Yauhas 14:21-23
Nqe cim:
“Tus uas lees yuav kuv tej lus qhia thiab ua raws li tej lus ntawd, tus ntawd yog tus uas hlub kuv. Tus uas hlub kuv, kuv txiv yuav hlub tus ntawd, kuv yuav hlub tus ntawd thiab qhia kuv rau nws paub” (Yauhas 14:21).
Lus nug sawvdaws xav:
- Tswv Yexus qhia hais tias, tus uas hlub Yexus thiab ua raws li Nws tej lus qhia yuav tau dabtsi?
- Vajtswv Vaj Peb Leeg yuav ua licas rau tus uas hlub tus Tswv lubneej?
- Peb yuav npaj licas thiaj ua rau sab ntsujplig muaj zog thiab ua rau Vajtswv tau ntsejmuag nyob hauv peb lubneej?
Tswv Yexus qhia paub, timkhawv ntawm kev sib hlub yog mloog lus (nqe 15, 21). Yooj yim rau peb hais tias kuv tus Tswv kuv hlub koj, tiamsis yog tsis ua raws li tus Tswv tej lus ces yog hais dag xwb. Hais dua lwm seem ces yog hais tias, leej twg tsis ua raws li tus Tswv tej lus qhia ces tus ntawd yeej tsis tau hlub tus Tswv. Tswv Yexus rov hais ib zaug ntxiv hauv nqe 23 hais tias: “Tus uas hlub kuv yeej ua raws li kuv tej lus qhia. Kuv Txiv yuav hlub tus ntawd, kuv Txiv thiab kuv yuav los cuag nws thiab nrog nws nyob”. Thaum peb mloog tus Tswv tej lus qhia ces yog peb hlub tus Tswv thiab tau tus Tswv hlub, tau Vaj Peb Leeg los nyob hauv peb (Yauhas 14:16-17). Vajluskub qhia hais tias, Vajtswv yog keb hlub, Vajtswv hlub peb thaum peb tseem yog neeg txhaum (Loos 5:8). Tus Tswv tsis qhia hais tias yog peb hlub tus Tswv ua ntej, tiamsis qhia hais tias: “peb hlub, vim tus Tswv twb xub hlub peb ua ntej lawm” (I Yauhas 4:10, 19). Yog li ntawd, peb yim hlub tus Tswv, ces yim tau tus Tswv hlub peb.
Tswv Yexus tej lus qhia ua ntej yuav mus saum tus ntoo khaublig qhia pom txojkev sib raug zoo ntawm tus Tswv thiab cov neeg uas raws Nws qab, hlub tus Tswv thiab mloog Nws lus yog ib txojkev sib raug zoo uas zoo kawg li. Peb nrog tus Tswv sib raug zoo vim muaj kev sib koom hauv Vajtswv Vaj Peb Leeg nyob hauv peb. Qhov uas xav tsis thoob yog, thaum peb los ntseeg Yexus ces tau Vajtswv zam txim thiab tau txais kev hlub los ntawm Vajtswv, thaum ntawd peb yuav hlub taus lwm tus.
Ua ntej ntseeg tus Tswv, tibneeg yeej raug cais ntawm Vajtswv vim tus nrim uas yog kev txhaum, tsis yog tsis tau nrog Vajtswv sib raug zoo xwb, tseem ntshai kawg vim yuav raug Vajtswv rau txim thiab. Tiamsis tomqab los ntseeg Yexus, tau Vajtswv zam txim, tau los ua Vajtswv menyuam ces peb muaj kev sib raug zoo nrog Vajtswv. Thaum los nrog Vajtswv sib raug zoo lawm, tsimnyog peb yuav tsum ceev qhov ntawd zoo los ntawm niaj tag kis los kawm Vajtswv Txojlus thiab ua raws kom muaj lubneej ua rau Vajtswv lub koob npe nrov ncha.
Thov Vajtswv,
Tus Tswv, ua Koj tsaug vim Koj Koj hlub nyuam yaus, pub nyuam yaus los ua Koj li menyuam kom tau nrog Koj sib raug zoo. Thov pab kom nyuam yaus nquag kawm xyaum Koj Txojlus thiab ua raws li ntawd txhua hnub. Amees.
Peb puas tseg sijhawm los nrog tus Tswv sib raug zoo hauv nws Txojlus txhua hnub lawm tau?
Nyeem Vajluskub hauv peb lub xyoo: Exekees 28:11-26
Kênh Youtube BHKTHN:
