Klei Aê Diê Blŭ: Y‑Mathiơ 10:40-42
Êlan kliăng: “Đăm wơr bĭt ôh jum phung tue, kyuadah êjai ngă klei anăn mâo đa đa jum leh phung dĭng buăl jăk, amâo thâo kral digơ̆ ôh.” (Hêbrơ 13:2).
Klei êmuh ksiêm mĭn: Khua Yang Yêsu lač pô jum phung ƀĭng kna Khua Yang jing jum leh hlei pô? Ya klei phung mâo ai tiê jum tue dưi dưn? Si drei bi êdah klei khăp hlăm ai tiê jum tue?
Ai tiê thâo jum tue jing klei bhiăn mâo leh mơ̆ng sui leh mơ̆ng phung Yuđa, hlei phung amâo mâo ai tiê thâo jum tue srăng lač jing luč knuih phung Yuđa. Ai tiê anei dưi mâo mơ̆ng Y‑Apbraham hlăk ñu jum phung dĭng buăl Aê Diê hlăm Klei Mphŭn Dơ̆ng 18, leh anăn mâo lu gưl ênuk phung Yuđa djă pioh truh ară anei. Hlăm ai tiê anăn, Khua Yang Yêsu čiăng phung đăo kơ Ñu ăt bi êdah ai tiê thâo jum tue.
Klei bi knăl mơ̆ng ai tiê thâo jum tue jing jum phung dĭng ktang Klei Mrâo Mrang jăk, boh phung “diih” (êlan 40) lač kơ phung ƀĭng kna, sĭt sa čô jum phung ƀĭng kna, pô anăn ăt dôk jum Khua Yang Yêsu mơh leh anăn ăt dôk jum Aê Diê. Khua Yang bi êdah klei anei čiăng mđĭ ai jih jang phung ƀĭng kna, diñu amâo hjăn păn ôh hlăm lăn ala kyua phung klă sĭt khăp kơ Aê Diê srăng bi êdah ai tiê thâo jum tue hŏng diñu, ăt msĕ hŏng bruă phung anăn tŭ mă leh Klei Mrâo Mrang Jăk. Khua Yang Yêsu lŏ lač kơ phung mâo phung đăo bi êdah ai tiê thâo jum tue, anăn jing phung khua pô hưn êlâo Aê Diê, phung kpă ênô, amâodah sa hlăm phung ƀĭng kna điêt dhiêt Aê Diê. Sĭt phung đăo kơ Khua Yang Yêsu mđĭ lar ai tiê thâo jum tue diñu srăng mâo klei pah mni kơ pô, Khua Yang srăng hdơr bruă diñu drông tue leh anăn diñu amâo srăng luč liê ôh kyua ngă leh klei anăn.
Ti krah lăn ala bŏ hŏng klei mplư leh anăn jhat ƀai năng ai ngă kơ phung đăo kơ Krist hruê anei amâo lŏ hur har ôh hlăm klei thâo jum tue, ai tiê thâo jum tue hlăm lu mnuih ƀrư̆ luč. Klei Aê Diê Blŭ mñă kơ drei kơ knuih sa čô Israel hlăm mngăt jing ai tiê thâo jum tue, drei bi êdah ai tiê thâo jum tue, boh nik hŏng phung ayŏng adei sa klei đăo, mơ̆ng anăn drei srăng mđĭ ai phung dôk mă bruă kơ Aê Diê, amâodah drei đru kơ phung ayŏng adei dôk hlăm klei dleh dlan hŏng bruă ngă klă sĭt. Pô čih hră Hêbrơ 13:2 mđĭ ai drei: “Đăm wơr bĭt ôh jum phung tue, kyuadah êjai ngă klei anăn mâo đa đa jum leh phung dĭng buăl jăk, amâo thâo kral digơ̆ ôh.” Jing phung đăo kơ Khua Yang brei drei bi êdah klei khăp sĭt nik hdơ̆ng pô, bruă jum tue jing klei găl bi êdah klei khăp hnơ̆ng pô leh anăn hŏng phung ayŏng adei dôk hlăm klei dleh dlan. Năng ai drei dôk rŭng răng kyua pô amâo djăp klei dưi čiăng drông tue, ƀiădah brei hdơr ai tiê mprăp nanao jing klei yuôm bhăn kyua knơ̆ng sa kčok êa ngač đuč ăt djăp kơ Aê Diê yap bruă drei ngă, leh anăn drei srăng mâo klei pah mni kơ pô.
Diih dôk mprăp jum amâodah đru phung ayŏng amai adei hlăm sa klei đăo hŏng pô mơ̆?
Wah lač: Ơ Khua Yang, akâo kơ Ih đru kâo thâo khăp mđing dlăng nanao kơ phung ayŏng amai adei hlăm klei đăo, akâo kơ Ih đru kâo jum leh anăn đru ayŏng amai adei pô, čiăng mơ̆ng anăn lăn ala srăng thâo hmei klă sĭt jing anak Ih.
Dlăng Klei Aê Diê Blŭ hlăm tlâo thŭn: Klei Bi Hriêng 25:1‑28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
