Jêrêmi 3:11-13
“Kră Yang khan: Ơ Isơrael bơngai mă ưh kơ tơpăt, brŏk bĕ! Inh lăng tơ iĕm muh măt Inh huay pă thoi ‘maih hil boih, yua kơ Inh băt ‘mêm mơnat: Inh ưh pă hil ling lang dơ̆ng boih, Kră Yang khan.” (Jêrêmi 3:12b)
Nơ̆r tơchĕng pơwao:
– ‘Bok Kei-Dei ăn kơ Jêrêmi bơngai pơtruh nơ̆r Sư, băt tơdrong kiơ gah kon pơlei Isơrael?
– Sư athei Jêrêmi tơbăt kơ kon pơlei Isơrael tơdrong kiơ?
– Nơ̆r Kră Yang krao wơ̆n wă kơ “wih brŏk” noh pơlung pơdrŭt bơ̆n yak năm lăm tơdrong tơbral păng tơplih ‘nao thoi yơ?
Dôm nơ̆r Kră Yang mă Jêrêmi khan lê̆ hơdrol noh ngăl pơm ăn kơ đe klai kơ mơ̆ng, yua kơ nơ̆r sư tơbăt noh ‘bơm kơ tơdrong đe yoch, ‘bơm kơ đe blah plơ̆ Kră Yang, păng tơbăt khan lu bơngai tơwih rŏng kơ Kră Yang, lĕch sư gô răm. Mă khan lei ră,dôm lu nơ̆r sek tơlang pran dêh noh hei,gah lăm sư, bơ̆n kư̆m chă‘bôh nơ̆r krao wơ̆n ‘bĕnh kơ tơdrong mơnat rơngơp đơ̆ng Kră Yang ‘măn ăn kơ kon pơlei mă Sư rơih noh. Hla bơar Jêrêmi chăl 3:11-13 mă bơ̆n pơhrăm ‘nâu, sư kư̆m thoi lơ Hla bơar nai tơ’bôh jơhngơ̆m ‘Bok Kei-Dei ‘mêm mơnat ‘lơ̆ng dêh ‘măn kơ lu kon pơlei Sư. Kră Yang ăn kơ Jêrêmi băt kon pơlei Isơrael mă khan kơchu, blah plơ̆ Kră Yang ră mă-lei oei ‘lơ̆ng ‘biơ̆ lu kon pơlei Juđa ‘mơ̆i (Jêrêmi 3:8,11). Tơpă sư, kon pơlei Isơrael huŏng bơih lăm tơdrong yoch kơkuh kơ rup yang păng kư̆m pơrăm lê̆ tơdrong pơgơ̆p pơkă hăm Kră Yang ‘Bok Kei-Dei noh. Mă-lei tơdrong yoch kon pơlei Juđa oei tih hloh ‘mơ̆i, yua kơ lu sư pơdê, lăng Kră Yang hơi, păng lu sư arih chă pơm rŏ rŏ gah ‘nguaih đĕch (Jêrêmi 3:9-10). Yua kơ jơhngơ̆m Kră Yang ‘mêm mơnat na Sư wơh Jêrêmi năm tơbăt nơ̆r Sư krao wơ̆n kon pơlei Isơrael rơđah hơđăl thoi âu: “…brŏk bĕ! Inh lăng tơ iĕm, muh măt Inh huay pă thoi ‘maih hil bơih…” (trong 12). Tơdrong‘nâu tơ’bôh jơhngơ̆m Kră Yang’Bok Kei-Dei ‘lơ̆ng tơpăt noh jrŭ hlom dêh. Tơdrong ‘lơ̆ng tơpăt Sư noh wă kơ lu bơngai mă pơm yoch noh khŏm drơ̆ng lu sư yoch.Kră Yang krao kon pơlei Isơrel thoi âu: “Kư̆ mă ih chu pŭ iŏk tơdrong yoch…” (trong 13), lei Kră Yang gô mơnat huay kơ jô̆ yo. Jơhngơ̆m Kră Yang ưh kơ đei layơ ‘maih wă pơrăm pơtôch lê̆ kon pơlei Sư ôh, mă-lei Sư wă dêh kơ lu kon pơlei Sư tơbral yoch wă kơ Sư mơnat tơgŭm hơmet ming tơdrong pơgơ̆p tơ’bưh kon pơlei Sư hăm Sư jing‘lơ̆ng. Wă kơ Kră Yang mơnat huay kơ jô̆ yo tơdrong yoch păng wă kơ Sư hơmet ming tơdrong pơgơ̆p tơ’bưh jing‘lơ̆ng noh ưh kơ trŏ kơ lu tơmam soi pơyơ̆r mă bơ̆n ‘bôh păng măt ôh, mă-lei tơdrong tơbral hăm đĭ jơhngơ̆m‘noh đĕch: Drơ̆ng kơdih yoch, hŭt lê̆ lu yang ưh kơ tơpă na wih brŏk tơ Kră Yang. Pơtao Đawit sơ̆ mă khan sư pơm yoch tih hăm Kră Yang ră, kơplah sư tơbral đĭ jơhngơ̆m, chăng lê̆ tơdrong yoch, wih brŏk dơ̆ng tơ Kră Yang, Kră Yang hlôi mơnat ăn, huay kơ jô̆ yo,hơmet ming ăn tơdrong lui sư jing‘lơ̆ng. Na sư chih roi tơdrong đêl sư mơn đei, thoi âu: “Tơdrong pơm Yang lăp đon Kră Yang ‘Bok Kei-Dei noh jơ̆ jơhngơ̆m pơchah. Ơ Kră Yang ‘Bok Kei-Dei! Jơhngơ̆m tơbral pơchah Ih kư̆m ưh kơ pơdê.” (Hơriso 51:17). Păng kư̆m đêl mơn thoi noh na Pơtao Đawit khan tơpă thoi âu: “Kră Yang đei tơdrong ‘mêm mơnat. Huay ‘bônh kơ blĕk păng ‘bĕnh kơ tơdrong ‘mêm.” (Hơriso 103:8). Jơhngơ̆m băt tơbral “wih brŏk” tơ Kră Yang noh Kră Yang ling-lang kơ sơng iŏk; păng hăm kon bơngai bơ̆n,‘nâu bơih tơdrong Kră Yang bơtho krao wơ̆n ưh kơ đei layơ tơplih. Dang ei, nơ̆r Kră Yang krao wơ̆n bơ̆n “Jah wih brŏk!” noh oei ưh kơ đei layơ tơplih ôh. Kră Yang ưh kơ pơm dêh ôh, Sư hmă đĕch, Sư pôm wă kơ bơ̆n hơlăng raih đaih drơ̆ng bơ̆n kơdih yoch glăi na “wih brŏk” tơ Sư. Na Sư gô pơm thoi Sư pơkă, gô đih sơng glơng iŏk bơ̆n hăm tơdrong mơnat, pơklaih hơmet ming chăl rih bơ̆n jing ‘lơ̆ng. Tơdrong Kră Yang hil ưh kơ đunh sot ling-lang khŏm khŏm hloi ôh; gah jơhngơ̆m Sư ‘mêm mơnat noh đĕch oei oei ling-lang khŏm khŏm ưh kơ layơ tôch.
Ơ Kră Yang, mă khan inh đei tơklah ataih đơ̆ng Ih ‘bơ̆t năr ayơ, jơ ayơ, apinh Ih tơgŭm inh drơ̆ng inh kơdih yoch glăi hăm Ih, băt tơbral, wih brŏk dơ̆ng tơ Ih wă kơ Ih mơnat huay kơ jô̆ yo păng wă kơ Ih hơmet ming tơdrong pơgơ̆p tơ’bưh inh hăm Ih jing ‘lơ̆ng dơ̆ng. Inh krao khan yua Anăn Kră Yang Yêsu Krist, Amen!
Nơ̆r Kră Yang krao athei “wih brŏk” noh bơ̆n tơl bơih dah tam mă? Bơ̆n hăm đei jơhngơ̆m lăp đon tơbral tơdrong yoch wă kơ Kră Yang hơmet ming bơ̆n jing ‘lơ̆ng ưh?
Đŏk Sơ̆p hla bơar ‘Bok Kei-Dei lăm pêng sơnăm:Êsêkiên 4-5.
Kênh Youtube BHKTHN:
