tau Koj zam txim thiab rov tau sib raug zoo nrog Koj. Nyuam yaus tuav Yexus Khetos lub npe thov, Amees.
Peb puas tau teb tus Tswv lo lus nqua hu tig “rov los” lawm tau? Peb puas npaj txhij hloov siab lees txim kom tau tus Tswv hloov lubneej lawm tau?
Nyeem Vajluskub hauv peb lub xyoos Exekees 4-5
Kênh Youtube BHKTHN:
