Chivkeeb 39:7-20
Nqe cim:
“…Tiamsis Yauxej hle hlo Yauxej lub tsho rau nws, thiab Yauxej tawm plaws khiav rau nraum zoov lawm”. (Chivkeeb 39:12b
Lus nug rau sawvdaws xav:
– Yauxej tabtom ntsib yam kev dag ntxias twg?
– Nws txiav txim siab tawmtsam yam kev dag ntxias ntawd li cas?
– Peb pheej tawmtsam kev dag ntxias li cas?
Chivkeeb 37 sau txog zaj xwm uas Yauxej raug nws cov tij laug ntxub, muab pov rau hauv qhov tshij thiab muab muag mus rau tebchaws Iziv. Tom qab ntawd Yauxej raug ua qhev rau Pautifas uas yog ib tug nom nram Iziv. Pautifas ntseeg siab heev rau Yauxej, nws thiaj muab tagnrho nws lub cuabtam cob rau Yauxej ua tus saib xyuas. Xav hais tias ntshai Yaujxej lub neej yuav tau zoo nyob kaj siab lug, tiamsis tsis yog li ntawd, txoj kev dag ntxias nyob tos rawv tom hauv ntej.
Yauxej yog ib tus tub hluas “cev yiag thiab zoo nraug heev”, Pautifas tus pojniam thiaj nyiam Yauxej heev. Yog li ntawd, Yauxej tabtom ntsib kev sim uas dag ntxias ntawm lub neej hluas. Txoj kev dag ntxias no tsis yog tshwm muaj ib zaug xwb tiamsis muaj txhua hnub hauv Yauxej lub neej thaum ntawd (nqe 10). Ntawd yog txoj kev dag ntxias uas coob tus twb ntsib thiab poob rau kev txhaum lawm. Txawm yog vajntxwv Daviv tus uas hwm Vajtswv heev los nws twb kov tsis yeej txoj kev dag ntxias no thiab (2 Xamuyees 11:2-4).
Txij thaum pib mus txog thaum kawg Yauxej yeej tsis kam deev nws tus tswv tus pojniam li. Qhov uas yuav hla dhau kev dag ntxias, Yaujxej ua tib zoo qhia pog Pautifas paub qhov tseeb. Tim 1, nws tsis xav ua rau nws tus tswv puas siab vim qhov uas tus tswv tso siab rau nws heev. Tim 2, pog Pautifas yog nws tus tswv tus pojniam nws tsis ntxeev siab rau nws tus tswv, thiab tim 3 Yauxej tsis xav ua txhaum rau Vajtswv. Tej zaum nws tus tswv mus deb lawm yeej tsis paub tej uas nws ua tiamsis Vajtswv yog tus paub, nws tsis kam ua txhaum rau Vajtswv. Zeem paub tseeb li ntawd yog qhov tseemceeb uas pab tau Yauxej kov yeej kev dag ntxias.
Txoj kev dag ntxias yim hnub yim loj vim pog Pautifas tsis tso Yauxej tseg li. Zaum no pog Pautifas tuav Yauxej lub tsho cab Yauxej los nrog nws “pw”. Yauxej yeej txiav tu nrho tsis kam ua li txoj kev dag ntxias, nws thiaj hle hlo nws lub tsho cia thiab khiav mus lawm (nqe 11-12). Ntseeg tias yus muaj peevxwm kovyeej kev dag ntxias uas los ntawm Ntxwgnyoog, tiamsis zeem paub hais tias yus qaug zog, txiav txim siab khiav tawm qaij deb kev dag ntxias mas thiaj yog lub tswvyim zoo. Thaum uas tus tswv rov los txog, pog Pautifas quaj rau nws tus txiv thiab liam txim rau Yauxej. Pog Pautipas muaj tim khawv uas yog lwm tus qhev pom thiab tuav rawv Yauxej lub tsho. Yauxej tus tswv thiaj chim heev thiab muab Yauxej kaw rau hauv tsev lojcuj lawm (nqe 14-20). Vim qhov uas khiav txoj kev dag ntxias, Yauxej thiaj raug liam txim thiab raug kaw hauv tsev lojcuj. Txawm li ntawd los Yaujxej saib qhov uas raug liam txim thiab raug kaw hauv tsev lojcuj tseem zoo dua li ua txhaum rau Vajtswv.
Dab Ntxwgnyoog mus mus los los ib ncig ntawm peb thiab nrhiav sijhawm los dag ntxias peb (1Petus 5:8). Thaum ntsib kev dag ntxias, yog peb pheej ua lub siab qeeb ces peb yeej yuav poob rau kev txhaum xwb. Qhov uas peb yuav hla dhau kev dag ntxias yog khiav thiab zam deb kom tsis ua txhaum rau Vajtswv. Peb yeej tsis muaj zog kovyeej kev dag ntxias, khiav xwb thiaj yog tswvyim zoo. Txawm yog tej zaum yuav raug them nqis siab los xij, vim tej koob hmoov uas Vajtswv coglus rau tus uas hla dhau kev dag ntxias yog yam zoo kawg (Yakaunpaus 1:12).
Thov Vajtswv:
Vajtswv, nyuam yaus zeem paub hais tias nyuam ua tsis tau zoo thiab tsis muaj zog. Thov pab nyuam yaus paub hwm Vajtswv thiab muaj siab tawv, khiav deb kev dag ntxias, txawm yog yuav ntsib kev txomnyem los xij. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas npaj nroos kom qaij deb kev dag ntxias?
Nyeem Vajluskub hauv peb lub xyoos: Teev Npe 25
Kênh Youtube BHKTHN:
