Klei Aê Diê Blŭ: Y-Yôhan 14:21-23
Êlan kliăng: “Hlei pô mâo klei Kâo mtă leh anăn djă pioh digơ̆, ñu anăn yơh jing pô khăp kơ Kâo. Hlei pô khăp kơ Kâo, Ama Kâo srăng khăp kơ pô anăn, Kâo srăng khăp kơ ñu leh anăn bi êdah Kâo pô kơ ñu.” (Y-Yôhan 14:21).
Klei êmuh ksiêm mĭn: Khua Yang Yêsu brei thâo hlei pô khăp kơ Khua Yang leh anăn djă pioh klei Ñu mtă, ya klei srăng mă tŭ? Ya mta klei Aê Diê Tlâo Čô Yang srăng tuh brei kơ klei hdĭp hlei pô khăp kơ Khua Yang? Si drei duh mnĭt mmông čiăng kơ klei hdĭp mngăt myang dưi jing ktang leh anăn hdĭp bi guh kơang kơ Anăn Khua Yang ti krah lăn ala?
Khua Yang Yêsu brei thâo klei hưn bi sĭt kơ klei khăp jing gưt asăp (êlan 15, 21). Ênưih snăk drei lač kâo khăp kơ Khua Yang, tơdah knŏng lač ƀiădah amâo gưt ngă klei Khua Yang mtô snăn knŏng jing klei khăp mgưt ti êlah kƀông đuč. Amâodah blŭ mdê hĭn, hlei pô amâo djă pioh klei Khua Yang mtă bi êdah kơ pô anăn ka khăp sĭt kơ Khua Yang ôh. Khua Yang Yêsu lŏ blŭ kñăm sa blư̆ mơh hlăm êlan 23 snei: “Tơdah sa čô khăp kơ Kâo, ñu srăng djă pioh klei Kâo blŭ, leh anăn Ama Kâo srăng khăp kơ ñu, leh anăn Hmei srăng hriê kơ ñu leh anăn ngă anôk dôk mbĭt hŏng ñu.” Boh blŭ “Hmei” lač kơ Aê Diê Tlâo Čô Yang. Tơdah drei djă pioh klei Khua Yang mtô leh anăn khăp kơ Khua Yang, snăn klei khăp Aê Diê Ama leh anăn Aê Diê Anak bŏ dlai hlăm drei, leh anăn Yang Mngăt Jăk jing Pô Đru, Mngăt Myang Klei Sĭt Nik srăng dôk mbĭt hŏng drei (Y-Yôhan 14:16-17). Klei Aê Diê Blŭ mtô, Aê Diê jing klei khăp, Ñu khăp leh kơ drei êjai drei ăt jing mnuih soh (Rôm 5:8). Khua Yang amâo mtô ôh drei khăp leh kơ Ñu êlâo, ƀiădah “drei khăp kyuadah Ñu khăp leh kơ drei êlâo” (I Y-Yôhan 4:10, 19). Kyuanăn tơdah ktang drei khăp kơ Khua Yang snăn klei khăp Khua Yang bŏ dlai hĭn êjai hlăm drei mơh.
Klei Khua Yang Yêsu mtô êlâo kơ Ñu nao ti kyâo bi kal brei ƀuh klei bi mguôp ti krah Khua Yang hŏng pô tui hlue Ñu, khăp kơ Ñu, djă pioh klei Ñu mtă jing sa klei bi mguôp sŭk suôr leh anăn yuôm bhăn êdimima. Sŭk suôr kyuadah Khua Yang leh anăn drei jing sa kluôm dhuôm hlăm klei khăp Aê Diê Tlâo Čô Yang tuh ti dlông drei. Yuôm bhăn kyuadah drei jing mnuih soh ƀiădah mơ̆ng mmông drei đăo kơ Khua Yang Yêsu, Ñu pap brei jih klei soh drei leh anăn drei dưi mă tŭ phŭn akŏ hnoh êa klei khăp mơ̆ng Aê Diê Tlâo Čô Yang, čiăng kơ mơ̆ng anăn yơh klei khăp Khua Yang hlăm drei dưi lar dlai truh kơ pô mkăn.
Êlâo kơ đăo kơ Khua Yang, anak mnuih bi kgăn kluôm dhuôm hŏng čhiăm păng klei soh, amâo dưi bi mguôp hŏng Aê Diê ôh, wăt huĭ hyưt snăk kơ “adiê bi kmhal, adiê tăm pah, adiê rŭ ênua…”! Ƀiădah leh đăo kơ Khua Yang Yêsu, drei mâo klei pap brei klei soh, dưi jing anak Aê Diê, drei hŏng Khua Yang mâo klei bi mguôp sŭk suôr êdimima. Brei grăp čô drei thâo mpŭ, djă pioh, thâo duh mnĭt mmông bi mguôp hŏng Khua Yang grăp hruê leh anăn djă pioh Klei Aê Diê Blŭ mtô čiăng kơ klei hdĭp mngăt myang drei dưi jing ktang, dôk hdĭp bi guh kơang kơ Anăn Khua Yang ti krah klei hdĭp ti lăn ala.
Si ngă drei êlâo hĭn duh mnĭt mmông kơ klei bi mguôp hŏng Khua Yang grăp hruê leh mơ̆?
Ơ Khua Yang, bi mni kơ Khua Yang kyua Ih khăp leh kơ kâo, brei kơ kâo klei dưi jing anak Ih čiăng kơ kâo dưi bi mguôp sŭk suôr leh anăn yuôm bhăn hŏng Aê Diê Tlâo Čô Yang. Akâo Khua Yang brei kâo hur har hriăm Klei Aê Diê Blŭ čiăng đup gưt leh anăn êlâo hĭn duh mnĭt mmông bi mguôp hŏng Khua Yang grăp hruê.
Dlăng Klei Aê Diê Blŭ hlăm tlâo thŭn: Y-Êsêkiêl 28:11-26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
