Klei Aê Diê Blŭ: Klei Mphŭn Dơ̆ng 39:7-20
Êlan kliăng: “…Gơ̆ lui ao gơ̆ hlăm kngan ñu leh anăn đuĕ kơ tač.” (Klei Mphŭn Dơ̆ng 39:12b)
Klei êmuh ksiêm mĭn: Y-Yôsep dôk tlă anăp hŏng ya mta klei mplư? Si hdră êlan ñu čuăn ai tiê bi kdơ̆ng hŏng klei mplư? Si hdră êlan drei khăng bi kdơ̆ng hŏng klei mplư?
Klei Mphŭn Dơ̆ng 37 čih klei yăl dliê Y-Yôsep tŭ klei phung ayŏng gơ̆ bi êmut, bhĭr hlăm ƀăng êlam leh anăn čhĭ gơ̆ phung mnia blei ba kơ čar Êjip. Êdei tinăn čhĭ jing hlŭn hlăm sang Y-Pôtipar, khua phung kahan, Y-Yôsep mâo klei khua gơ̆ knang jao brei kiă kriê sang ñu. Mĭndah klei hdĭp êđăp ênang yơh, ƀiădah amâo dưi thâo êlâo ôh klei mplư dôk kăp gơ̆ ti anăp.
Y-Yôsep jing êkei hlăk ai, “siam leh anăn kƀăt êkei”. Mô̆ khua tluh ƀô gơ̆ kyua klei siam anăn. Êkei hlăk ai Y-Yôsep dôk tlă anăp hŏng klei mplư klei êkei mniê ênuk hlăk ai. Leh anăn klei mplư anei truh amâo djŏ knŏng sa blư̆ ôh ƀiădah nanao grăp hruê (êlan 10). Anei jing sa hlăm lu mta klei mplư mâo lu snăk mnuih tlă anăp leh anăn dluh lĕ, amâo lui hlei pô ôh. Tơl wăt mtao Y-Đawit huĭ mpŭ kơ Aê Diê ăt lĕ mơh ti anăp klei mplư anei (II Y-Samuel 11:2-4).
Mơ̆ng kŏ truh kơ tuč, Y-Yôsep čuăn leh ai tiê hngah kơ mô̆ khua gơ̆. Knhuang tal êlâo hĭn čiăng dưi găn klei lông dlăng mơ̆ng klei mplư anei, gơ̆ mblang hŏng klei ênang. Tal sa, gơ̆ amâo čiăng ôh ngă bi ênguôt khua gơ̆, gơ̆ dôk knang kơ pô; tal dua, kyua ñu jing mô̆ khua gơ̆; leh anăn tal tlâo, gơ̆ amâo jhŏng ngă klei ƀai prŏng ti anăp Aê Diê. Năng ai khua hiu kbưi amâo thâo, ƀiădah sĭt nik Aê Diê thâo leh anăn Y-Yôsep amâo jhŏng ngă klei soh hŏng Aê Diê ôh. Thâo săng klei anei yơh jing mta phŭn yuôm čiăng dưi hĭn hŏng klei mplư.
Hnơ̆ng klei mplư ƀrư̆ đĭ hĭn êjai, mô̆ khua gơ̆ amâo kdŭn ôh. Tal anei ñu djă ti ao, ktŭng Y-Yôsep leh anăn ăt lŏ lač kơ gơ̆ “đih” hŏng ñu. Y-Yôsep ăt khut khat hngah klei mplư hŏng klei phưi ao leh anăn êran đuĕ (êlan 11-12). Knang kơ drei pô srăng dưi hĭn hŏng klei mplư jing mnêč yang jhat, ƀiădah thâo kral drei pô jing awăt, khut khat êran đuĕ kơ klei mplư jing klei čuăn ngă thâo mĭn. Tơdah khua wĭt kơ sang, mô̆ ñu mgưt ngă hia mčeh luar kơ gơ̆. Ñu mâo wăt phung hưn jing phung dĭng buăl mkăn, mbĭt hŏng mnơ̆ng bi sĭt jing ao gơ̆. Khua gơ̆ ngêñ snăk brei krư̆ gơ̆ hlăm war mnă (êlan 14-20). Snăn kyuadah êran đuĕ kơ klei mplư Y-Yôsep tla ênoh yuôm jing klei krư̆ uăt ruăt. Wăt snăn dưn mơh, hŏng Y-Yôsep jăk hĭn arăng krư̆ uăt ruăt mơh hŏng klei ngă soh hŏng Aê Diê.
Yang jhat dôk kăp lua jŭm dar nanao čiăng duah mmông găl mplư drei (I Y-Pêtrôs 5:8). Hlăk klei mplư truh, tơdah drei ngă kĭ kơ̆, amâo khut khat ôh srăng ênưih dluh lĕ. Sa hlăm lu hdră čiăng dưi hĭn hŏng klei mplư jing êran đuĕ leh anăn ñĕ đuĕ bi kbưi čiăng kơ đăm ngă soh ôh hŏng Aê Diê. Drei jing phung awăt, kyuanăn đăm knang kơ drei pô ôh, êran đuĕ kơ klei mplư jing hdră djŏ jăk hĭn. Wăt tơdah tla ênoh dưn, ƀiădah klei jăk mơak Aê Diê ƀuăn brei kơ mnuih dưi găn klei mplư jing prŏng êdimima (Y-Yakơ 1:12).
Si ngă drei hmiêt mkăp êran đuĕ čiăng ñĕ đuĕ kbưi kơ klei mplư mơ̆?
Wah lač: Ơ Khua Yang, kâo thâo kral kâo jing awăt, amâo klă kluôm ôh. Akâo Khua Yang brei kâo khut khat huĭ mpŭ kơ Khua Yang nanao leh anăn jhŏng, čiăng êran đuĕ tlaih kơ klei mplư wăt tơdah tlă anăp hŏng klei dleh dlan dưn mơh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
