Mathais10:40-42
Nqe cim:
“Nej yuav tsum nco ntsoov hu tej qhua los so hauv nej tej tsev. Muaj qee leej hu tau cov timtswv ceebtsheej los lawv twb tsis paub hais tias yog cov timtswv” (Henplais 13:2).
Lus nug rau sawvdaws xav:
- Tswv Yexus hais tias, tus uas txais tos cov thwjtim yog txais tos leejtwg?
- Cov neeg txais qhua yuav tau dab tsi?
- Peb tab tom ua tes haujlwm txais qhua zoo li cas?
Kev txais qhua yog ib tug qauv zoo muaj nyob hauv haiv neeg Yudais, yog leejtwg tsis txais qhua ces suav hais tias tus ntawd tsis zoo li neeg Yudais lawm. Tus qauv zoo no pib muaj puag thaum Anplahas txais tos Vajtswv cov timtswv uas tau sau tseg hauv Chivkeeb 18, thiab tau haiv neeg Yudais coj li ntawd los txog nimno. Yog li ntawd, Tswv Yexus xav kom cov neeg uas ntseeg Nws yuav tsum ua lub neej txais tos qhua txhua lub sijhawm.
Ib qhov qhia tshwm ntawm kev txais qhua yog txais tos tus Tswv cov tubtxib uas qhia Moo Zoo. Lo lus“nej” hauv (nqe 40) yog hais txog cov thwjtim, thaum txais tos Tswv Yexus cov thwjtim ces twb yog txais tos Tswv Yexus thiab txais tos Vajtswv ntag. Tswv Yexus qhia li ntawd txhawb cov thwjtim lub zog, lawv tsis ua ntsuag nyob hauv ntiajteb tiamsis cov uas muaj lub siab hlub tus Tswv tiag ces yeej nyiam txais qhua thiab tus nyiam txais qhua yeej txais yuav txoj Moo Zoo. Tswv Yexus qhia ntxiv txog tej qhua uas cov ntseeg yuav tsum txais tos yog Vajtswv tej tubtxib, cov neeg ncaj ncees lossis Tswv Yexus tus thwjtim uas yau dua ntais. Thaum tus ntseeg muaj lub neej paub txais qhua lawv yuav tsis tsawg ib yam dab tsi li.
Nyob rau ntu neej uas muaj neeg dag noj dag haus coob coob, tej zaum yuav ua rau cov ntseeg tsis muaj nplooj siab nyiam qhua thiab tsis xav txais qhua lawm. Vajtswv Txojlus qhia peb pom txog, yog ib tug neeg Yixalayees sab ntsujplig yuav tau muaj nplooj siab nyiam qhua thiab txais qhua txhua lub sijhawm, tshawjxeeb yog txais tos cov kwvtij ntseeg txhua tus. Ua li ntawd yuav txhawb tau cov neeg ua Vajtswv haujlwm lossis pab tau peb cov kwvtij ntseeg thaum lawv muaj kev cheemtsum. Tus sau phau Henplais 13:2 txhawb peb lub zog hais tias: “Nej yuav tsum nco ntsoov hu tej qhua los so hauv nej tej tsev. Muaj qee leej hu tau cov timtswv ceebtsheej los lawv twb tsis paub hais tias yog cov timtswv”. Peb yog Vajtswv cov neeg, peb yuav tsum ua haujlwm tshwm kev hlub los ntawm, ib tug hlub ib tug tiag tiag, rau qhov txais qhua yog ib tes haujlwm qhia tshwm txog kev sib hlub ntawm yus tej kwvtij uas muaj kev cheemtsum. Tej zaum peb yuav txhawj txog qhov uas tsis muaj yam ub yam no los tiam qhua, tiamsis nco ntsoov hais tias muaj lub siab npaj nroog txais qhua ces twb zoo lawm, thiab pub tau tus qhua ib khob dej txiag xwb yeej yuav tau tus Tswv muab nqi zog.
Thov Vajtswv,
Tus Tswv, thov pab nyuam yaus nco ntsoov muaj lub siab hlub tshua thiab pab cov kwvtij ntseeg txhua tus. Thov pab nyuam yaus muaj lub neej npaj nroos txais qhua txhua lub sijhawm kom pab tau ntau leej uas muaj kev cheemtsum thiab ua rau ntiajteb pom peb yog Koj tug. Amees.
Peb puas npaj nroos txais qhua thiab pab peb cov kwvtij ntseeg lawm tau?
Nyeem Vajluskub hauv peb lub xyoo: Pajlug 25
Kênh Youtube BHKTHN:
